तीतुस 2
2
चाल-चलन ठीक रखणेरै तेईनी खरी शिक्षा
1पण तीतुस तु विश्वासियनि सैहै गलै शिख्रा जै सच्ची शिक्षा आ। 2कलीसियेरै जै वुजुर्ग अत्तै, तैन्हांं ऐपु पन काबु रखणा चेहिंथा जां ऐहीं चारै बर्ताव कांना चेहिंथा कि मैहणु तेन्हैरा आदर करिया जां तैन्हांं समझदार भूंणु चेहिंथु। तैन्हांं परमेश्वरा पन मजबूती सिंउ विश्वास कांना चेहिंथा। तैन्हांं होरनियां मैहणुवंनी सच्चै दिल सिंउ प्रेम कांना चेहिंथा जां सहनशील भूंणै चेहिंथै। 3ऐहियें-चारै बुढ़ी जनेनी बि तैन्हांं जनेनियां सैयि बर्ताव करिया जै परमेश्वरेरी भक्तिरा जीवन जींति भुईया। सै बुरू बोलणै बाई जां पियक्कड़ ना भुईया; पण खरी गलै शिख्रांणार भुईया। 4ताकि सै अक अच्छा उदाहरण बंणिया जां जुवान जनेनियांनि सलाह दींणै लायक भुईया, कि तैन्हांं अपड़ै लाड़ै जां बच्चा सिंउ किहीं प्रेम कांना चेहिंथा; 5जां समझदारी सिंउ कंम कांनार भूंणी चेहिंथी, अपड़ा केरै प्रति वफादार भुईया, परिवारैरी देख-भाल कांनार भुईया, होरनियां केरै तेईनी दया कांनार भुईया, अपड़ै-अपड़ै लाड़ा केरी गल मंनणार भुईया, ताकि कोई बि परमेश्वरेरी खुशखबरिरै बारै मझ निंदा ना करि सकिया।
6ऐहियें-चारै जुवान मड़दनी बि समझदारी सिंउ बर्ताव कांनेरै तेईनी विनती कर। 7ताउ हर गलै मझ अच्छै कंम करि-करि उदाहरण पेश कांना चेहिंथा, जेसैरा होरै हमेशा पालन करि सकिया। जेख्णी तु विश्वासियनि परमेश्वरेरै बारै मझ शिख्रांता, ता ताउ अच्छै मकसदै सिंउ शिख्रांणु चेहिंथु कि मैहणु तिंडा आदर करिया। 8जां सै शिख्रा जै सच्च आ जां जेठणीरी कोई निंदा ना करि सकिया, ताकि तिंडै दुशमण शर्मिन्दा भुईया, केईनी कि किछ बि ऐतियु बुरू ना भूंणु, जै असेड़ै विरोधा मझ बोलि सकिया।
9जै विश्वासी दास आ, तैन्हांं शिख्रा कि सैक्यै सै सभ-किछ करिया, जै तेन्हैरै मालिक तैन्हांंनि कांननी बोलतै। तेन्हांनि शुणां कि सैक्यै हर गलै मझ अपड़ै मालिका खुश कांनेरी कोशिश करिया जां तैन्हांं सिंउ झगड़ा ना करिया। 10जां चोरी, चलाकि ना करिया; पण ऐ साबित करिया कि सै सदा ईमानदार अत्तै। ताकि मैहणु तेन्हैरै अच्छै वर्तावा पन ध्यान दिया जां जै किछ बि सै कातै, सै मैहणुवां केरै जरियै असेड़ै उद्धारकर्ता परमेश्वरेरै बारै मझ खुशखबरी शुणाणैरी वजह बंणिया।
11विश्वासियनि ऐहीं-चारै शिख्रा, केईनी कि परमेश्वरै सारा मैहणुवंनी पापा किना बचांणेरी बत्त लुहाय करि अपड़ा अनुग्रह प्रकट क्यौरा। 12परमेश्वर अपड़ै अनुग्रहरी वजहि ला असुनि शिख्रांता ताकि तेतियै बर्ताव कांने बंद करिया, जै परमेश्वरा खुश ना कातै जां तैन्हांं चीजा केरा लालच ना करिया, जेन्हैरी ईच्छा अविश्वासी मैहणु कातै जां जेख्णी कि असै ऐम्हीं इस संसारा मझ अत्तै, ता समझदारी सिंउ जां धार्मिकता सिंउ ऐतियै कंम करिया, जै परमेश्वरा खुश कातै। 13असै ऐनि हिसाबै बर्ताव कातै अत्तै जां उम्मीद सिंउ तेसै अदभुत धियाड़िरा इन्तजार कातै अत्तै, जेसैरी असु आशा आ; जां तैस धियाड़िरा जेख्णी यीशु मसीह, जै असैड़ा महान परमेश्वर जां असैड़ा उद्धार कांनारा, तैस अपड़ि सारी महिमा सिंउ धरती पन वापस ऐईंणु। 14ऐनि यीशु मसीह अपांणा असेड़ै तेईनी बलिदान करि दित्ता ताकि असु सभनियांं पापा किना बचाईया जां पवित्र बंणा सकिया, ताकि असै तेसेरै अपड़ै बड़ै खास मैहणु बंणी गहिया, जै भलै कंम कांनेरै तेईनी पूरी तरह सिंउ तेसेरै हवालै करि दिया।
15ऐठणीरै तेईनी, हे तीतुस आंउ चांहथा कि तु क्रेते टापुरै विश्वासियनि ऐ गलै शिख्रा, जै मीं ताउनि शुणाउरी अत्ति। अपड़ै मैहणुवंनी तैन्हांं गला कांनेरै तेईनी हिम्मत दै, जेठि जरूरी आ, तैठि तैन्हांं मझ सुधार कर। ताउनि ऐहीं कांनेरा पूरा अधिकार आ। ध्यान रख कि जै किछ बि तु शिख्रांता, तेत मझ कोई बि ताउ अनदेखा ना करिया।
Currently Selected:
तीतुस 2: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
