इफिसियों 3
3
होरनियां जातिया मझ पौलुसेरी सेवा
1ऐठणीरै कारण आंउ पौलुस तुवाड़ै तेईनी प्रार्थना काता। आंउ जैल्ही मझ आ; केईनी कि आंउ होरनियां जातिया मझ खुशखबरिरा प्रचार करि-करि यीशु मसीहरी सेवा काता। 2तुहैं मैहणुवें जरूर शुणौरू भूंणु, कि परमेश्वरै अपड़ै अनुग्रह ला मूंनी तुहांनि खुशखबरी शुणाणैरी जिम्मेवारी दितोरी आ। 3परमेश्वरेरी गुप्त योजना बड़ै पेहिलै किना गुप्त थी; जै तेनी मूं किना लुहाय। मीं ऐस बारै मझ पेहिलै थोड़ु तियु लिखोरू थियु। 4जिहीं तुहां सैकेई चिट्ठी पढ़नी, ता तुहां ऐ बि पता लगणा कि आंउ सच मझ यीशु मसीहरै गुप्त भेदा केरै बारै मझ क्यौति अच्छी तरह सिंउ समझता। 5ऐ गुप्त भेद पिछली पीढ़िरै मैहणुवंनी ना थ्या शुणाउरा। अबै पवित्र आत्माय अपड़ै पवित्र खास चैला जां परमेश्वरैरा संदेश दींणै बाऐ मैहणुवां पन प्रकट क्यौरा। 6ऐ परमेश्वरेरी योजना आ, कि यीशु मसीह सिंउ अक भूंणेरै कारण खुशखबरिरै जरियै यहूदिया केरै समान होरनियां जातिया केरै मैहणुवां सैहै आशीष पांणी। जां सैक्यै ऐकि ऐ शरीरैरा हिस्सा अत्तै, जां तैस वायदेरै हिस्सैदार अत्तै, जै परमेश्वरै यहूदी मैहणुवां सिंउ क्यौरा थ्या। 7परमेश्वरै आंउ अपड़ै अनुग्रह जां सामर्थ ला खुशखबरी शुणाणेरै तेईनी तेसैरा सेवक बंणाउरा। 8आंउ परमेश्वरेरै सारा मैहणुवां मझ सभनियांं किना हल्का आ। पण परमेश्वरैरा अनुग्रह मूं पन भुआ, कि आंउ होरनियां जातिया केरै मैहणुवंनी मसीहरी असीम आशीषिरै बारै मझ खुशखबरी शुणाउं। ऐ आशीष जै असुनि मसीह किना मेईंती, सैकेई मैहणुवां केरी समझि किना भेईर आ। 9जां आंउ ऐ गुप्त योजना सभनियांंनि समझांणेरै तेईनी बि चुणौरा थ्या। परमेश्वर जै सारी सृष्टिरा कर्ता-धर्ता आ, तेनी शुरू किना ऐ योजना गुप्त रखौरी थी।
10ताकि अबै कलीसियेरै जरियै, परमेश्वरैरा अलग तरीकैरा ज्ञान तैन्हांं प्रधाना जां अधिकारिया पन जै स्वर्गीय जगाय मझ अत्तै, प्रकट करियो। 11परमेश्वरै अपड़ि योजनाईरै अनुसार ऐहीं क्यौरू थियु, जै तेनी असेड़ै प्रभु मसीह यीशुरै जरियै पूरू कियु। 12मसीह सेईतै असुवां जुड़नेरी वजहि सिंउ जां तैस पनि असेड़ै विश्वासेरी वजहि सिंउ, अबै असै परमेश्वरेरी उपस्थिति मझ हिम्मती जां आत्मविश्वासै सिंउ अईछी सकतै। 13ऐठणीरै तेईनी आंउ विनती काता, कि जै दुख तुवाड़ै तेईनी मूंनी भूंतै अत्तै, तेन्हैरै कारण निराश ना भूंणु चेहिंथु, केईनी कि ऐक्यै सभ तुवाड़ै फायदेरै तेईनी अत्तै।
मसीहरा प्रेम
14ऐठणीरै तेईनी आंउ पौलुस जेणु टंकि करि पिता परमेश्वरा सिंउ तुवाड़ै तेईनी प्रार्थना काता। 15सैक्या अकै आ जै विश्वासिया केरै पूरै परिवारैरा पिता आ जां जै स्वर्गा मझ जां धरती मझ आ। 16आंउ प्रार्थना काता, कि परमेश्वर अपड़ि महिमा बाऐ असीमित खजानै किना तुहांनि ऐ दान दिया, कि तुवे तेसैरी आत्माय किना ऐपु अंदर सामर्थ लैकरी शक्तिशाली भौ गहिया। 17ताकि तैस पनि विश्वास कांने ला मसीह तुहां अंदर सदा तेईनी रिय्हा। जां आंउ प्रार्थना काता, कि परमेश्वरेरै प्रेमा मझ तुवे मजबूत भौ करि जां द्रिढ़ै भौ करि, 18सभनियांं पवित्र मैहणुवां सेईतै ऐस गलैरी भली-भांति समझणैरी शक्ति लै ल्या, कि मसीहरै प्रेमैरी चौड़ाई, जां लम्बाई, जां ऊंचाई, जां गहराई क्यौति जादी आ। 19आंउ प्रार्थना काता, कि तुवे मसीहरै ऐस प्रेमेरै बारै मझ जांणियां, जै मैहणुवां केरी समझि किना भेईर आ, ताकि तुवाड़ा स्वभाव परमेश्वरेरै स्वभावा सैयि बंणी गहिया। 20परमेश्वरेरी महिमा भुईया! सै ऐतिया सामर्थी परमेश्वर आ, जै असेड़ि विनती किना जां सौचणा- समझणां किना बड़ु जादु करि सकता। सै अपड़ि सामर्थी ला असुवां मझ कंम काता। 21तेसैरी महिमा कलीसियै मझ, जां मसीह यीशु मझ पीढ़ी किना पीढ़ी तेईनी युग-युग भूंती रिय्हा। आमीन।
Currently Selected:
इफिसियों 3: CDJNT
Highlight
Share
Compare
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
