1 पतरस 2
2
जीवित घौड़ मतलब पवित्र विश्वासी मैहणु
1ऐठणीरै तेईनी हर प्रकारेरी बुराई जां बुरै वर्तावा किना दूर बेशा। होरनियांनि धोखा मेईं दिया, कवटी मैहणुवां सैयि मेईं बंणा। होरनियां केरा दुख मेईं करा जां कोसेरै तेईनी बि बुरी गलै बोलि करि बदनामी मेईं करा। 2जिहीं चारै जमौरू छोकरू अपड़ि मयिरू दुध पींणेरी कोशिश कातु, तिहियें चारै तुहां बि परमेश्वरैरा वचन शिख्रनैरी ईच्छा रखणी चेहिंथी, ताकि तुवे आत्मिक रूप सिंउ मजबूत भौ गहिया। ऐहीं कांने ला परमेश्वरै तुवे इस संसारेरी बुरी चीजा किना बचा लींणै। 3केईनी कि पवित्र शास्त्रा मझ लिखोरू आ, कि “तुहैं मैहसूस करि लियौरू आ, कि परमेश्वर भला आ।”
4-5तुवे प्रभु यीशु मसीह किनि यौउरै अत्तै। सैक्या एकि मैहलेरी खाई मझ रखियोरै एकि खास घौड़ा सैयि आ, पण सै जींता घौड़ आ, केही मैहणु तैस ना मनींथ्यै, पण परमेश्वरै सै चुणा जां तैस बड़ै अनमोल मनता। जां जिहीं चारै मैहणु घौड़ै ला घर बणांतै, तिहीं चारै परमेश्वर तुहां अकजुट करि एकि मंडली मझ जौड़ता जैस मझ परमेश्वरैरा आत्मा रींहथा, ताकि जै यीशु मसीह असेड़ै तेईनी कियु, तेनी ला तुवे तैन्हांं याजका केरी घाट जै बलिदान चढ़ांतै, ऐतियै कम करा जै परमेश्वरा खुश कातै। 6ऐ तिहियें आ जिहीं परमेश्वर पवित्र शास्त्रा मझ अपड़ै पुत्रेरै बारै मझ बोलता;
“तका, मीं अक कीमति घौड़ चुणौरा,
जै सिय्योन शहरेरी स्थापना कांनेरै तेईनी खाईरै घौड़ा सैयि रखता।
जां जै कोई तैस पन विश्वास करैला, सै कदि लज्जित ना भूंणा।”
7जै यीशु मसीह पन विश्वास कातै, तैन्हांं केरै तेईनी ऐ घौड़ बड़ा कीमति आ; पण जै तैस पन विश्वास ना कातै, तैन्हांं केरै बारै मझ पवित्र शास्त्रा मझ ऐ लिखोरू आ, कि
“राज मिस्त्रियै जै घौड़ बेकार समझि करि लांणा किना नमां करि दित्ता,
सैक्या घौड़ घरेरी खाईरा कूंणा बंणी ग्या।”
8जां फिरी पवित्र शास्त्र ऐ बि बोलता, “ऐ घौड़ मैहणुवंनी ठौकरिरा कारण भूंणा;
ऐ घौड़ अक चट्टान आ, जै तैन्हांं ढढ़ै गांहणैरी वजह भूंणा।”
सैक्यै वचना पन विश्वास कांना ना चांहथै, ऐठणीरै तेईनी सैक्यै ठौकर खा करि ढढ़ै चलि गांहथै,
परमेश्वरै तैन्हांं सिंउ ऐतियुऐ भूंणैरी योजना बंणाउरी आ।
9पण तुवे ऐतियै नत्तै, केईनी कि तुवे परमेश्वरेरै चुणोरै मैहणु अत्तै, परमेश्वरेरी राजैरै रूपा मझ सेवा कातै, जां ऐतियै मैहणु जै परमेश्वरा सिंउ सम्बंधित अत्तै। तेनी तुवे अन्धारू किना भेईर अपड़ि अदभुत ज्योति मझ शदाउरै अत्तै, ताकि तुवे परमेश्वरेरै अदभुत कंमा केरी घोषणा करि सकिया। 10भविष्यवक्तै होशे जै लिखोरू आ सै तुवाड़ै बारै मझ सच आ, कि
“अक टैंम थ्या जेख्णी तुवे परमेश्वरेरै मैहणु ना थ्यै, पण अबै तुवे परमेश्वरेरै मैहणु अत्तै।”
“पेहिलै तुवे परमेश्वरेरी दया ना जांणींथ्यै, पण अबै तुवे ऐस जांणतै, केईनी कि तेनी पेहिलै किना तुहां पन अपड़ि दया लुहाओरी आ।”
विश्वासिया केरै कंम
11हे भाईयो, आंउ तुहां सिंउ विनती काता, कि तुवे इस संसारा मझ परदेशी मैहणुवां सैयि अत्तै; ऐठणीरै तेईनी तुवे तैन्हांं सारी पाप बाई बुराईया जां शरीरेरी गलत ईच्छाय पूरी कांना किना बचा, जै तुवाड़ी आत्माईया सिंउ हमेशा गलत कंम कांनेरै तेईनी भिड़ियूंती रींहथी। 12होरनियां जातिया मझ तुवाड़ा व्यवहार अच्छा भूंणा चेहिंथा। केईनी कि जै अबै तुहांनि बुरै कंम कांनारै मैहणु बोलि करि आरोप लांतै, सैहै मैहणु जैस धियाड़ी परमेश्वर ऐईला तैस धियाड़ी तुवाड़ै अच्छै कंम तका करि परमेश्वरेरी महिमा कांनी।
