2 तीमुथियुस 4
4
वचनेरा प्रचार कर
1जेख्णी यीशु मसीह एकि राजै सैयि राज कांननी ऐईंणु, ता सै मैहणु जै जींतै जां मौरै अत्तै तैन्हांं दोईयो केरा तैस न्याय कांना। ऐठणीरै तेईनी आंउ परमेश्वरेरी जां यीशु मसीहरी उपस्थिति मझ ताउ सिंउ ऐ विनती काता; 2कि तु मैहणुवां मझ परमेश्वरेरै वचनेरा प्रचार कांनेरै तेईनी हमेशा तियार बेश, चाहै सै शुणियां या ना शुणियां। ताउ मैहणुवंनी ऐ शुणांणु जरूरी आ कि तैन्हैं कितु गलती क्यौरी आ जां तु तैन्हांं केरै पापा केरै तेईनी तैन्हांं झिड़खा। पण ताउ मैहणुवंनी हिम्मत दींणी चेहिंथी। जां तांउ धीर सिंउ तेन्हांनि शिक्षा दींणी चेहिंथी। 3केईनी कि ऐतिया टैंम ऐईंणा, कि मैहणुवां सच्ची शिक्षा ना शुणनी, पण अपड़ि ईच्छाईया पन चलणु जां तैन्हांं बड़ै सारै ऐतियै शिक्षा दींणार तौपणै जैन्हां सैहै बोलणु जै किछ ऐ मैहणु शुणना चांहथै अत्तै। 4तैन्हांं परमेश्वरेरै सही वचन ना शुणनै, पण मनघड़त कहानी शुणनी। 5पण ताउ हर एकि हालाता मझ ऐपु पन काबु रखणा चेहिंथा, धीरज सिंउ दुख सहन काता रैह जां खुशखबरिरा प्रचार कर जां प्रभुरा सेवक भूंणेरै नातै अपड़ि जिम्मैवारी पूरी कर जै प्रभु ताउनि दितोरी आ।
6आंउ ताउनि ऐ हुक्म दींता, केईनी कि परमेश्वरेरै तेईनी मिंडी सेवा जां जीवन खत्म भूंणारा। केईनी कि आंउ जांणता कि आंउ जल्दी मरने वा आ। 7मीं यीशु मसीहरै तेईनी तकड़ी मैहनत क्यौरी आ। जां आंउ सै कंम पूरा करि बेठौरा आ, जै यीशु मसीह मूंनी कांनेरै तेईनी दितौरा थ्या जां लाष्टी तेईनी आंउ प्रभु मझ वफादार रिय्हौरा। 8अबै भविष्य मझ मिंडै तेईनी स्वर्गा मझ धार्मिकतायरू सै मुकुट रखौरू आ, केईनी कि मीं परमेश्वर खुश क्यौरा। प्रभु जै धार्मिकताय सिंउ सभनियांं मैहणुवां केरा न्याय काता। तैस मूंनी तैस धियाड़ी ऐ मुकुट दींणु, जेख्णी न्याय कांननी तैस दुबारे ऐईंणु। पण तैस मूंनीऐ ना पण तैन्हांं सभनियांं मैहणुवंनी बि ईनाम दींणा, जै तेसेरै दुबारे ऐईंणेरै तेईनी बेसब्री सिंउ इन्तजार कातै अत्तै।
पौलुसेरा तीमुथियुसनी खास विषैक
9तीमुथियुस, तु मूं किनि जल्दी ऐईंणेरै तेईनी कोशिश कर। 10केईनी कि देमास इस संसारेरिया चीजा सिंउ प्रेम रखि करि मूं छडि करि थिस्सलुनीके नगरानि चलि गियौरा। क्रेसकेंस गलातिया प्रदेशनी जां तीतुस दलमतिया प्रदेशनी चलि गियौरा। 11सिर्फ लूका मूं सेईतै आ। जेख्णी ताउ ऐईंणु ता मरकुसा बि ऐपु सेईतै लै ऐईछै; केईनी कि सै मिंडी सेवकाय मझ इठि मिंडी मजत करि सकता। 12तुखिकुसा आंउ इफिसुस नगरानि भेईजि बेठौरा। 13जेख्णी ताउ ऐईंणु ता तैस कौटा बि लै ऐईछै, जैस आंउ त्रोआस नगरा मझ करपुसेरै घरै छडि यौउरा थ्या। मिंडै चर्म-पत्र बि लै ऐईछै जै खास करि चमड़ेरै बंणोरै अत्तै।
14पित्तऐरै भांडै बणांणारै सिकन्दरै बड़ै तरीकै सिंउ मिंडा बड़ा नुकसान क्यौरा, प्रभु तेसनी तेसेरै बुरै कंमा केरै अनुसार सजा दींणी। 15तु बि तैस किना ऐपु सावधान रैही। केईनी कि तेनी असेड़ि शिक्षाईया केरा बड़ा विरोध क्यौरा थ्या। 16पेहिली बारी जेख्णी आंउ रोम शहरेरी अदालती मझ सफाई दींणा ग्या; ता मिंडी तरफि मझ बोलणार कौ बि ना थ्या, जां सारै मिंडा साथ छडि दित्ता। पण आंउ प्रार्थना काता कि परमेश्वर ऐस कंमेरै तेईनी तेन्हांनि माफ करि दिया। 17पण प्रभु मिंडा साथ दित्ता जां मूंनी सामर्थ दित्ती; ताकि आंउ यीशु मसीहरै बारै मझ खुशखबरिरा प्रचार सही ढंगै कांनेरै लायक बंणी गंहूँ जां होरनियां जातिया केरै सारै मैहणु शुणि सकिया जां तेनी आंउ मोउती किना ऐहीं बचा जिहीं भ्रुख्णै शैरा किना बचा। 18प्रभु आंउ हर एकि तैस बुराई किना बचांणा जै मिंडा नुकसान कांना चांहथी आ जां तैस आंउ अपड़ै स्वर्गेरै राज्य मझ हिफाजती सिंउ लै नींणा। तेसैरी माहिमा हमेशा भूंती रिय्हा। आमीन।
लाष्ट नमस्कार
19प्रिस्का जां तेसैरा लाड़ा अक्विला जां उनेसिफुरूसेरै परिवारानि मिंडा नमस्कार। 20इरास्तुस कुरिन्थुस नगरा मझ रुकि गियौरा। मीं त्रुफिमुस बिमारिरी वजहि ला मीलेतुस नगरा मझ छडौरा। 21सर्दी ऐईंणा किना पेहिलै तु ऐईंणैरी पूरी कोशिश करै। यूबुलुस, पूदेंस, लीनुस जां क्लौदिया जां सभनियांं विश्वासिया भाईया केरा ताउनि नमस्कार।
22आंउ प्रार्थना काता कि प्रभु ताउ सेईतै रिहा जां परमेश्वरैरा अनुग्रह तुहां सभनियांं पन बंणौरा रिय्हा।
Currently Selected:
2 तीमुथियुस 4: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
