1 पतरस 3
3
मसीही लाड़िया केरा अपड़ै लाड़ा केरै प्रति कर्तव्य जां सलाह
1लाड़ियो, तुवे बि अपड़ै लाड़ेरै आधीन रिय्हा। केईनी कि अगर तुवाड़ा लाड़ा परमेश्वरैरा वचन ना मनता ता, 2तुवाड़ै विश्वास कांने ला जां तुवाड़ा प्रभु मझ चाल-चलन तका करि, तुवाड़ै लाड़ै पन बि तेठणीरा असर पूंणा जां सै अपड़ा मंन बदली सकतै, तुहां किछ बोलणैरी जरूरत ना पूंणी। सैक्यै मसीह पन विश्वास कांनेरै तेईनी जींति गांहणै। 3तुवाड़ी सुन्दरता सिर्फ भेईरी दिखावटी ना भुईया, जिहीं शिर संवारनु, सुन्नैरै गहणैं ला अपांणा सजाणा या कीमति लिकड़ै लांणै, 4बल्कि तुहां अपांणा मंना किना ऐईंणै बाई विनम्र जां शांत व्यवहार बाई सुन्दरताय सिंउ ऐपु सुन्दर बणनु चेहिंथु। ऐ सुन्दरता कदि ना मिटती जां परमेश्वरेरी नजरी मझ कीमति आ। 5पेहिलै जमानेरी जनेनी जै परमेश्वरा पन आशा करींथी, सैकेई अपड़ा लाड़ा केरी आज्ञा मनि करि अपांणा ऐहीं चारै सुन्दर बणाईंथी। 6जिहीं सारा अब्राहमेरी आज्ञा मनींथि जां तेसनी अपड़ा स्वामी बोलींथि। अबै तुवे साराय सैयि भौ सकती, अगर तुवे होरनियां सिंउ भलाई काति जां कोस बि गलै हैरी ना डरींति।
अपड़ि लाड़िया केरै तेईनी मसीही लाड़ा केरा कर्तव्य जां आदर
7तिहियें चारै लाड़ा केरै तेईनी बि ऐ सलाह आ, कि अपड़ि लाड़िया सेईतै प्रेम सिंउ बेशि करि तेन्हैरी मजत करिया करा। याद रखा कि जनेनी तुहां किना कमजौर भूंती, ऐठणीरै तेईनी तुहां तैन्हां केरा आदर कांना चेहिंथा; केईनी कि तुहां दोईयोनि अनन्त जीवनेरा अनुग्रह दींणैरा वायदा परमेश्वरै क्यौरा। अगर तुवे ऐहीं करेलै ता परमेश्वरा तुवाड़ी प्रार्थनाय शुणनी।
भलाई कांने ला दुख
8अंत मझ, आंउ तुहां सिंउ ऐक्यु बोलणा चांहथा कि योकिया मझ अकजुट रिय्हा, जां योकिया केरी चिंता करियां करा, जां ऐकिऐ परिवारैरा भाईया सैयि प्रेम करा, होरै पन दया करा, योकिया सिंउ प्रेम-भाव सेईतै बेशा। 9जै बुराई काता, तैस सिंउ बदला लींणैरै तेईनी बुराई मेईं करा; ना गाईया केरै बदलै गायि दिया; तैन्हांंनि खरू बोला; केईनी कि तुवे परमेश्वरै होरनियांनि आशीष दींणैरै तेईनी चुणोरै अत्तै, ताकि तुहांनि बि आशीष मेईया। 10केईनी कि पवित्र शास्त्रा मझ लिखोरू आ; कि
जै कोई अनन्त जीवनैरा आनन्द लींणा चांहथा,
जां अच्छी धियाड़ी तकांणा चांहथा, तैस तियार बेशणु चेहिंथु, कि
सैक्या अपड़ु मुहाँ किना बुरी गलै ना बोलिया, झूठ ना बोलिया जां होरनियांनि धोखा ना दिया।
11तैस बुराई कांनी बन्द करि दींणी चेहिंथी,
ऐठणीरी वजाय तैस होरनियां सेईतै शांति सिंउ बेशणैरी कोशिश कांनी चेहिंथी, जै कि बधिया बि आ।
12केईनी कि प्रभुरी नजरी अच्छै कंम कांनारा पन लगौरी रींहथी,
जां प्रभुरै कंन हमेशा तैन्हांं केरी प्रार्थना शुणनेरै तेईनी तियार भूंतै;