परमेश्वरेरै दास
13प्रभु यीशु मसीहरी इज्जत कांनेरै तेईनी तुहां तैन्हांं सभनियां केरै आधीन बेशणु चेहिंथु, जै इस संसारा मझ अधिकारी अत्तै। राजेरै आधीन ऐठणीरै तेईनी बेशणु चेहिंथु, केईनी कि सैक्या सभनियां केरा प्रधान आ। 14जां राज्यपाला केरै बि, केईनी कि तैन्हांंनि ऐ हक बि राजा दींता, कि सैक्यै तैन्हांं मैहणुवंनी सजा दिया, जै गलत कंम कातै; जां तैन्हांं मैहणुवंनी ईनाम दिया, जै सही कंम कातै। 15केईनी कि परमेश्वर चांहथा, कि तुवे अपड़ै अच्छै व्यवहारेरै जरियै तुवाड़ै खिलाफ गलत आरोप लांणै बाऐ मैहणुवां केरू मुँह बन्द करि सकिया, जै परमेश्वरा ना जांणतै। 16अबै तुवे पापेरै गुलाम नत्तै, केईनी कि तुवे असेड़ै प्रभु यीशु मसीहरै जरियै आजाद करि दितोरै अत्तै। पण तुवे अपड़ि आजादिरा इस्तेमाल बुरै कंम कांनेरै तेईनी बहाना मेईं बंणा। बल्कि तुहां अपड़ै कंमै ला लुहानु चेहिंथु, कि तुवे सच मझ परमेश्वरेरै सेवक अत्तै। 17सभनियांं केरा आदर करा जां सभनियां विश्वासी भाईया सिंउ प्रेम रखा। परमेश्वरा हैरी डरा जां अधिकारिया केरा आदर करा।
मसीह सैयि जीवन
18हे घरा मझ कम कानारै मसीह विश्वासी सेवको, तुहां अपड़ै स्वामिरी आज्ञायरा पालन कांना चेहिंथा, जां हमेशा तेन्हैरा आदर कांना चेहिंथा, ऐतियै हर तराहिरै स्वामी सिंउ करा चाहै सैक्यै दयालु जां सही भुईया या क्रूर भुईया। 19अगर असै बिना गलती कांने दुख सहन कातै, ता परमेश्वर असु किना खुश भूंता। केईनी कि असै ऐ बुझि करि दुख सहन कातै कि परमेश्वर सभ किछ जांणता। 20पण अगर तुहां गलत कंम कांनेरी वजहि ला दुख सहन कांना पूंता जां मार खांणी ऐईंती जां ऐतियु करि-करि तुवे सब्र कातै, ता तुवाड़ी कोई आदर जां तारीफ ना भूंणी। हाँ! अगर अच्छै कंम कांनेरी वजहि ला तुवे ऐ दुख सहन कातै जां सब्र रखतै, ता परमेश्वर सच मझ खुश भूंता। 21परमेश्वरेरै जरियै तुहां शदाणेरै कारणा मझां अक कारण ऐक्या बि आ कि तुहां तेसेरै तेईनी तेख्णी बि दुख सहन करि लींणा जेख्णी तुवे भलै कंम कातै। मसीह जेनि तुवाड़ै तेईनी दुख सहन केया, सै ऐपुवे तुवाड़ै तेईनी उदाहरण दी गियौरा, तेतियै कंम करा जेतियै तेनी क्यै। 22पवित्र शास्त्रा मझ लिखोरू आ, कि “तेनी कोई बि पाप ना केया जां ना कदि तेनी छल-कवट करि-करि झूठ बौलु।”
23यीशु मसीहरा मैहणुवें अपमान केया; तेसनी गायि दित्ती, सैक्या मारा जां तेनी दुख सहन केया; तां बि यीशु मसीह तैन्हांं सभनियांनि माफ कियु जां तैन्हांं किना कोई बदला ना ल्या। तेनी अपड़ि मजतिरै तेईनी परमेश्वरा पन भरौसा केया; केईनी कि तैस पता थ्या, कि परमेश्वर जेख्णी न्याय काता, ता कोस सिंउ बि भेद-भाव ना काता। 24यीशु मसीहनी असेड़ै पापा केरी वजहि ला क्रूसा पन सजा दित्ती। ऐ परमेश्वरेरी मर्जी ला भूं; केईनी कि परमेश्वर चांहथा थ्या, कि असै पापा किना छुड़खी करि, धार्मिकता सिंउ अच्छु जींण, जींणु शुरू करि दिया। यीशु मसीहरै जख्मै ला, जै तेनी दुख सहन क्यै; तैन्हांं दुखा सहन कांने ला, असै ठीक भौ गियोरै अत्तै। 25असै पेहिलै तैन्हांं भटकोरिया भ्रैडा सैयि थ्यै, जै गलत बत्तै चलि गियोरी थी; पण अबै यीशु मसीहरै वापस ऐईंणै ला, असै सही बत्तै पन चलि यौउरै अत्तै। यीशु मसीह असेड़ि आत्माईया केरा अगुवा आ, जै असेड़ि चिन्ता काता जां असु तकांता रींहथा।
Currently Selected:
1 पतरस 2: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
