प्रेरितो कै काम 28
28
माल्टा टापू दा पौलुस का स्वागत
1जोबै आमै सौबै ठीक ढंग शै किनारे पांदी पौंचै गौवै, तोबै आमु पोता चाला कै ऐसी टापू को नांव मैलिते थियु। 2औरौ तिथै कै रौणौवाल़ै लोगै अमारै आछै शै खातिरदारी कौरी; जिथुखै पाणी औरौ जाड़ो लागणौ की बौजैह शै तिनुऐ आग बाल़ेयो अमारा स्वागत कौरा। 3जोबै पौलुसे लाकड़ी का हौंगटा कौठा कौरेयौ आगी पांदी धोरा, तौ ऐक शोंगोऊं सैक लागैयो खै निकल़ु औरौ तैसकै हाथौ पांडो लोपेटियु। 4जोबै तिथै कै रौणौवाल़ै लोगै शोंगोऊं खै तैसकै हाथौ पांदी लोटकेयोंदो दैखौ, तौ आपी मुंजी बौल़ौ, “सौथीखै ऐजा आदमी हथियारा औसौ, बैशक ऐजा आदमी समुन्द्रो पौरैशा बौचै गौआ, तौ बै ऐबै अमारै न्यांव कै देवीए ऐसी जियुंदी ना रौणौ दी।” 5तोबै तैणै शोंगोऊं खै आगी मुंजी बैगाए दियु, औरौ तैसी किछै नुकसान नी होई। 6पौरौ लोगै ठोल़े लो थियु कै सै उशाए जांदा, या एकदम धैनै रिड़यो खै मौरे जांदा, पौरौ जोबै सै बौड़ी बार तौड़ी दैखदै रौवै औरौ दैखौ कै तैसकै किछै बै ना होई, तौ सोंचैयो बौलदै लागै की, “ऐजा तौ कुणिए देवता औसौ।”
7तैसी जौगैह कै नेड़ी-बैड़ी पुबलियुस नांव कै तैसी टापू कै प्रधानों की जोमीन थी: तैणै आमुखै आपणै घोरे नियौ खै ती दूसौ तौड़ी अमारै खातिरदारी कौरे। 8पुबलियुस का बापू तैज तापो लैई औरौ पेचिश लागैयो बीमार पौड़ै रौआ थिया, औरौ पौलुसे तैसकै धोरे कमरे दी जायौ प्रार्थना कौरे, औरौ तैसी पांदी हाथ राखैयौ तैसी ठीक कौरा। 9जोबै ऐशैखै हौं, तौ तैसी टापू कै बाकी बीमार पौलुसो कै धोरे ओऊवे, औरौ ठीक हौए गौवै। 10तिनुऐ अमारा बौहिता आदर कौरा, जोबै आमै ती मीनै कै बाद जाणौ की तैयारी कौरे लोए थी तौ जू किछै आमु कारिए जौरुरी थियु, जहाजो पांदी राखै दियु।
माल्टा टापू शै रोम देश कै ढौबौ
11ती मीनै कै बाद आमु सिकन्दरिया टापू शै जहाजो पांदी यात्रा शुरु कौरे ऐसी जहाजै ऐसी टापू पांदी जाड़ै कै दूस काटी लौवै थिए औरौ इथु जहाजो कै आगलै भाग पांदी दु देवताओं का ऐक निशान थिया, तिनु देवता को नांव दियुसकूरी थियु। 12सुरकूसा शहर दै लंगर पायौ खै आमै तीन दूस टिकयौंदे रौवै। 13तिथैदै आगु जायौ आमै रेगियुम नोगर दै पौऊंचै औरौ ऐकी दूसौ कै बाद दक्षिण बागूर चालै, तोबै दूजै दूसै पुतियुली शहर दै ओऊवे। 14तिथै आमुखै किछै बिशवाशी भाई भैटी, औरौ तिनकै बौलणौ शै आमै तिनकै इथै सात दूसौ तौड़ी रौवै; औरौ ऐशैखैई तिनकै साथै रौणौ कै बाद, पौयदल हांडेयो रोम शहर खै ढौबौ चाल पौड़ै।
15रोम शहर शै किछै बिशवाशी भाईए शुणु कै आमै तिथै आन्दै लागै रौवै औरौ सै आमुआरी भैटिणौ औरौ आमु रोम शहर लौए जाणौ कारिए अप्पियुस नगर कै बाज़ारो औरौ तीन-सराए नगर तौड़ी ओऊवे, जिनु दैखियौ खै पौलुसे पौरमेशवर का धन्यवाद कौरा, औरौ बैजाए हिम्मत बौड़ै। 16जोबै आमै रोम शहर दै पौऊंचै, तौ पौलुसो खै ऐकी सैनिक कै साथै जू तैसकै रोखवाल़ै कौरौ थिया, इकली रौणौ कै आज्ञा भैटी।
