इफिसियों 2
2
मोउती किना जीवना धेरै
1पेहिलै जेख्णी तुवे परमेश्वरा पनि विश्वास ना करींथ्यै, तेख्णी तुवे अपड़ै अपराधा जां पापा केरी वजहि मौरा मैहणुवां सैयि थ्यै। 2तैस टैंमा तुवे ऐस संसारेरै तैन्हांं मैहणुवां सैयि जिईंथ्यै, जै परमेश्वरा ना जांणीथ्यै, जां तुवे दुष्ट आत्माईया केरै सरदारेरी आज्ञाय मनींथ्यै, जै असमांणा मझ आ। जै हालै तेईनी बि तैन्हांं मैहणुवां केरै मंना मझ कम कातै अत्तै जै परमेश्वरेरी आज्ञाय ना मंनतै। 3असै बि पेहिलै तैन्हांं सैयि ऐ जीवन जिईंथ्यै जां अपड़ै पापी स्वभावेरी ईच्छाय पूरी करींथ्यै जां जै असेड़ि बुरी ईच्छाय जां विचार असु सिंउ बोलींथ्यै, असै सैहै करींथ्यै; जां बाकि सभनियांं सैयि असै बि स्वभाविक रूप सिंउ बुरै थ्यै जां परमेश्वरेरी सजायरै आधीन थ्यै। 4पण परमेश्वर बड़ा दयालु आ; अपड़ै तैस बड़ै प्रेमेरै कारण, जेठणीरी वजहि तेनी असु सिंउ प्रेम केया, 5जेख्णी असै पापा केरै कारण मौरै मैहणुवां सैयि थ्यै, तेनी असुनि जीवन दित्ता, जेख्णी तेनी यीशु मसीह मौरा मझां जींतैरा; परमेश्वरेरै अनुग्रह ला-ऐ तुवे बचाईयोरै अत्तै।
6केईनी कि तेनी असै मसीह सिंउ मौरा मझां जींतैरोरै अत्तै जां असुनि स्वर्गा मझ यीशु मसीह सिंउ राज्य कांनेरै तेईनी काबिल बंणाय। 7परमेश्वरै ऐहीं ऐठणीरै तेईनी कियु, ताकि ऐईंणै बाई धियाड़िया मझ सैक्या मैहणुवंनी लुहाय सकिया कि तेसैरा अनुग्रह क्यौता महान आ। जै किछ तेनी असेड़ै तेईनी क्यौरू आ, तेनी ला ऐक्या अनुग्रह लुहाऔरा, जै प्रभु यीशु मसीह सिंउ अक-जुट अत्तै। 8केईनी कि ऐक्यु परमेश्वरेरै अनुग्रह ला आ कि तुवे विश्वास कांने ला बचाईयोरै अत्तै। तुहैं ऐपु अपांणा ना बचा, पण ऐ परमेश्वरैरा दान आ। 9जां ऐ तुवाड़ै क्यौरै कोस बि अच्छै कंमेरै कारण ना। ऐठणीरै तेईनी तुहां किनि घमण्ड कांनेरी कोई वजह ना। 10केईनी कि असु बणांणार परमेश्वर आ; जां मसीह यीशु मझ भलै कंम कांनेरै तेईनी असै नवाँ मैहणुवां केरै रूपा मझ बंणाय, जै परमेश्वरै पेहिलै किना असेड़ै कांनेरै तेईनी तियार केया।
मसीह मझ अक
11ऐठणीरै तेईनी तुवे जै होरी जाति पेईदा भोरै थ्यै, याद करा कि तुवे पेहिलै केतियै थ्यै, यहूदी मैहणुवें तुहांनि ऐ बोलि करि तुच्छ समझै कि तुवे खतना ना करांतै, पण सैक्यै मैहणु करांतै। पण तेन्हैरी ऐकेई रीति सिर्फ तेंन्हैरै शरीरा पनि ऐ करियूंती। 12तैस टैंमा तुवे मसीह ना जांणीथ्यै जां तुवे परमेश्वरेरै चुणियोरै मैहणु इस्राएला सैयि नागरिकेरै रूपा मझ ना थ्यै, परमेश्वरै अपड़ै वायदेरै मुताबिक जै कसम यहूदिया सिंउ क्यौरी थी तुवे तेसेरै हिस्सैदार ना थ्यै जां इस संसारा मझ बगैर आशाय जां बगैर परमेश्वरै थ्यै। 13अक टैंम थ्या जेख्णी तुवे दूर थ्यै, पण अबै यीशु मसीह मझ तेसेरै खूनै ला नीड़ अंणौरै अत्तै।
14यीशु मसीह ऐपु असेड़ै बिच शांति बंणाउरी आ। बीतै टैंमा मझ ऐ ऐतियु थियु जिहीं एकि दिवारी यहूदी जां होरी जाति अलग करि दितोरी थी। सैक्यै योकिया सिंउ नफरत करींथ्यै, पण अबै यीशु मसीह सैकेई दीवार छिढाय दित्ती जां दोईयो पासै अक कर दित्तै। 15क्रूसा पन मसीहरी मोउतिरी वजहि सिंउ, तेनी मूसेरी व्यवस्थायरी पूरी विधि खत्म करि दित्ती। ऐहीं कांना मझ मसीहरा मकसद यहूदीया जां होरिया जातिया योकिया मझ जोड़ी करि तेन्हैरै बिच शांति बणां रखणैरा थ्या, जां ऐनि हिसाबै अक नवाँ गुट बंणाणैरा थ्या। 16क्रूसा पन अपड़ि मोउतिरै कारण, तेनी दो गुट अक करि दित्तै जां तेन्हैरा मिलन परमेश्वरा सिंउ करा दिता। ऐहीं चारै यहूदी जां होरनियां जातियां केरै बिच दुशमणी मिटा दित्ती। 17जां मसीह अईछी करि होरी जाति जै परमेश्वरा किना दूर थी जां यहूदी जै तैस नीड़ थ्यै; दोईयोनि शांति बाई खुशखबरी शुणाय। 18यीशु मसीह जै असेड़ै तेईनी क्यौरू आ, तेठणिरै कारण अबै असै सभ तेनी एकि पवित्र आत्माय ला पिता परमेश्वरा किनि अईछी सकतै।
19ऐठणीरै तेईनी अबै तुवे होरनियां जातिया केरै मैहणु परदेशी जां मुसाफिर ना रिय्है; पण तुवे परमेश्वरैरा मैहणुवां सिंउ बेशणार जां परमेश्वरेरै परिवारेरै मैहणु अत्तै। 20मिलि करि सभ असै तेसैरू घर अत्तै, जै खास चैलै जां भविष्यवक्ता केरी खाई पन बंणोरू आ। जां ऐसेरै कूंणैरा घौड़ ऐपु यीशु मसीह आ। 21मसीह ऐ सै आ, जै पूरू घरा जोड़ी रखणैरा कारण आ। सैक्या परमेश्वरेरै तेईनी अक पवित्र मन्दिर बंणाणेरै तेईनी अपड़ै सभनियां मैहणुवां घौड़ा सैयि योकिया सिंउ जोड़ी रखता। 22हे होरनियां जातिया केरै विश्वासी मैहणुवो, केईनी कि तुवे मसीह सिंउ अक अत्तै। ऐठणीरै तेईनी तुवे बि परमेश्वरैरा मैहणुवां सिंउ अक भौ-करि रिय्हा, ताकि तुवे अक ऐतियु घर बंणी गहिया जेठि परमेश्वरैरा आत्मा रींहथा भुईया।
Currently Selected:
इफिसियों 2: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
