इब्रानियों 3
3
यीशु मूसै किना महान
1ऐठणीरै तेईनी, हे मिंडै साथी विश्वासी भाईयो, तुवे जै स्वर्गा मझ तैस सिंउ शामिल भूंणेरै तेईनी शदाउरै अत्तै, मसीह यीशु पन ध्यान दिया! सै असेड़ै तेईनी भेईजौरा जै परमेश्वरेरी खुशखबरी अंणनार दूत जां महायाजक आ। 2यीशु परमेश्वरा सिंउ विश्वास योग्य थ्या, जेनि सैक्या ऐ कंम कांनेरै तेईनी चुणा, ठीक तिहियें जिहीं मूसा परमेश्वरेरै परिवारा मझ सभनियां मैहणुवां केरी सेवा कांना मझ विश्वास योग्य थ्या।
3जिहीं चारै घर बणांणारै मैहणुनी घरा किना जादा आदर मेईंता, तिहियें चारै यीशु मूसेरी तुलनाय किना बड़ा जादा आदरिरै काबिल आ। 4केईनी कि हर एकि घरा कोई ना कोई बंणाणार भूंता, पण जेनि सभ-किछ बंणाउरू आ, सैक्या परमेश्वर आ। 5मूसा ता परमेश्वरेरै घरैरा सभनियां मैहणुवां सैयि बराबर विश्वास योग्य रिय्हा, कि जै किछ मूसै कियु, तेनी ला सै तैस धेरै इशारा काता थ्या, जै बाद मझ बोलणार थ्या।
6मसीह एकि पुत्रा सैयि अपड़ै परिवारा मझ विश्वास योग्य आ; जां सैक्या परिवार असै ऐपु अत्तै। अगर असै अपड़ि आशा मझ भरौसा रखतै जां गर्व कातै रींहथै ता असै परमेश्वरेरै मैहणु अत्तै।
अविश्वास कांनेरै तेईनी चेतावनी
7ऐठणीरै तेईनी जिहीं परमेश्वर अपड़ि पवित्र आत्माय ला बोलता,
“अगर आज जेख्णी तुवे परमेश्वरा बोलतै शुणतै,
8ता तेसैरी आज्ञा मनणा किना नमां मेईं करा,
जिहीं तुवाड़ै पूर्वजै कियु, जैन्हां रेगिस्थान मझ
परीक्षायरै टैंमा परमेश्वरेरै खिलाफ विद्रोह केया।
9तैड़ि तुवाड़ै पूर्वजै मिंडै सब्रेरी परीक्षा लैई जां आंउ परखा,
हलाँकि तैन्हैं चाहिया साला तेईनी मिंडै चमत्कार तकाउरै थ्यै।
10ऐठणीरै तेईनी आंउ तैस पीढ़िरै मैहणुवां सिंउ गुस्सै थ्या,
जां बौलु, सैक्यै मूं पिचोरै चलणा किना नमां कातै,
जां मीं जै कांनेरी आज्ञा दितोरी आ, तैस कांना किना नमां कातै।
11तां मीं गुस्सै मझ अईछी कर कसम खयि, कि
सैकेयि जमींन जैड़ि आंउ तैन्हांंनि आराम दींता,
सैक्यै तैस जमींन मझ ना पुजणै।”
12हे भाईयो, सावधान रिय्हा, कि तुहां मझ कोई ऐतिया बुरा बर्ताव या अविश्वासी मंन ना भुईया, कि जै जीवन दींणार परमेश्वर आ, तेसेरै अनुसार चलणा किना नमां करि दिया। 13पण ज्यो तेईनी सै मौकै बाई धियाड़ि जैसनि पवित्र शास्त्रा मझ अजकि धियाड़ि बोलतै तुवाड़ै सांमणै आ हर धियाड़ी योकियानि हिम्मत दींतै रिय्हा। ऐहीं ना भुईया कि तुहां मझां कौ बि पापेरै बहकावै मझ अईछी करि जिद्दी बणि गहिया। 14केईनी कि अगर तुवे अपड़ै विश्वासा मझ लाष्टी तेईनी मजबूत बंणी रींहथै, जेतिया विश्वास असु मझ पेहिलै किना थ्या, ता असै मसीह सिंउ हिस्सैदार बंणी रींहथै। 15जिहीं पवित्र शास्त्रा मझ लिखोरू आ, कि
“अगर आज जेख्णी तुवे परमेश्वरा बोलतै शुणतै,
ता तेसैरी आज्ञा मनणा किना नमां मेईं करा,
जिहीं तुवाड़ै पूर्वजै परीक्षायरै टैंमा परमेश्वरेरै खिलाफ विद्रोह केईथ्या।”
16जैन्हैं मैहणुवें परमेश्वरेरी आवाज शुणीं करि बि तेसेरै खिलाफ विद्रोह केया, सै इस्राएलेरै मैहणु अत्तै जेन्हैरी मूसा अगुवाय करि-करि मिस्र देशा किना भेईर लै यौउरा थ्या। 17जां तैन्हैं मैहणुवें परमेश्वर चाहिया साला तेईनी नाराज केया, ऐन्हैं इस्राएलेरै मैहणुवें रेगिस्थाना मझ पाप क्यै जां तैड़ियै मरि ग्यै। 18जां जेख्णी परमेश्वरै फिरी तैन्हांं मैहणुवां केरै बारै मझ कसम खयि, कि “जैन्हैं मैहणुवां आज्ञा ना मनि करि परमेश्वरेरै खिलाफ पाप केया, सैक्यै मैहणु कदि बि तैस जगाय ना पुजणै; जैड़ि परमेश्वरै तैन्हांंनि आराम दींणेरै तेईनी वायदा क्यौरा थ्या।” 19ऐहीं-चारै असै समझतै, कि तैन्हैं विश्वास कांना किना नमां करि दित्ता जां सैक्यै तैस जगाय ना पुज्जै।
Currently Selected:
इब्रानियों 3: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
