तीतुस 3
3
विश्वासिया केरा चाल-चलन
1विश्वासियनि याद करा कि राजैरा जां अधिकारिया केरा आदर करा जां तेन्हैरी आज्ञा मना जां होरनियां केरै तेईनी अच्छै कंम कांनेरै तेईनी तियार बेशा, 2कोसेरी बि बुराई मेईं करा, ना झगड़ा करा; पण होरनियां केरै तेईनी दया लुहाआ, जां सभनियांं सिंउ विनम्र भौ-करि बेशा। 3केईनी कि असै बि पेहिलै टैंमा मझ मूर्ख जां परमेश्वरेरी आज्ञा ना मनणार जां धोखै मझ पियौरै मैहणु थ्यै। असै गुलामा सैयि थ्यै, जै बुरै कंम कांने बाईया ईच्छाईया केरै वंशा मझ थ्यै, जैन्हां करि-करि असु आनन्द मेईंथ्या। असै अपड़ा टैंम बुरै तरीकै सिंउ बर्ताव कांना मझ जां होरनियां मैहणुवां सिंउ जलन कांना मझ गुजारी दिईंथ्यै। हर कोई असु सिंउ नफरत करींथ्या जां असै बि तैन्हांं सिंउ नफरत करींथ्यै। 4पण तांबि असेड़ै उद्धार कांने बाऐ परमेश्वरै असु मैहणुवां केरै तेईनी अपड़ि दया जां प्रेम लुहाआ, 5तेनी असै असेड़ै पापा केरी सजाय किना बचाय जां ऐ धार्मिक कंमा केरी वजहि ला ना, पण सै असु पन दया करींथ्या। परमेश्वरै असुनि नवाँ जीवन दित्ता। तेनी असेड़ै पाप असु किना दूर कियै जां असै ऐठणीरै काबिल बंणाय कि असै एकि नवें तरीकै सिंउ व्यवहार कांना शुरू करिया। तेनी अपड़ा पवित्र आत्मा असु अंदर रखि करि ऐहीं कियु। 6परमेश्वरै खुलै-दिलै सिंउ असुनि पवित्र आत्मा दितौरा कि असु अंदर शक्तिशाली तरीकै सिंउ कंम करिया, केईनी कि यीशु मसीह असेड़ै पापा केरै तेईनी मरा ताकि असैड़ा उद्धारकर्ता बंणी सकिया। 7तेनी ऐतियु ऐठणीरै तेईनी कियु ताकि अपड़ै अनुग्रह ला सै असुनि ऐपु सिंउ सही ठहराय सकिया जां असै तेसैरी आउलाद बंणी सकिया जां तस्सली सिंउ अनन्त काल तेईनी तैस सिंउ बेशणैरी आशा रखि सकिया।
8ऐ गल सच्ची आ, जै मीं ऐम्हीं तुहांनि शुणाय जां आंउ चांहथा कि तु ऐन्हां गला मजबूती सिंउ विश्वासियनि शिख्रा। ऐठणीरै तेईनी जैन्हैं परमेश्वरा पन विश्वास क्यौरा, सैक्यै अच्छै कंम कांनेरै तेईनी अपड़ा दिमाक लगातार व्यस्त रखिया। ऐ गलै सभनियां केरै तेईनी अच्छी अत्ति जां फायदेमन्द अत्ति। 9पण मूर्खा केरी बहसी किना दूर रेय्ही जां अपड़ै पूर्वजा केरिया बडी-बडिया गला पन टैंम बर्बाद मेईं करा। बैर, विरोध जां तैन्हांं झगड़ा किना, जै मूसेरी व्यवस्थाईरै बारै मझ भुईया तैन्हांं किना दूर रिय्हा, केईनी कि तैन्हांं गला केरा कोई फायदा ना जां सै गलै कोसेरी मजत ना काति। 10ताउ कम-सै-कम दो बारी तैन्हांं मैहणुवंनी चेतावनी दींणी चेहिंथी, जै विश्वासिया केरी मंडली मझ फूट पेईदा कातै, कि सै ऐहीं कांनु बन्द करि दिया। ऐत किना बाद, तैन्हांं किना दूर रींहणु चेहिंथु। 11तुवे ऐ पक्का जांणि ल्या कि ऐतिया मैहणु जै हैरी-बुझि करि पाप काता, तेसेरै अपड़ै कंम साबित कातै कि सै दोषी आ।
लाष्ट हुक्म जां नमस्कार
12जेख्णी मूं ताउ किनि क्रेते टापु पन अरतिमास जां तुखिकुस भेईजणै, ता मूं किनि तु नीकुपुलिस शहरा मझ ऐईंणैरी पूरी कोशिश करै; केईनी कि मीं तैठिऐ सर्दिरै मौसमा मझ बेशणैरी सोचोरी आ। 13जेख्णी जेनास व्यवस्थापक जां अपुल्लोस अपड़ि यात्राय पन चलि पियै, ता तेन्हैरी मजतिरै तेईनी जै किछ तिंडै बोलै भूंतु सै तु करै। ऐ ध्यान रखै कि तैन्हांं यात्राय मझ कोस बि चीजैरी कमि ना भुईया। 14सिर्फ यौतुवै ना पण ताउ विश्वासियनि शिख्रांतै रींहणु चेहिंथु कि भलै कंम कांनेरै तेईनी लगातार मैहनत कातै रिय्हा, ताकि तैन्हांं मैहणुवां केरी जरूरत पूरी करि सकिया जैन्हां किनि सै सभ ना जैन्हैरी तैन्हांं जरूरत आ। ऐहीं कांने ला विश्वासिया केरी मजत कांनी कि सैक्यै एकि मकसदै सिंउ जीवन जी सकिया।
15मूं सेईतै ऐठणीरै सारै विश्वासी ताउनि नमस्कार कातै अत्तै। तैठि क्रेते मझ असेड़ै साउगी विश्वासियनि जै असु सिंउ प्रेम कातै, नमस्ते करै।
आंउ प्रार्थना काता कि प्रभु तुहां सभनियांं पन अनुग्रह करिया।
Currently Selected:
तीतुस 3: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
