रोमियों 2
2
पौरमेशवर का न्याय
1इथकारिए, ओए रै ओकी पांदी दोष लाणौ वाल़ै! तुऐं चाहै कुणिए बै काए नी हौंव, भाना ना बाणै सौकौ। जियौं बातौ दा तुऐं ओकी पांदी दोष लांव, तियौंई बातौ दा आपी कै बै दोषी बाणौ, जिथुकै तुऐं, जू ओकी पांदी दोष लांव, आपी बै सैजैई काम कौरौ। 2औरौ आमै जाणुए कै पौरमेशवर सोही न्याय कौरौ। इथकारिए सै ऐशणै बुरै काम कौरणौवाल़ै लोगौ कै जौरुर सौजा दैंदा।
3तू जू ऐशणै-ऐशणै काम कौरणौवाल़ै पांदी दोष लांए, औरौ आपी बै सैजैई काम कौरे; तू का ऐजौ सौमझै कै पौरमेशवर कै सौजा शै बौचै जांदा? 4का तू पौरमेशवर कै भोलाए, औरौ सहनशीलता, औरौ सब्ररुपी धन कै बैकार जाणै? औरौ का ऐजौ ना सौमझै कै पौरमेशवर कै भोलाए ताखै पाप छोड़ेयौ मन फिराणौ कै शिखांव?
5पौरौ जिथुकै तुऐं जिद्दी औसौ औरौ पश्चाताप कौरणौ शै मना कौरौ, इथकारिए पौरमेशवर तुऔं कड़ी सौजा दैन्दा। जिथुकै सैजौ दूस आन्दौ लागै रौ, जौल़ौ पौरमेशवर आपणा गुस्सा दिखाला औरौ आपणा साचा न्याय प्रगट कौरला। 6पौरमेशवर हर आदमी कै तैसकै कामौ कै हिसाब शै बौदला दैंदा। 7जू लोग सब्र कै साथै भौलाए कौरदै बैई महिमा, इज्जत औरौ सौदा कै जिन्दगी कै खोज़ दै लागैयौंदे रौंव, पौरमेशवर तिनु सौदा कै जिन्दगी दैंदा। 8पौरौ जू मतलबी औसौ औरौ सौचाई कै ना मानौ, यानी जू बुराई कौरणी चांव, तिनु पांदी पौरमेशवर बैजाए गुस्सा कौरदा। 9औरौ कौल़ेश औरौ मुसीबत हरेक आदमी पांदी जू बुरु कौरौ आन्दै, चाहै सै कुणिए बै काए नी हौंव, आगै यहूदी लोगौ पांदी औरौ तोबै सैजै जू यहूदी ना आथी।
10पौरौ महिमा औरौ आदर औरौ शान्तै हरेक आदमी कै भैटदी, जू भला कौरौ, पौरमेशवर सौबीदै आगै यहूदी लोगौ खै दैंदा औरौ तोबै तिनुकै जू बैगानै यहूदी औसौ। 11जिथुकै पौरमेशवर सौबी लोगौ का न्याय ऐकैई तरीकै शै कौरौ।
12इथकारिए बैगानै यहूदी लोग जिनुकैईं मूसा कै कानून ना आथी, सै बिना कानून कै पौरमेशवर शै सौजा पांदै, औरौ यहूदी लोग, जिनुवै मूसा कै कानून पायौ पाप कौरा, तिनकी सौजा मूसा कै कानून कै हिसाब शै हौन्दी; 13जिथुकै पौरमेशवर कै नोज़रो दै धरमी सैजै ना आथी जू मूसा कै कानून कै शुणणौवाल़ै औसौ पौरौ धरमी सैजै औसौ, जू मूसा कै कानून का पालन कौरणौवाल़ै औसौ। 14तोबै बै जोबै बैगानै यहूदी लोग जिनुकैईं मूसा कै कानून ना आथी, स्वभाव ही शै मूसा कै कानून दै पाए जाणौवाल़ै कामौ मुंजीदै किछै कामौ कै कौरौए, तौ ऐजै मूसा कै कानून तिनुकैईं ना हौणौ शै बै सैजै लोग साबित कौरौ कै तिनुकैईं आपणै मनो दै मूसा कै कानून औसौ। 15सैजै लोग दिखांव कै पौरमेशवर शै दैययौंदे मूसा कै कानून तिनकै दिलो दै लैखै राए, जिथुकै तिनका आपणा विवेक दिखांव कै तिनकै विचार या तौ तिनु पांदी दोष लांव या तिनुकै निर्दोष बौतांव। 16ऐजौ तैसी दूसै हौंदौ जौल़ौ पौरमेशवर ऐसी सुसमाचार जैसका हांव प्रचार कौरु यीशु मसीह कै दवारा आदमियों कै गुप्त बातौ का न्याय कौरदा।
