इब्रानियों 4
4
परमेश्वरेरै मैहणुवां केरा आराम
1परमेश्वरै असु सिंउ वायदा क्यौरा, कि असै आरामेरी जगाय गांहणै। ऐठणीरै तेईनी असु बड़ै सावधान रींहणु चेहिंथु; जां तुहां मझां कोस बि तैस आराम बाई जगाय मझ गांहणैरा मौका ना छडणा चेहिंथा। 2केईनी कि जिहीं असै यीशु मसीहरै बारै मझ खुशखबरी शुणि, तिहियें इस्राएलेरा मैहणुवें आराम बाई जगाय मझ गांहणैरी खुशखबरी शुणि। पण तैन्हांं ऐत पन विश्वास ना केया, ऐठणीरै तेईनी सैक्या संदेश तैन्हांं केरै तेईनी व्यर्थ थ्या।
3ऐठणीरै तेईनी असै मैहणु जै तैस गलै पन विश्वास कातै जै परमेश्वरै बोलोरी अत्ति,, ता तैन्हांं मैहणुवां आराम बाई जगाय मझ गांहणु। जां होरनियां केरै बारै मझ परमेश्वरै बौलु, कि
“मीं अपड़ै गुस्सै मझ कसम खयि,
कि सैक्यै मिंडी आराम बाई जगाय मझ ना पुजणै।
परमेश्वरै ऐक्यु ऐठणीरै तेईनी ना बौलु, कि
आराम बाई जगा हालै तियार ना थी; ऐ जगा ता संसार बणांणा किना पेहिलै तियार भौ गियोरी थी।”
4केईनी कि सत्तवीं धियाड़िरै बारै मझ पवित्र शास्त्रा मझ ऐहीं-चारै लिखोरू आ, कि
“परमेश्वरै सत्तवीं धियाड़ी अपड़ै सारै कंम निपटा करि आराम केया।”
5असै ऐहीं बि पढ़तै कि, तेनी बाद मझ बौलु, कि “सैक्यै मिंडी आराम बाई जगाय मझ ना पुजणै।” 6पण मैहणुवंनी तैस आराम बाई जगाईनी गांहणैरा मौका हालै तेईनी बि आ। इस्राएलेरै सैक्यै मैहणु, जेन्हैरै बिच पेहिली बारी खुशखबरिरी घोषणा क्यौरी थी, सैक्यै आराम बाई जगाय गांहणनी नाकामयाब भौ ग्यै केईनी कि तैन्हैं परमेश्वरेरी आज्ञा ना मनि।
7ऐठणीरै तेईनी परमेश्वरै अपड़ि आराम बाई जगाय मझ गांहणैरै तेईनी अक हौरा टैंम तय केया, सैक्या टैंम ऐम्हीं आज आ। जेख्णी असेड़ै पूर्वज परमेश्वरेरै खिलाफ ग्यै, तेत किना बाद बड़ै लम्मैं टैंमा बाद परमेश्वरै दाऊदा किना ऐन्हां वचना केरी घोषणा कराई, जै पेहिलै किना बोलोरै थ्यै;
“अगर आज तुवे परमेश्वरेरी आवाज शुणतै,
ता तैस शुणना किना नमां मेईं करा।”
8असु ऐ बि पता, कि परमेश्वरै जैस आराम बाई जगायरा वायदा क्यौरा, सैक्या कनान दैश ना, जैड़ि गांहणैरै तेईनी यहोशू असेड़ै पूर्वजा केरी अगुवाय केईथी। केईनी कि अगर ऐ कनान दैश भूंता ता, परमेश्वरा बाद मझ एकि होरी आरामेरी धियाड़िरै बारै मझ चर्चा ना थी कांनी। 9ऐठणीरै तेईनी परमेश्वरेरै मैहणुवां केरै तेईनी ऐम्हीं बि अक जगा तियार आ, जेठि सैक्यै पूरी तराहि सिंउ आराम करि सकतै। तैन्हांं तिहियें-चारै आराम कांना, जिहीं परमेश्वरै सत्तवीं धियाड़ी आराम केईथ्या। 10परमेश्वरै अपड़ा कंम खत्म कांना किना बाद आराम केया। जां ऐ सभ तैन्हांं केरै तेईनी बि ऐतियु ऐ आ जै परमेश्वरा किनि आराम कांनानि गांहथै। तैन्हांं अपड़ा कंम खत्म कांना किना बाद आराम कांना।
11ऐठणीरै तेईनी असु तैस आराम बाई जगाय गांहणेरै तेईनी तकड़ी मैहनत कांनी चेहिंथी; ऐहीं ना भुईया, कि असै तैन्हांं इस्राएलि मैहणुवां सैयि करिया, जिहीं तैन्हैं परमेश्वरेरी आज्ञा ना मनथी; परमेश्वरेरी आज्ञा मनणै ला असै तैस आराम बाई जगाय पुजणै। 12परमेश्वरैरा वचन ता जीवित जां कंम कांने वा, सैक्या दोधारी तलवारी किना बि जादा पीना। सैक्या आत्माय जां प्रांणा जां अंदर दिला तेईनी पुजता जां असेड़ै मंना केरी गलै जां मंनेरै विचार परखता। 13परमेश्वरेरी नजरिया मझ इस संसारेरी कौ बि चीज छपोरी ना, पण जै किछ बि असै अपड़ि जिन्दगी मझ क्यौरू आ, असु तेठणीरा तैस किनि एकि-एकि कंमैरा हिसाब दींणा पूंणा। तेसेरै सांमणै सारी चीजै खुलि जां सांमणै अत्ति।
असैड़ा महान महायाजक
14ऐठणीरै तेईनी यीशु जै स्वर्गानि गियौरा, सैक्या परमेश्वरैरा पुत्र आ। सैक्या असु सभनियां केरा महायाजक आ। ऐठणीरै तेईनी ऐईछा असै तैस विश्वासा मझ पक्की मजबूती सिंउ बंणी बेशतै, जै विश्वास असै सभनियांं केरै सांमणै स्वीकार क्यौरा थ्या। 15ऐ महायाजक, जै यीशु मसीह आ, ऐ असेड़ि हर कमजोरी समझता; यीशु मसीह असु सैयि हर प्रकारेरी परीक्षायरा सामना केया, पण तेनी कोई बि पाप ना केया। 16ऐठणीरै तेईनी ऐईछा असै बिना कुनि डरै परमेश्वरा किनि सांमणै ऐईछिया; तां परमेश्वरा असुनि दया जां अनुग्रह लुहाना जां जेख्णी असु जरूरत भूंणी, तेख्णी तैस असेड़ि मजत कांनी।
Currently Selected:
इब्रानियों 4: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
