1 पतरस 4
4
बदलियोरा जीवन
1ऐठणीरै तेईनी जबकि यीशु मसीह शरीर धारण करि-करि दुख सहन केया, ता तुहां बि तेसैरी करामाति ला जै तैस मझ थी, तेनी ला दुख सहन कांनेरै तेईनी तियार बेशणु चेहिंथु। केईनी कि अगर तुवे यीशु मसीह सैयि दुख सहन कातै, ता तुवे पाप कांना किना छुड़खी गियै। 2ताकि तुवे अबै अपड़ा, जै जीवन बचौरा, तैस अपड़ि शारीरिक बुरी ईच्छाय पूरी कांनेरै तेईनी ना जिआ; पण परमेश्वरेरी मर्जी पूरी कांनेरै तेईनी जिआ। 3केईनी कि होरनियां जातिया केरै मैहणुवां सैयि बुरै कंम, लालच, अपड़ि मनमानी, भोग-विलास कांना मझ जां खांणा-पींणा मझ, मूर्ती पूजा कांना मझ पेहिलै किना जै टैंम असुवें बर्बाद केया; सैहै बड़ा भुआ। 4ऐन्हां चीजा किना अलग भूंणै ला तुवाड़ै दोस्त हैरान भूंतै, जेख्णी तुवे अबै तैन्हांं सिंउ ऐन्हां कंमा कांनानि ना गांहथै, जै ऐक्यै कातै। ऐठणीरै तेईनी सैक्यै तुवाड़ी बदनामी करि-करि तुवाड़ै बारै मझ बुरू बोलतै। 5पण अक धियाड़ी तैन्हांं पक्का परमेश्वरा किनि फैसलेरै तेईनी खड़ै भूंणु आ जां परमेश्वरा तैन्हांं सभनियां जींता-मौरा केरा न्याय कांना जां तैन्हांं किना जै तैन्हैं धरती पन कंम क्यौरै अत्तै, तेठणीरा हिसाब लींणा। 6ऐहै वजह आ, कि मौरै मैहणुवें बि यीशु मसीहरै बारै मझ खुशखबरी शुणि। बेशक तैन्हांं सभनियां मैहणुवंनी शरीर तौर पन सजा मेयि करि मरि गियै; पण अबै सैक्यै आत्माय मझ हमेशा परमेश्वरा सेईतै रींहथै।
परमेश्वरेरै अच्छै भंडारी
7सभनियां चीजा केरा अन्त जल्दी भूंणारा; ऐठणीरै तेईनी समझदार भौ-करि प्रार्थना कातै रिय्हा। 8जां सभनियां बडी गल ऐ आ, कि योकिया सेईतै सच्चै दिल सिंउ जादा-सै-जादा प्रेम करा; केईनी कि प्रेम हमेशा सभनियां पापा माफ करि दींता। 9सच्चै दिल सिंउ अपड़ा घरा मझ मेहमाना केरा आदर करा। 10हर मैहणुनी परमेश्वरै तेसैरी काबलियत तका करि अलग-अलग अनुग्रह दितौरा; तैन्हांं सैक्यै वरदान परमेश्वरैरा अच्छै भंडारिया सैयि मैहणुवां केरी सेवा कांनेरै तेईनी इस्तेमाल कांने चेहिंथै। 11अगर कौसकेनि वचन प्रचार कांनेरा वरदान आ, ता तैस परमेश्वरेरै वचनेरा सही प्रचार कांना चेहिंथा; अगर कौसकेनि सेवा कांनेरा वरदान आ, ता तेनी सामर्थी ला, जै तेसनी परमेश्वर दींता, सै मैहणुवां केरी सेवा करिया। ऐ जै किछ बि फिरी तुवे कातै, ऐनि ला प्रभु यीशु मसीह मझ परमेश्वरेरी महिमा भूंणी। सारी महिमा जां सामर्थ हमेशा-हमेशा तेईनी तेसैरी आ। आमीन।
मसीहरै दुखा मझ शामिल भूंणु
12हे विश्वासी भाईयो, जै दर्दनाक दुख तुवे सहन कातै, तेन्हैरै बारै मझ तुवे हैरान मेईं भुआ, केईनी कि तुवे मसीहरै अत्तै। पण ऐकेई गलै ऐ लुहानेरै तेईनी भूंती अत्ति कि क्या तुवे परमेश्वरा पन विश्वास कातै। ऐठणीरै तेईनी, ऐक्यु मेईं सौचा कि तुहां सेईतै किछ अजीब भूंतु आ। 13ऐन्हां दुखा मझ खुश रिय्हा, केईनी कि तुवे ऐन्हां दुखा मझ शामिल भुवै, जै मसीहनी मेओरै थ्यै। ऐठणीरै तेईनी मसीह जेख्णी मैहणुवंनी अपड़ि महिमा लुहानेरै तेईनी फिरी ऐईंणु ता सच मझ तुहां होरै जादा खुश भूंणु। 14फिरी अगर मसीहरू नाँईयेरै तेईनी तुवाड़ी निंदा बि भूंती, ता तुवे धन्य अत्तै; केईनी कि महिमायरी आत्मा, जै परमेश्वरेरी आत्मा, तुहां मझ आ। 15तुहां मझां कोई बि मैहणु हत्यारा, चौर, कुकर्मी या होरनियां केरै कंमा मझ रूकावट ना पेईदा करिया; ऐहीं कांने ला तैस दुख भौगणा पूंणा। 16पण अगर मसीह पिचोरै चलणै ला तुहां दुख सहन कांने पूंतै, ता शर्मा मेईं; पण खुशी मना जां परमेश्वरेरी महिमा करा, कि तुवे दुख सहन कातै अत्तै, केईनी कि तुवे मसीहरै अत्तै। 17केईनी कि अबै सै न्याय कांनेरा टैंम अईछी गियौरा, कि पेहिलै परमेश्वरेरै मैहणुवां केरा न्याय करियो। सौचा अगर सै पेहिलै असु विश्वासिया केरा न्याय करैला; ता तैन्हांं केरा क्यौता बुरा हाल भूंणा, जै परमेश्वरेरी खुशखबरी ना मनतै। 18जिहीं कि पवित्र शास्त्र बोलता, कि
“अगर अक धर्मी मैहणु बचांणा यौउता मुशिकल आ,
ता दुष्ट मैहणु जां पापी सही मझ हरा गांहणै?”
19ऐठणीरै तेईनी जै मैहणु तेतियै दुख सहन कातै जिहीं परमेश्वरेरी मर्जी भूंती, तैन्हांं हमेशा परमेश्वरा पनि भरौसा रखणा चेहिंथा, जेनि सैक्यै बंणाउरै अत्तै। परमेश्वर हमेशा सैहै काता जैस कांनेरा तेनी वायदा क्यौरा थ्या जां ऐठणीरै तेईनी जै भलै कंम अत्तै तैन्हांं हमेशा कातै रिय्हा।
Currently Selected:
1 पतरस 4: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