पण परमेश्वर हमेशा तैन्हांं मैहणुवां केरै खिलाफ आ, जै बुरै कंम कातै।
13अगर तुवे हमेशा अच्छै कंम कांनेरी कोशिश करा, ता कौ बि तुहां आत्माय मझ दुखी ना करि सकता। 14पण अगर असुनि अच्छै कंम कांने ला दुख मेईंता, ता असै सच मझ धन्य अत्तै। अगर बुराई कांनार मैहणु असु डरांतै, ता तैन्हांं हैरी मेईं डरा जा घबरा; 15पण यीशु मसीह अपड़ै प्रभु मनि करि अपड़ै मंना मझ मसीहरै तेईनी श्रद्धा रखा जां अगर कोई तुहां किना प्रभु यीशु मसीहरै बारै मझ, जै असेड़ि उम्मीद आ, ऐठणीरै बारै मझ पुछता; ता हमेशा प्रेम जां आदर सिंउ खुश भौ-करि प्रभुरै बारै मझ शुणाणेरै तेईनी तियार बेशा, केईनी कि ऐक्या असैड़ा कंम आ। 16जां अपड़ै मंन बि साफ रखा; केईनी कि जैन्हां गला केरै तेईनी मैहणु तुवाड़ी बदनामी कातै, तेठणिरै बारै मझ तैन्हांं तुवाड़ा मसीह मझ चाल-चलन तका करि, ऐपुवे शर्म भूंणी। 17अगर असेड़ै तेईनी परमेश्वरेरी ऐहै मर्जी आ, ता असेड़ै अच्छै कंमा केरी वजहि ला दुख सहन कांने असेड़ै तेईनी बधिया, केईनी कि बुरै कंम करि-करि दुख सहन कांना किना अच्छै कंम करि-करि दुख सहन कांने बधिया।
मसीहरा दुख
18आंउ ऐ ऐठणीरै तेईनी बोलता, केईनी कि मसीह बि असेड़ै पापा केरी वजहि दुख सहन केया जां मरि ग्या; सै सिर्फ अक बारी मरा जां ऐस दौहरांणैरी जरूरत ना। सै अक धर्मी मैहणु थ्या जै पापी मैहणुवां केरै तेईनी मरि ग्या ताकि असुवां परमेश्वरा किनि अंणि सकिया। तैन्हैं तेसैरा शरीर मारी छडा, पण परमेश्वरै सैक्या पवित्र आत्मायरी सामर्थी ला फिरी जींता करि दित्ता। 19तां तेसैरी आत्माय गहि करि तैन्हांं आत्माईयानि खुशखबरी शुणाय, जै तैस जगाय परमेश्वरै केईद क्यौरी अत्ति, जेठि मौरा मैहणुवां केरी आत्माय अत्ति। 20ऐ तैन्हांं मैहणुवां केरी आत्माय थी, जैन्हैं बड़ै टैंम पेहिलै परमेश्वरेरी आज्ञाय ना थी मनोरी। जेख्णी नूह जहाज बणांता थ्या, ता परमेश्वर आराम सिंउ इन्तजार काता थ्या, कि क्या सैक्यै होरै मैहणु अपड़ै पापा किना बदलेलै; पण सिर्फ अट्ठै मैहणु तैस खतरनाक जल-प्रलय किना बचै, बाकि सारै नाश भौ गेईथियै। 21पुराणै टैंमा मझ तेन्हैरा उद्धार, अबै असेड़ै उद्धारैरा अक उदाहरण आ जेख्णी असै बपतिस्मा लींतै। जैस पांणी मझ असै बपतिस्मा लींतै, सै असेड़ै शरीरा किना मैल दूर ना काता, पण ऐ ऐस गलैरा चिन्ह आ कि असै परमेश्वरा किना माफी मगि ताकि आघैरै तेईनी असैड़ा मंन परेशान ना रिय्हा। असुनि माफी मेयि सकती केईनी कि यीशु मसीह मरना किना बाद फिरी जींता भौरा। 22यीशु मसीह जींति करि स्वर्गा मझ परमेश्वरेरै देहिणै पासै आदर बाई जगाय पनि आ, जां तेसनी अबै सभनियांं स्वर्गदूता जां सभनियांं अधिकारिया जां सभनियांं आत्माईया पन राज्य कांनेरा अधिकार आ।
Currently Selected:
1 पतरस 3: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
