तीतुस 1
1
नमस्कार
1ऐ चिट्ठी पौलुसेरी तरफ सिंउ आ। आंउ परमेश्वरैरा सेवक जां यीशु मसीहरा खास चैला आ। आंउ परमेश्वरेरै चुणौरा मैहणुवां केरा विश्वास मजबूत कांननी जां यीशु मसीहरी सच्ची शिक्षाईया जांणना मझ मजत कांनेरै तेईनी नियुक्त क्यौरा, ताकि सै ऐतिया जीवन जिआ जै परमेश्वरा खुश करिया। 2ऐठणीरी वजह ऐ आ कि सैक्यै परमेश्वरा सिंउ हमेशा बेशणेरै तेईनी आशा कातै अत्तै, केईनी कि परमेश्वर जै कदि झूठ ना बोलता, तेनी संसार बंणाणा किना पेहिलै वायदा क्यौरा थ्या कि तेसेरै मैहणु अनन्त काल तेईनी जींतै रींहणै। 3जां अबै ठीक टैंमा पन परमेश्वरै ऐकेई खुशखबरी असु पन प्रकट की जां असै ऐठणीरा प्रचार सभनियांं मैहणुवां मझ कातै। परमेश्वरै असेड़ै उद्धार कांनारै ऐ आज्ञा दी करि मूंनी जिम्मैवारी दितोरी आ कि आंउ तेसेरै तेईनी कंम करूं।
4तीतुस आंउ ऐ चिट्ठी ताउनि लिखता जां तु मिंडै तेईनी पुत्रा समान आ; केईनी कि असै दोईयो यीशु मसीह पन विश्वास कातै। आंउ प्रार्थना काता कि पिता परमेश्वर जां असैड़ा उद्धार कांनार यीशु मसीह ताउनि अनुग्रह जां शांति दींता रिय्हा।
क्रेते टापु मझ तीतुसेरा कंम
5आंउ ऐठणीरै तेईनी ताउ क्रेते टापु मझ छडि यौउरा थ्या ताकि तु बाकि कंम सुधारी सकिया, जां मिंडी आज्ञायरै अनुसार क्रेतेरै हर नगरा मझ अगुवे नियुक्त करिया। 6अक अगुवा निर्दोष जां ऐकि ऐ जनेनिरा लाड़ा भूंणा चेहिंथा, तेन्हैरै बच्चै विश्वासी भूंणै चेहिंथै, ताकि कौ तैन्हांं पन इल्जाम ना ला सकिया कि सै बेकाबु अत्तै जां हुक्म ना मनतै। 7केईनी कि कलीसियेरा अगुवा परमेश्वरैरा भण्डारी भूंणेरी वजहि ला निर्दोष भूंणा चेहिंथा; सै ना हठीला, ना गुस्सा कांनार, ना पियक्कड़, ना मारपीट कांनार जां ना नीच कमाईरा लालची भुईया। 8पण सैक्या मेहमाना केरा आदर कांनार, भलै कंंम कांनार, अपड़ि भावनांए काबु कांनार, धर्मी, पवित्र जां अनुशासनै वा भूंणा चेहिंथा। 9तैस यीशु मसीहरी विश्वासयोग्य खुशखबरी पन मजबूती सिंउ विश्वास कांना चेहिंथा, जै असै तेसनी शिख्राउरू आ। ताकि सै होरनियांनि सही शिक्षा दींणेरै तेईनी बत्त लुहाय सकिया जां सेईतै तेन्हांनि यकीन बि दिवाईया कि सैक्यै गलत अत्तै।
पाखण्डी शिक्षक
10आंउ ऐत्यु ऐठणीरै तेईनी बोलता, केईनी कि बड़ै सारै मैहणु सही शिक्षाईरा विरोध कातै अत्तै, जै बकवास कातै जां होरनियांनि धोखा दींतै। ऐ खास कर यहूदी मैहणु जै विश्वासी बणि गियोरै अत्तै। जै उद्धारेरै तेईनी खतने पनि जौर दींतै। 11ऐन्हां मैहणुवंनी शिक्षा दींणेरी अनुमति मेईं दींतै, केईनी कि जेख्णी ऐ ऐन्हां गला शिख्रांतै, जै तैन्हांं ना शिख्रांणी चेहिंथी, ता सै पूरै परिवारेरै विश्वासा नाश करि दींतै। सै ऐतियु ऐठणीरै तेईनी कातै ताकि सै धन प्राप्त करि सकिया। 12क्रेते टापुरै एकि मैहणु जैस सैक्यै एकि बुद्धीमाना मनतै, तेनी बौलु, “क्रेते टापुरै मैहणु हमेशा झूठ बोलतै। सैक्यै जंगली जानवरा सैयि बर्ताव कातै। सैक्यै आलसी जां पेटु अत्तै।” 13क्रेतेरै मैहणुवां केरै बारै मझ ऐ गलै बि अबै सच्च अत्ति, ऐठणीरै तेईनी तैन्हांं सख्ती सिंउ झिड़खा ताकि सैक्यै यीशु मसीहरी सच्ची शिक्षाईया पन विश्वास करिया। 14जां तैन्हांं यहूदिया केरी मंनघड़त कहानियां जां तैन्हांं मैहणुवां केरी आज्ञाईया पन ध्यान ना दींणा, जै सच्चाईरा इन्कार काति। 15तैन्हांं मैहणुवंनी सभ चीजै विधिरै मुताबिक शुद्ध अत्ति, जेन्हैरै दिला मझ कोई बुरा विचार ना। पण तैन्हांं बुरा मैहणुवां केरै तेईनी जां जै यीशु मसीह पन विश्वास ना कातै “तेन्हैरै तेईनी सै सभ-किछ अशुद्ध आ, जै किछ सै कातै।” केईनी कि तेन्हैरै दिल जां अन्तरात्मा दोईयो पूरी तरह सिंउ गन्दै अत्तै। 16ऐ झूठै अगुवे बोलतै कि असै परमेश्वरा जांणतै, पण तेन्हैरै कंम साफ तौर पन ऐ साबित कातै कि सैक्यै तैस ना जांणतै। परमेश्वर तैन्हांं मैहणुवां सिंउ नफरत काता, केईनी कि सैक्यै तेसैरी आज्ञाय ना मनतै जां कोई भला कंम बि ना करि सकतै।
Currently Selected:
तीतुस 1: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
