फिलेमोन 1
1
नमस्कार
1आंउ पौलुस ऐ चिट्ठी लिखता जां अबै आंउ जैल्ही मझ आ, केईनी कि आंउ प्रभु यीशु मसीहरै बारै मझ प्रचार काता। हे फिलेमोन! असेड़ै विश्वासी भाई तीमुथियुस जां मिंडी तरफ सिंउ ताउनि नमस्कार। तु असैड़ा विश्वासी भाई आ जां तु मसीहरै तेईनी तेतिया कम काता जिहीं असै कातै। 2जां अपड़ि विश्वासी भींणी अफ्फिया जां असेड़ै विश्वासी भाई अरखिप्पुस जै एकि सिपाहि सैयि परमेश्वरेरी सेवा कातै जां तैस कलीसियैनि बि लिखता जै तुवाड़ै घरा मझ किट्ठी भूंती। 3आंउ प्रार्थना काता कि असेड़ै पिता परमेश्वर जां प्रभु यीशु मसीह तुहां पन अनुग्रह करिया जां तुहांनि शांति मेईया।
फिलेमोनेरा प्रेम जां विश्वास
4हे फिलेमोन, आंउ जेख्णी बि तिंडै तेईनी प्रार्थना काता, आंउ हमेशा तिंडै तेईनी परमेश्वरैरा धन्यवाद काता। 5केईनी कि आंउ प्रभु यीशु मसीह मझ तिंडै विश्वासेरै बारै मझ जां परमेश्वरेरै सभनियांं मैहणुवां केरै तेईनी तिंडै प्रेमेरै बारै मझ शुणता रींहथा। 6आंउ प्रार्थना काता कि विश्वासिया सिंउ तिंडि जै संगती आ, सै बधती गहिया। तैन्हांं सभनियांं बधिया चीजा जांणनेरै जरियै जै परमेश्वरै असुनि दितोरी अत्ति। ऐ सभ मसीहरी महिमायरै तेईनी भुईया। 7केईनी कि हे मिंडै विश्वासी भाई! आंउ बड़ा खुश जां आनंदित भूंता जेख्णी होरनियां सिंउ तिंडा प्रेम तकांता, ऐठणीरै तेईनी तिंडै जरियै परमेश्वरेरै मैहणु हरै-भरै भौ गियोरै अत्तै।
उनेसिमुसेरै तेईनी प्रार्थना
8-9आंउ ताउनि ऐ गल बोलता, जै तांउ कांनु चेहिंथु। आंउ तैस अधिकारैरा इस्तेमाल करि सकता जै मसीह मूंनी दितौरा ताकि ताउनि ऐस कांनेरी आज्ञा दियुं, पण मूं ऐहीं ना कांनु। ऐठणिरी वजाय, आंउ ताउनि सिर्फ ऐ कांनेरै तेईनी बोलता; केईनी कि असै योकिया सिंउ जां परमेश्वरैरा मैहणुवां सिंउ प्रेम कातै। आंउ पौलुस ताउ सिंउ अक विजुर्ग भूंणेरै नातै बोलता, जै ऐम्हीं केईदी ऐ आ, केईनी कि आंउ यीशु मसीहरी सेवा काता। 10आंउ उनेसिमुसेरै तेईनी प्रार्थना काता, जै मिंडै तेईनी पुत्रा सैयि आ। जेख्णी आंउ केईदी मझ थ्या ता सै मसीह मझ मिंडा पुत्र बंणी गियौरा थ्या। 11सै पेहिलै तिंडै कोस कंमैरा ना थ्या, पण अबै तिंडै जां मिंडै तेईनी मतलब असु दोईयो केरै तेईनी बड़ै कंमैरा आ।