पौलुस रोम शहर दा
17ती दूसौ कै बाद तैणै यहूदियों कै सियाणै लोगौ खै बौईदै, औरौ जोबै सै कौठै हुवे तौ तिनुखै बौल़ौ, “ओए रै भाईयों, मोऐं आपणै लोगौ खै या पुराणियो कै भोवारो कै खिलाफ दो किछै बै नी कौरी, तोबै बै कोयदी बोणेयो यरूशलेम शहर शा रोमी सरकार कै हाथै सौंपा गौआ। 18जू मुखै जांचैयौ खै छोड़े दैणा चांव थिए, जिथुखै मुं दा मौत कै लायक कुणजाई दोष ना थी। 19पौरौ जोबै यहूदी नेता इथकै खिलाफ दै बौलदै लागै, तौ मुखै महाराजा (कैसर) शै बिन्ती कौरणै पौड़ै; ऐजौ नी कै मुखै आपणै लोगौ पांदी किछै दोष लाणा थिया। 20इथकारिए मोऐं तुऔं खै बोएदै राए, कै तुंआरी भैटिंयु औरौ बातचीत कौरु; जिथुकै इस्राएल देश कै आशा कारिए जू की मसीह औसौ इयौं शांगुल़ी लैई जोकड़ेयौंदा औसौ।” 21तिनुऐ तैसीखै बुलू, “ना आमुए तैरै बारै मुंजी यहूदिया प्रदेश कै लोगौ शै चिट्ठियां पैई, औरौ ना अमारै लोगौ मुंजीदै कोसीए आयौ खै तैरै बारै मुंजी किछै बौतौऊं औरौ ना बुरु बुली। 22पौरौ तैरा विचार का औसौ? ऐजौ आमै तुंवादौ शुणणौ चोऊं, जिथुकै आमु जाणुए कै हरेक जौगैह ऐसी मतो कै खिलाफ दी बातौ हौं।”
23तोबै तिनु यहूदी लोगै पौलुस कै साथै ऐक दूस राखौ, औरौ बौहितै लोग तैसकै इथै कौठै होवे, औरौ सै पौरमेशवर कै राज्य कै गवाही दैन्दा रौआ, औरौ मूसा कै कानून औरौ पौरमेशवर कै बातौ बौताणौवाल़ै कै किताबो पौरैशौ यीशु कै बारै मुंजी सौमझाए-सौमझायौ झीशो शै बैल़खै तौड़ी बौतांदा रौआ। 24तोबै किछै लोगै पौलुस की बातौ पांदी बिशवाश कौरा औरौ किछै लोगै बिशवाश नी कौरी। 25जोबै सै आपी मुंजी ऐक मत ना होई, तौ पौलुस कै इयौं ऐकी बातौ कै बौलणौ पांदी हौटै गौवै, “पवित्र आत्माए यशायाह पौरमेशवर कै बातौ बौताणौवाल़ै कै दवारा तोंवारै पुराणिया शै ठीक ही बौल़ौ, 26‘जायौ खै इनु लोगौ खै बौल, सै दैखौ तौ औसौए, पौरौ तिनकै किछै दैखियौं ना, औरौ सै शुणौ तौ औसौए पौरौ किछै बै ना सौमझौ;
27जिथुकै इनु लोगौ कै मन काठै,
औरौ तिनकै कान भारी हौए गौवै,
औरौ तिनुऐ आपणी आखी बन्द कौरे रैई,
ऐशै नी हौं कै सैजै कौलोंई आखी लैई दैखौ,
औरौ कानो लैई शुणौ
औरौ मनो शै सौमझौ औरौ फिरो औरौ हांव तिनुखै ठीक कौरु।’
28इथकारिए तुऐं जाणै पाव, कै पौरमेशवर कै ऐजै उध्दार कै कथा बैगानै यहूदी लोगौ कै धोरे भैजै राए, औरौ सै अपनांदै।” 29जोबै तैणै ऐजौ बौल़ौ तौ यहूदी लोग आपी मुंजी बैहस कौरदै लागै औरौ सै तिथैदै हौटै गौवै।
30औरौ पौलुस पूरै दो साल तौड़ी आपणै किराए कै घोरो दा रौआ। औरौ जू तैसकै धोरे आंव थिए, तिनु सौबीआरी भैटिंदा रौआ। 31औरौ बिना रौक-टोक औरौ बौहिता निडर हौयौ खै पौरमेशवर कै राज्य का प्रचार कौरदा औरौ प्रभु यीशु मसीह की बातौ शिखांदा रौआ।
Currently Selected:
प्रेरितो कै काम 28: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
