Popular Bible Verses from तीतुस 3

Share

पण तांबि असेड़ै उद्धार कांने बाऐ परमेश्वरै असु मैहणुवां केरै तेईनी अपड़ि दया जां प्रेम लुहाआ, तेनी असै असेड़ै पापा केरी सजाय किना बचाय जां ऐ धार्मिक कंमा केरी वजहि ला ना, पण सै असु पन दया करींथ्या। परमेश्वरै असुनि नवाँ जीवन दित्ता। तेनी असेड़ै पाप असु किना दूर कियै जां असै ऐठणीरै काबिल बंणाय कि असै एकि नवें तरीकै सिंउ व्यवहार कांना शुरू करिया। तेनी अपड़ा पवित्र आत्मा असु अंदर रखि करि ऐहीं कियु। परमेश्वरै खुलै-दिलै सिंउ असुनि पवित्र आत्मा दितौरा कि असु अंदर शक्तिशाली तरीकै सिंउ कंम करिया, केईनी कि यीशु मसीह असेड़ै पापा केरै तेईनी मरा ताकि असैड़ा उद्धारकर्ता बंणी सकिया। तेनी ऐतियु ऐठणीरै तेईनी कियु ताकि अपड़ै अनुग्रह ला सै असुनि ऐपु सिंउ सही ठहराय सकिया जां असै तेसैरी आउलाद बंणी सकिया जां तस्सली सिंउ अनन्त काल तेईनी तैस सिंउ बेशणैरी आशा रखि सकिया।

विश्वासियनि याद करा कि राजैरा जां अधिकारिया केरा आदर करा जां तेन्हैरी आज्ञा मना जां होरनियां केरै तेईनी अच्छै कंम कांनेरै तेईनी तियार बेशा, कोसेरी बि बुराई मेईं करा, ना झगड़ा करा; पण होरनियां केरै तेईनी दया लुहाआ, जां सभनियांं सिंउ विनम्र भौ-करि बेशा।

पण मूर्खा केरी बहसी किना दूर रेय्ही जां अपड़ै पूर्वजा केरिया बडी-बडिया गला पन टैंम बर्बाद मेईं करा। बैर, विरोध जां तैन्हांं झगड़ा किना, जै मूसेरी व्यवस्थाईरै बारै मझ भुईया तैन्हांं किना दूर रिय्हा, केईनी कि तैन्हांं गला केरा कोई फायदा ना जां सै गलै कोसेरी मजत ना काति।

ताउ कम-सै-कम दो बारी तैन्हांं मैहणुवंनी चेतावनी दींणी चेहिंथी, जै विश्वासिया केरी मंडली मझ फूट पेईदा कातै, कि सै ऐहीं कांनु बन्द करि दिया। ऐत किना बाद, तैन्हांं किना दूर रींहणु चेहिंथु।