12हलाँकि आंउ उनेसिमुसा सिंउ बड़ा प्रेम काता, फिरी बि आंउ तैस ताउ किनि वापस भेईजता। 13आंउ तैस अपड़ि मजत कांनेरै तेईनी ऐठियै रखणा चांहथा थ्या, केईनी कि खुशखबरिरा प्रचार कांनेरी वजहि सिंउ आंउ जैल्ही मझ आ। सै ऐठि मिंडी मजत कांनेरै तेईनी तिंडि जगा लै सकींथ्या, केईनी कि मूं पता कि तु मिंडी मजत कांना चांहथा। 14अगर तु सहमत ना ता आंउ तैस ऐपु किनि ऐड़ि ना रखणा चांहथा। आंउ चांहथा कि तु ऐ मजत ऐठणीरै तेईनी करिया केईनी कि तु ऐस खुश भौ करि कांना चांहथा, ऐठणीरै तेईनी ना कि मीं ऐहीं कांनेरै तेईनी तु मजबूर केया। 15भौ सकतु ऐहै वजह थी कि परमेश्वरै उनेसिमुसनि थोड़े टैंमेरै तेईनी ताउ किना दूर नशि गांहणैरी अनुमति दित्ती, ताकि सै मसीह पन विश्वास करि सकिया जां तु तैस हमेशा तेईनी ऐपु किनि रखि सकिया। 16पण सिर्फ सै तिंडा दास ऐ ना भूंणा, पण एकि दासा किना बधि करि आ, केईनी कि अबै सै तिंडा प्यारा विश्वासी भाई आ। आंउ तेसनी बड़ा प्रेम काता, पण ताउ तैस सिंउ हौरा बि जादा प्रेम कांना चेहिंथा, केईनी कि सै तिंडा दास आ जां प्रभु मझ तिंडा विश्वासी भाई बि आ।
17जेख्णी उनेसिमुसा ताउ किनि वापस ऐईंणु ता तैस सिंउ तेसै खुशी सेईतै बर्ताव करै जिहीं तु मिंडा स्वागत काता। 18अगर ताउनि ऐनि ला कोई नुकसान भौरा या अगर सै कोस बि चीजिरै तेईनी तिंडा कर्जदार आ ता मूं सै ताउनि चुका दींणा। 19आंउ पौलुस ऐ चिट्ठी अपड़ै हत्थै ला लिखता, कि आंउ ऐस कर्जे चुका दैला; हलाँकि आंउ ऐस गलै बोलि सकता कि ज्योता उनेसिमुस तिंडा कर्जदार आ, तैस किना जादा तु मिंडा कर्जदार आ, केईनी कि ऐ मिंडै जरियै ताउनि मसीहरै बारै मझ शुणांणैरा नतीजा थ्या कि परमेश्वरै तु बचा ल्या। 20हे प्रिय मित्र, ऐक्या आंनद मूंनी प्रभु मझ तिंडि तरफ सिंउ मेईया, एकि विश्वासी भाई सैयि ऐतियु करि करि मूंनी होंसला दै। 21मीं ताउनि ऐ चिट्ठी ऐठणीरै तेईनी लिखोरी आ, केईनी कि मूं विश्वास आ कि ताउ सै कांनु जै कांननी आंउ ताउ सिंउ विनती काता। 22जां अक गल ऐ आ कि मिंडै बेशणेरै तेईनी अपड़ै घरा मझ अक कमरा तियार कर; केईनी कि मूं आशा कि परमेश्वरा तिंडि प्रार्थनाय शुणि करि जुबाव दींणा (मैहणुवां किना आंउ केईदी किना रिहा कांना) जां मूंनी अईछी करि तांउ फिरी तकांणा दैला।
अन्तिम नमस्कार
23इपफ्रास, जै यीशु मसीहरा प्रचार कांनेरी वजहि ला मूं सेईतै केईदी मझ आ, ताउनि नमस्कार काता। 24जां मरकुस जां अरिस्तर्खुस जां देमास जां लूका जै मूं सेईतै प्रभुरा कम कातै, ऐन्हां सभनियांं केरी तरफ सिंउ ताउनि नमस्कार कातै अत्तै। 25आंउ प्रार्थना काता कि प्रभु यीशु मसीहरा अनुग्रह तुहां पनि बंणी रिय्हा। आमीन।
Currently Selected:
फिलेमोन 1: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
