इब्रानियों 2
2
महान छुटकारा
1ऐठणीरै तेईनी जरूरी आ कि जै असुनि शिख्राउरू थियु, तेसैरा असै ध्यान सिंउ पालन कातै रिय्हा। तां असै सच्चाई किना ना भटकणै। 2केईनी कि सैकेयि व्यवस्था जेठणीरै बारै मझ परमेश्वरै स्वर्गदूता केरै जरियै बौलु, सै सच लुहाईयु, जां जै कोई बि ऐस ना मनींथिया, तेसनी सजा मेईंथी। 3ऐठणीरै तेईनी ऐ पक्का, कि अगर असै ऐस वचनेरा, जेनि ला उद्धार भूंता, ऐसेरा अनादर कातै ता, असुनि बि सजा मेईंणी। सभनियां पेहिलै प्रभु ऐपु खुद ऐस उद्धारेरै बारै मझ शुणांउ। जां असेड़ै तेईनी तैन्हैं ऐ संदेश सच साबित केया, जैन्हैं सै शुणा। 4परमेश्वरै बि अदभुत कंम, बड़ै-बड़ै चिन्हां जां बड़ै सारै चमत्कारै ला जां पवित्र आत्माय ला मैहणुवंनी वरदान दी करि ऐ साबित कियु; ठीक तिहियें जिहीं सै चांहथा थ्या।
असैड़ा मुक्तिदाता
5परमेश्वरै सैक्या ऐईंणै वा संसार, जेसैरी चर्चा असै कातै अत्तै, स्वर्गदूता केरै आधीन ना केया पण प्रभु यीशुरै आधीन केया। 6जिहीं पवित्र शास्त्रा मझ कोठिक्यां, ऐ लिखोरू आ, कि
मैहणु केया आ, कि तु तेसैरी खबर लींता?
या मैहणु केया अत्तै, कि तु परमेश्वर, तेन्हैरी चिन्ता करिया या तेन्हैरी देख-भाल करिया। सै मैहणु किना जादा होरू किछ ना।
7तीं सैक्या स्वर्गदूता किना घट खास बंणा,
तीं तेसनी एकि राजै सैयि महिमा जां आदर दितौरा।
8तीं तेसनी सारी चीजा पन हक दितौरा।
ऐठणीरै तेईनी ऐड़ि ऐहीं लगतु आ कि परमेश्वरै सभ-किछ मैहणुरै वशा मझ करि दितोरू आ। मतलब ऐतियु किछ बि ना, जै तेसेरै वशा मझ ना; पण असै तका सकतै, कि आज तेईनी बि सभ-किछ मैहणुरै वशा मझ ना।
9पण असै यीशु मसीह तकांतै! सैक्या किछ टैंमेरै तेईनी स्वर्गदूता किना घट खास करि दित्थिया, ताकि परमेश्वरेरै अनुग्रह ला सैक्या सभनियां केरै तेईनी मरि गहिया। केईनी कि तेनी दुख सहन केया जां मरि ग्या। परमेश्वरै तेसनी महिमा जां आदर दित्ता। 10केईनी कि परमेश्वरै सभ किछ बणाउरू आ जां सभ किछ तेसैरू ऐ आ। ताकि बड़ा सारा मैहणुवां अपड़ि महिमाय मझ हिस्सैदार करिया। परमश्वरै ऐ फैसला केया, कि प्रभु यीशु दुख सहन करि ऐतिया मैहणु बंणी गहिया, जै चरित्र मझ पूर्ण आ। केईनी कि यीशु ऐ आ जै तेन्हैरा उद्धार करि सकता। 11केईनी कि जै मैहणुवंनी तैन्हांं केरै पापा किना शुद्ध काता जां जै मैहणु तैन्हांं केरै पापा किना शुद्ध करियूंतै, तैन्हांं सभनियां केरा पिता अकै आ; ऐठणीरै तेईनी यीशु तैन्हांंनि अपड़ै भाई-भींण मनणा किना शर्म ना ऐईंती।
12ऐठणीरै बारै मझ परमेश्वरा सिंउ मसीह ऐहीं-चारै बोलता;
“जै भलै कंम तीं क्यौरै अत्तै; सैक्यै मूं अपड़ै भाईयनी शुणाणै।
जेख्णी तैन्हांं तिंडि अराधना कांनेरै तेईनी किट्ठै भूंणु, तेख्णी मूं तिंडि महिमा कांनी।”
13जां सैक्या फिरी बोलता,
“मूं परमेश्वरा पनि भरौसा रखणा।”
जां सैक्या फिरी ऐक्यु बि बोलता,
“ऐठि आंउ तैन्हांं मैहणुवां सेईतै आ जै परमेश्वरै मूंनी दितोरै अत्तै, सैक्यै बच्चा सैयि अत्तै।”
14केईनी कि परमेश्वरेरै बच्चै मैहणु अत्तै, मतलब मास जां खूनै ला बंणोरै जां पुत्र बि अक मैहणु बंणी ग्या। केईनी कि सिर्फ अक मैहणु बंणी करि सैक्या मरि सकींथ्या जां सिर्फ मरि-यै करि सैक्या शैतानेरी शक्ति हारा सकींथ्या, जैस किनि मोउतिरी शक्ति थी। 15ऐठणीरी वजहि प्रभु यीशु मसीह तैन्हांं मैहणुवां केरा उद्धार केया, जै मोउतिरै डरा मझ अपड़ा पूरा जीवन गुलामा सैयि जींतै थ्यै।
16केईनी कि ऐ स्पष्ट आ कि सै स्वर्गदूता केरी मजत कांना ना; बल्कि अब्राहमेरै वंशैरी मजत कांना यौउरा थ्या। 17ऐनि कारणै यीशुरै तेईनी ऐ जरूरी थियु कि हर गलै मझ अपड़ै भाईया सैयि बंणी गहिया; ताकि सैक्या परमेश्वरेरै सांमणै दयालु जां विश्वासेरै काबिल महायाजक बंणी सकिया। फिरी सैक्या ऐतिया बलिदान चाढ़ी सकींथ्या, जेनि ला मैहणुवां केरै पाप दूर भौ गांहथै।
18केईनी कि यीशुरी परीक्षा लेई जां तेनि ऐपु दुख भौगोरा। ऐठणीरै तेईनी अबै सै तैन्हांं मैहणुवां केरी मजत करि सकता, जै परीक्षाय मझ प्यौरै अत्तै।
Currently Selected:
इब्रानियों 2: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
