रोमियों 1
1
स्वागत
1हांव पौलुस ऐजै चिट्ठी लिखु, जू यीशु मसीह का सेवक औसौ, पौरमेशवरे मुखै चोणेयौंदा चैला हौणौ कारिए चोणे राए औरौ पौरमेशवर कै ढौबौशा तैसी सुसमाचार का प्रचार कौरणौ कारिए जौई कौरे राए। 2पवित्र शास्त्र दु पौरमेशवरे, पौरमेशवर कै बातौ बौताणौवाल़ै लैई ऐसी सुसमाचार कै बौताणौ का वादा कौरे राए थिया। 3ऐजा सुसमाचार अमारै प्रभु यीशु मसीह जू पौरमेशवर का बैटा औसौ तैसकै बारै दा औसौ, जू राजा दाऊद कै पीढ़ी दा पौयदा हौआ।
4औरौ पवित्र आत्मा कै अनौखी शौकतै लैई सै मौरेयौंदे मुंजीदा जियुंदी हौणौ की बौजैह शै तियौं शौकतै कै साथै पौरमेशवर का बैटा साबित हौआ औरौ सैजा यीशु मसीह अमारा प्रभु औसौ। 5मसीह दवारा मुखै अनुग्रह औरौ प्रेरिताए पौरमेशवर कै दवारा दैय राए कै तैसकै नांव कै बौजैह शै सौबै जाति कै लोग सुसमाचार पांदी बिशवाश कौरौ औरौ तैसकै आज्ञा का पालन कौरौ। 6रोम शहर दै रौणौवाल़ै बिशवाशीए तुऔं तिनु लोगौ मुंजी शामिल कौरे राए जू पौरमेशवर कै बैटै यीशु मसीह पांदी बिशवाश कौरौ।
7ऐजै चिट्ठी रोम शहर दै रौणौवाल़ै सौबी लोगौ कै नांव दै औसौ जिनु पौरमेशवर प्यार कौरौ औरौ तैसकै पवित्र लोग हौणौ कारिए बौएदै राए: अमारै पिता पौरमेशवर औरौ प्रभु यीशु मसीह कै ढौबौशा तुऔं अनुग्रह औरौ शान्तै भैटैया कौरौ।
रोम शहर कै जाणौ कै इछा
8आगै हांव तुऔं सौबी कै यीशु मसीह दवारा आपणै पौरमेशवर का धन्यवाद कौरु, जिथुकै यीशु मसीह पांदी तोंवारै बिशवाश कै चौर्चा बौहितै ठाँव दै हौए रौए। 9पौरमेशवर जैसकै सेवा मोऐं पूरै दिल शै तैसकै बैटै कै बारै मुंजी सुसमाचार लोगौ कै शुणायौ कौरु, सैजाई पौरमेशवर मैरा गवाह औसौ, कै हांव आपणी प्रार्थनाओं दै तुऔं लोगौ कै लगातार याद कौरेया कौरु। 10औरौ हमैशा आपणी प्रार्थनाओं दै बिन्ती कौरु, कै पौरमेशवर कै इछा कै हिसाब शै हांव तुऔं भैटिंदा ओऊं।
11जिथुकै हांव तुंआरी भैटिणौ कै बौड़ी इछा कौरु, ताकि हांव तुऔं कुणजै आत्मिक आशीष दियु औरौ तुऔं बिशवाश दै मोजबूत कौरे दियु, 12मैरै बौलणौ का मतलब ऐजा औसौ कै जौल़ौ हांव तोंवारै धोरे ओऊं, तोलो हांव तोंवारै बिशवाश लैई हौंसला पोऊँ औरौ तुऐं मैरै बिशवाश लैई।
13औरौ ओए रै बिशवाशी भाईयों, हांव चोऊं कै तुऐं जाणै पाव कै मोऐं बार-बार तोंवारै धोरे आणौ चोऊ, कै जैशैकै मोऐं ओकी बैगानै यहूदी लोगौ कै यीशु मसीह कै शिक्षा पांदी चालणौ वाल़ै बाणै। तैशैखैई तुऔं मुंजी बै बाणु, पौरौ इबी तौड़ी बै इन्दै रुकावट ही पौड़ै रौए। 14मैरी जुमैवारी सौबी लोगौ कै सुसमाचार शुणाणौ कारिए औसौ, चाहै सै यूनानी भाषा जाणणौ वाल़ै हौंव या ना जाणणौ वाल़ै हौंव, औरौ चाहै सौमझदार हौंव या नासमझ हौंव। 15इथकारिए हांव तुऔं खै बै जू रोम शहर दै रौंव, सुसमाचार शुणाणौ कै बैताब औसौ।
धरमी बिशवाश लैई जिंदा
16जिथुकै मुखै मसीह कै बारै मुंजी सुसमाचार पांदी पूरा भोरोशा औसौ, इथकारिए सुसमाचार शै ही पौरमेशवरे शुरु दा ही बैगानै यहूदी लोगौ का उध्दार कौरा औरौ ऐबै सौबी लोगौ का उध्दार कौरौ। 17जिथुकै सुसमाचार दा पौरमेशवर लोगौ कै आपणै साथै सोही बौणांव औरौ पूरी तरह शै तिथपांदी भोरोशा कौरणा चैंई; जू शुरु शै आखरी तौड़ी बिशवाश पांदी टिकैयौंदा औसौ: जैशै पवित्र शास्त्र दो लैखै राखौ, “सैजा आदमी जू बिशवाश शै धरमी बौणै रौआ सै जियुंदी रौंदा।”