17जिथुकै तू आपी कै यहूदी आदमी बौल़ै, औरौ मूसा कै कानून पांदी भोरोशा राखै, औरौ घमण्ड कौरे कै तू पौरमेशवर का खास आदमी औसौ। 18तुऔं पौरमेशवर कै इछा पौता औसौ, तुऐं अच्छाई कै साथै औसौ जिथुकै तुऔं इथकै बारै मुंजी मूसा कै कानून दो शिखाए राए; 19तुऔं यकीन औसौ कै तुऐं ऐशणै लोग औसौ, जू आन्धै कै सोही बाट दिखांव, इनारै दै रौणौवाल़ै कारिए पेयाशो औसौ, 20नासमझ कै शिखाणौ वाल़ै औसौ, औरौ नानड़िया कै उपदैशक औसौ। जिथुकै तुऔं कैई मूसा कै कानून औसौ तुऐं सौमझौ कै तुऐं सौबै ठुँ पूरु-पूरु जाणौए औरौ जू किछै तुऐं बौल़ौए सै एकदम साचौ औसौ।
21इथकारिए तुऐं, जू ओकी कै शिक्षा दैंव, आपी कै शिक्षा किथु ना दैंव? तुऐं प्रचार कौरौ, “चोरी नी कौरेया,” औरौ आपी चोरी कौरौ। 22तुऐं बौल़ौए, “गौलत सौमबंध नी बाणैया,” औरौ आपी गौलत सौमबंध बाणौ? तुऐं मूर्ति शै नफरत कौरौ, औरौ का आपी ही मन्दिर कै लुटौए?
23तुऔं कैई मूसा कै कानून हौणौ का घमण्ड औसौ, औरौ मूसा कै कानून तौड़ेयो का तुऐं पौरमेशवर का अनादर कौरौ? 24इयौं बौजैह शै पवित्र शास्त्र दो ऐजौ लैखै राखौ, “तुऔं यहूदी लोगौ कै बुरै कामौ की बौजैह शै बैगानै यहूदी लोग पौरमेशवर कै नांव कै नेंदैया कौरौ।”
खतने का फायदा ना हौणा
25हांव ताखै किछै बौलणौ चोऊं। तैरै खतना कौरवाणौ कै कीमत सिरफ तोबै ही औसौ जौल़ौ तू मूसा कै कानून कै मानै। पौरौ जै तू सैजौ ना कौरे जू मूसा कै कानून बौल़ौ, तौ तुऐं खतना कौरेयौंदे यहूदी लोग तिनु लोगौ कै जैशणै ही औसौ जू यहूदी लोग ना आथी औरौ जिनका खतना ना हौए रैई। 26तौ जै बिना खतना कै आदमी मूसा कै कानून कै नियमौ का पालन कौरौ, तौ पौरमेशवर तैसी आदमी कै ऐशणा दैखौ जैसका खतना हौए रौआ। 27औरौ जू आदमी शारीरिक रुप शै बिना खतना रौआ जै सै मूसा कै कानून का पालन कौरौ, तौ का तांव कैंई जू मूसा का कानून औसौ औरौ खतना कौरणौ कै बाद बै तू इथका पालन ना कौरे, तौ सै ताखै दोषी ना ठौहरांदा?
28जिथुकै ऐजौ ऐशै ना आथी कै तू यहूदी पौयदा हौए रौआ औरौ तोंवारा खतना हौए रौआ, सै तुऔं साचा यहूदी बाणौ। 29ऐक साचा यहूदी आदमी सैजा औसौ जैसका मन पौरमेशवर कै साथै सोही औसौ। औरौ साचा खतना सिरफ मूसा कै कानून का पालन कौरणा ना आथी; पौरौ, ऐजा मन का बदलाव औसौ, जू पौरमेशवर कै आत्मा कै दवारा हौंव। ऐशणा आदमी लोगौ शै नी, पौरौ पौरमेशवर शै तारीफ पांव।
Currently Selected:
रोमियों 2: SRXNT
Highlight
Share
Compare
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
