इफिसियों 1
1
1आंउ पौलुस, ऐस चिट्ठी लिखता। आंउ परमेश्वरेरी ईच्छाय अनुसार यीशु मसीहरा खास चैला, आंउ ऐ चिट्ठी इफिसुस शहरा मझ रींहणारा परमेश्वरैरा मैहणुवंनी लिखता, जै मसीह यीशुरै वफादार चैलै अत्तै। 2आंउ प्रार्थना काता, कि असेड़ा पिता परमेश्वर जां प्रभु यीशु मसीह तुहां पन अनुग्रह करिया जां शांति हासिल कांना मझ तुवाड़ी मजत करिया।
मसीह जां आत्मिक आशीषै
3असेड़ै परमेश्वरेरी जां प्रभु यीशु मसीहरै पिताऐरी महिमा भुईया, जेनि असुनि मसीहरै जरियै स्वर्गा किना मेईंणै बाई हर प्रकारेरी आशीषै दितोरी अत्ति। ऐ मसीह सेईतै असेड़ि ऐकतायरै कारण भौरू आ। 4खास कर संसारेरी रचना भूंणा किना पेहिलै मसीह सिंउ असेड़ै अक-जुट भूंणेरै कारण परमेश्वरै असै अपड़ै भूंणेरै तेईनी पेहिलै चुणी ल्यै, ताकि असै तेसेरै सांमणै पवित्र जां निर्दोष बणियां। 5केईनी कि परमेश्वरै असु सिंउ प्रेम केया, ऐनि वजहि ला तेनी बड़ै पेहिलै फैसला क्यौरा थ्या, कि तैस यीशु मसीहरै द्वारा असै अपड़ि संतान भूंणेरै तेईनी गोद लींणै। परमेश्वरै ऐहीं अपड़ि ईच्छाय जां खुशी सिंउ कियु। 6ताकि असै तेसेरै महान अनुग्रहरै तेईनी तेसैरी स्तुति करिया जै तेनी असुनि मुफ्त मझ दी दितौरा; केईनी कि असै तेसेरै प्यारे पुत्रा सिंउ जुड़ौरै अत्तै। 7मसीहरा खून बहांणै ला असैड़ा छुटकारा भौरा, मतलब असेड़ै पाप माफ भौ ग्यै। परमेश्वरैरा अनुग्रह बड़ा महान आ, जै तेनी असुनि बड़ा जादा दितौरा। 8ऐ अनुग्रह परमेश्वरै अपड़ै सारै ज्ञान जां समझि सिंउ बहुतायत सिंउ दितौरा।
9परमेश्वरै सैहै कियु, जै तेनी सौचि रखौरू थियु, जां तैस गुप्त योजनायरै बारै मझ शुणाउं जै तेनी पेहिलै किना मसीहरै द्वारा पूरा कांनेरा फैसला क्यौरा थ्या। 10जेख्णी ऐस योजनाय पूरा कांनेरा सही टैंम ऐईंणा, ता परमेश्वरा सुरगेरी जां धरतिरी सारी चीजै मसीहरै आधीन करि दींणी, ताकि मसीह सभनियांं चीजा केरा मुखिया भुईया।
11ऐठणीरै अलावा असै मसीह सिंउ अक-जुट अत्तै, ऐठणीरै तेईनी असुनि परमेश्वरा किना विरासत मेऔरी आ; केईनी कि तेनी असै पेहिलै किना चुणोरै थ्यै जां सैक्या अपड़ि योजनायरै अनुसार सभ कंम काता। 12असै यहूदी पेहिलै मैहणु अत्तै, जैन्हैं मसीह पन आशा रखि, जां असै ऐठणीरै तेईनी चुणोरै थ्यै, ताकि असै परमेश्वरेरी महिमायरै तेईनी स्तुति करि सकिया। 13तुहैं परमेश्वरेरी खुशखबरी शुणि, जै ऐस बारै मझ शुणांती कि परमेश्वर तुहां किहीं बचांता। जेख्णी तुहैं मसीह पन विश्वास केया, ता परमेश्वरै अपड़ा वायदा क्यौरा पवित्र आत्मा तुहांनि दित्ता, ऐ लुहानेरै तेईनी कि तुवे परमेश्वरेरै मैहणु अत्तै। 14पवित्र आत्मा बि एकि ब्याना सैयि आ, जै असुनि ऐस गलैरा भरौसा दींता, कि परमेश्वरा असुनि सैकेई विरासत दींणी, जैस दींणैरा तेनी वायदा क्यौरा जां ऐक्यु बि कि तेनी असै अपड़ै मैहणुवां केरै रूपा मझ खरीदोरै अत्तै। ऐठणीरै कारण मैहणु परमेश्वरेरी महिमायरी स्तुति करिया।
पौलुसेरी प्रार्थना
15ऐनि वजहि ला जेख्णी किना मीं प्रभु यीशु पन तुवाड़ै विश्वासेरै जां परमेश्वरेरै सभनियांं पवित्र मैहणुवां केरै तेईनी तुवाड़ै प्रेमेरै बारै मझ शुणौरू आ, 16आंउ हमेशा तुवाड़ै तेईनी परमेश्वरैरा धन्यवाद काता जां अपड़ि प्रार्थनाईया मझ तुहां याद काता रींहथा। 17आंउ प्रार्थना काता कि परमेश्वर, असेड़ै प्रभु यीशु मसीहरा महिमामय पिता तुहांनि आत्मिक ज्ञान जां समझ दैला जां तैस होरू जादा अच्छै तरीकै सिंउ जांणना मझ मजत करैला। 18आंउ ऐ बि प्रार्थना काता कि तैस तुहांनि सच्चाई जांणना मझ बि मजत कांनी जां तुवे तैस उम्मीदि जांणि ल्या, जेसेरै तेईनी तुवे तेनी चुणोरै अत्तै; ताकि तुवे जांणि सकिया, कि सैकेई आशीषि क्यौति महान जां महिमा कांने बाई अत्ति, जेन्हैरा वायदा परमेश्वरै अपड़ै पवित्र मैहणुवां सिंउ क्यौरा। 19आंउ चांहथा, कि तुवे तैस महान जां शक्तिशाली सामर्थिरै बारै मझ जांणा, जै परमेश्वरा किनि असु मसीह पन विश्वास कांनारा केरै तेईनी आ। 20ऐ सैकेयि महान शक्ति आ, जेठणीरा इस्तेमाल परमेश्वरै तेख्णी क्यौरा थ्या, जेख्णी तेनी मसीह जींता केईथ्या जां जेख्णी तेनी मसीह स्वर्गा मझ अपड़ै देहिणै पासै सम्मान सिंउ रखा। 21तैड़ि हर प्रकारेरी प्रधानता, अधिकार, सामर्थ, जां प्रभुता दितोरी आ। जां तेसैरा औधा सभनियां अधिकारिया केरै औधै किना प्रन आ; चाहै ऐ इस युगेरै भुईया या ऐईंणै बाऐ युगेरै भुईया। 22जां परमेश्वरै सारी चीजै मसीहरी सामर्थिरै आधीन करि दितोरी अत्ति जां सैक्या कलीसियेरी भलाईरै तेईनी सभनियां चीजा केरा मुखिया घोषित करि दितौरा। 23ता ऐठणीरै तेईनी मसीह मुंडका सैयि आ जां मसीह असु बिच अपड़ि सामर्थिरा इस्तेमाल तिहियें काता, जिहीं सैक्या अपड़ि सामर्थिरा इस्तेमाल पूरै ब्रह्मांडा मझ काता।
Currently Selected:
इफिसियों 1: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