अधरमी पांदी पौरमेशवर का गुस्सा
18पौरमेशवर का गुस्सा तौ स्वर्ग पौरैशा तिनु लोगौ की सौबी बुराई औरौ अधरम कै कामौ पांदी प्रगट हौंव, जू आपणै बुरै कामौ कै दवारा लोगौ खै पौरमेशवर कै बारै मुंजी जाणणौ शै रौकौए। 19इथकारिए लोग आसानी शै पौरमेशवर कै बारै मुंजी सोही तरीकै शै सौमझै सौकौ थिए, जिथुकै पौरमेशवरे आपणै बारै मुंजी साफ-साफ बौताए राए।
20आमै बिना पौरमेशवर कै सौदा कै अनौखी शौकतै औरौ गुणो कै ना दैखै सौकौ। पौरौ इनु बातौ कै पौरमेशवरे दुनिया कै शुरुआत शै, आपणी बाणैयौंदी सौबी चीज़ौ कै दवारा दिखाए राए। इथकारिए तिनु लोगौ कैंई ऐजौ बौलणौ कारिए कुणजाई भाना ना आथी कै सै पौरमेशवर कै ना जाणौ। 21इयौं बौजैह शै कै पौरमेशवर कै जाणणौ पांदी बै तिनुऐ पौरमेशवर कै सैजा आदर ना दी जू तैसका औसौ औरौ धन्यवाद ना कौरी, पौरौ सै बैकार कै बातौ सुंचौए, इथै तौड़ी कै तिनकै मूर्ख विचार सौब गौलत औसौ।
22सैजै लोग आपी कै बुध्दिमान जतायो मूर्ख बौणै गौवै, 23औरौ लोगै हमैशा जियुंदी रौणौवाल़ै पौरमेशवर कै महिमा कै नाश हौणौवाल़ै आदमी दै, चुड़कुल़ै दै, औरौ चौपायों दै, औरौ रेंगणैवाल़ै जन्तुऔ कै मूर्ति दै बौदल़ी दी।
24इयौं बौजैह शै पौरमेशवरे तिनु तिनकै मन कै इछाओं कै हिसाब शै गौंदै काम कौरणौ कारिए छोड़े दियै, कै सै आपी मुंजी बुरै कामौ दै आपणै शोरीर कै बैज्जती कौरौ। 25जिथुकै लोगै पौरमेशवर कै बारै मुंजी सौचाई पांदी बिशवाश कौरणा छोड़े दिया, औरौ तिनुऐ झूठ कै अपनोऊ, औरौ तिनुऐ पौरमेशवर कै बौदलै दुनिया कै आराधना औरौ सेवा कौरे, पौरमेशवर कै महिमा हमैशा हौंदै रौंव। आमीन।
26इथकारिए पौरमेशवरे तिनु शर्मनाक कामौ दै छोड़े दियै, इथै तौड़ी कै तिनकी बैटमाणिशै बै जायज रिशतै कै ओकी बैटमाणिशौ कै साथै नाजायज रिशतै दै बौदलै दियै। 27तैशैखैई मर्द बै बैटमाणिशौ कै साथै जायज रिशतै कै छोड़ेयौ आपी मुंजी कामतुर हौयौ जोल़दै लागै, शर्मनाक काम कौरेयौ सै आपणै शोरीर दै आपणी कौरेयौंदी बुराई कै लायक सौजा पांव।
28जिथुकै तिनुऐ पौरमेशवर कै अपनाणा मूर्खता सौमझै, इथकारिए पौरमेशवरे बै सैजै सौबै बुरै काम कौरणौ कै तिनु तिनकै निकम्मे मन कै हालत दै छोड़े दियै। 29इथकारिए सैजै सौब भान्त कै अधरम, औरौ दुष्टता, औरौ लोभ, औरौ बैर-भाव लैई भोरै गौवै; औरौ डाह, औरौ हत्या, औरौ ज़लन, औरौ छल लैई भोरै गौवै, औरौ चुगलखोर, 30गप्पे लाणौ वाल़ै, नेंदैया कौरणौवाल़ै, पौरमेशवर शै नफरत कौरणौवाल़ै, झोगड़ालु, घमण्डी, तानै मारणौ वाल़ै, बुरी-बुरी बातौ कै बाणणौवाल़ै, माँ-बापू कै आज्ञा ना मानणोवाल़ै, 31नासमझ, बिशवाश तौड़णौ वाल़ै, नफरत कौरणौवाल़ै औरौ दया ना कौरणौवाल़ै हौए गौवै।
32सै तौ पौरमेशवर कै ऐजै नियमौ कै जाणौए कै ऐशणै-ऐशणै काम कौरणौवाल़ै मौत कै सौजा कै लायक औसौ, तौ बै ना सिरफ आपी ही ऐशणै काम कौरौ पौरौ ऐशणै काम कौरणौवाल़ै शै खुशी बै हौंव।
Currently Selected:
रोमियों 1: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
