1 पतरस 1
1
नमस्कार
1आंउ, पतरस, जै यीशु मसीहरा खास चैला आ, ऐ चिट्ठी आंउ परमेश्वरैरा तैन्हांं चुणौरा मैहणुवंनी लिखता, जै कि पुन्तुस, गलातिया, कप्पदूकिया, एशिया, जां बितूनिया प्रदेशेरा अलग-अलग शहरा मझ परदेशिया सैयि रींहथै। 2पिता परमेश्वरै बड़ै पेहिलै तुवे अपड़ै बंणाणेरै तेईनी जां पवित्र आत्मायरै कंमै ला तुवे पवित्र कांनेरै तेईनी चुणी लियौरै अत्तै। तेनी ऐहीं ऐठणीरै तेईनी कियु, ताकि तुवे यीशु मसीहरी आज्ञा मनियां, जां तेसेरै खूनै ला शुद्ध भौ गहिया। आंउ प्रार्थना काता, कि परमेश्वर तुहांनि अनुग्रह जां भरपूर शांति दिया।
अक जीवित आशा
3असेड़ै प्रभु यीशु मसीह जां पिता परमेश्वरैरा धन्यवाद भुईया, केईनी कि परमेश्वरै असु पन अपड़ि बड़ी दया करि-करि अक नवाँ जीवन दितौरा। केईनी कि परमेश्वरै यीशु मसीह मौरा मझां जींतैरा जां तेनी असै बड़ी हिम्मत सिंउ जींणेरै लायक बंणाउरै अत्तै। असै तैन्हांं चीजा हासिल कांनेरी पूरी उम्मीद करि सकतै, जै तेनी असुनि दींणैरा वायदा क्यौरा। 4असै तैन्हांं महान आशीषिया हासिल कांनेरै तेईनी भात्तै रींहथै, जै आशीषि परमेश्वरै स्वर्गा मझ अपड़ा मैहणुवां केरै तेईनी रखोरी अत्ति, जैड़ि सैकेई ना खराब भूंती ना मुकती। 5परमेश्वर अपड़ि बड़ी सामर्थी ला तुहां सम्भाय रखता, केईनी कि तुवे यीशु मसीह पन भरौसा रखतै। तैस लाष्ट धियाड़ी तेईनी जेख्णी यीशु मसीह वापस ऐईंणु, त्यो-तेईनी तुवे सम्भाय रखणै। तेख्णी तुहां पता लगी गांहणा, कि परमेश्वरै तुवे पापा जां मोउती किना पूरी तराहि सिंउ बचाउरै अत्तै। 6ऐठणीरै तेईनी तुहां ऐन्हां सभनियां गला केरै तेईनी खुश भूंणु चेहिंथु, बेशक ऐम्हीं थोड़े तियै टैंमेरै तेईनी अलग-अलग परेशानियां मझ तुवे दुखी अत्तै।
7परेशानि ऐठणीरै तेईनी अत्ति, कि तुवाड़ा जै विश्वास यीशु मसीह पन आ, ऐ सुन्नै किना बि जादा कीमति भुईया। जिहीं सुन्ना, जै अक धियाड़ी मुकि गांहथा, तैस बि आगी मझ सुटि करि शुद्ध कातै; तिहियें चारै अगर तुवाड़ा विश्वास तुवाड़ी परेशानियां मझ बि परखियुणैं ला सच्चा निकूंथा, ता जेधियां प्रभु यीशु मसीह वापस ऐईंणु, तेधियां तुवाड़ी तारीफ भूंणी, तुवाड़ा आदर भूंणा जां तुहैं ला यीशु मसीहरी महिमा भूंणी। 8बेशक तुहैं यीशु मसीह कदि लधौरा ना, पण तांबि तुवे तैस सिंउ प्रेम कातै। तुहां ऐम्हीं सै लाधी ना ऐईंता; पण तुवे तैस पन विश्वास कातै। विश्वास कांने ला जै महिमा मेईंती, तुवे तेसैरा यौउता आनन्द जां खुशी मनांतै जेसैरी गल बि ना ला सकतै। 9केईनी कि परमेश्वर तुहां पापेरी सजाय किना बचांता; ऐहै तुवाड़ै विश्वासैरा ईनाम आ।
10ऐसै उद्धारेरै बारै मझ भविष्यवक्ता होरू जादु जांणना चांहथै थ्यै। तैन्हैं शुणांउ, कि किहीं परमेश्वरा तुहां बचांणेरै तेईनी तुवाड़ै प्रति दयालु तरीकै जां अनुग्रह सिंउ कंम कांना, जेठणीरै तुवे लायक-ऐ नत्तै। तैन्हैं ऐन्हां चीजा केरा उत्तर तौपणेरै तेईनी जां शिख्रांणेरै तेईनी तकड़ी मैहनत की। 11मसीहरा आत्मा तैन्हांं मझ थ्या जां तैन्हांंनि शुणांता थ्या, कि मसीह किहीं दुख सहन कांने जां फिरी तेसनी बडा ईनाम दियूंणा। ऐठणीरै तेईनी तैन्हैं ऐ पता कांनेरी कोशिश की, कि मसीह केणु भूंणा जां ऐ सभ गलै केख्णी भूंणी जां किहीं चारै पूरी भूंणी। 12पण परमेश्वरै ऐन्हां भविष्यवक्तानि शुणांउ, कि तैन्हांं केरै संन्देश खुद अपड़ै तेईनी नत्तै पण तुवाड़ै तेईनी थ्यै। ऐ संदेश यीशु मसीहरै बारै मझीं सैकेई खुशखबरी आ, जै तुहैं पवित्र आत्माय किना अबै शुणि। परमेश्वरै स्वर्गा किना अपड़ा आत्मा भेईजा, कि सैक्या तुहांनि खुशखबरी प्रचार कांना मझ मैहणुवां केरी मजत करिया। ऐ योउतु अदभुत आ, कि स्वर्गदूत बि खुश भौ करि ऐन्हां गला पूरी भूंतै तकांतै अत्तै।
पवित्र जीवन जींणैरी बुलाहट
13ऐठणीरै तेईनी, जै किछ तुवे सौचतै तैस पन अपड़ा वश रखणा चेहिंथा। जां ऐहीं करि करि अपड़ि जिंदगिरा संचालन पूरी तराहि सिंउ आत्मविश्वास सेईतै करा। जां तैस उद्धारा हासिल कांनेरी पूरी उम्मीद कातै रिय्हा, जै परमेश्वरा अनुग्रह ला तुहांनि तेख्णी दींणा जेख्णी यीशु मसीह स्वर्गा किना वापस ऐईंणु। 14परमेश्वरेरी आज्ञाय मना, जिहीं अच्छै बच्चै अपड़ै बाबेरी गल मनतै। तैन्हांं बुरा कंमा मेईं करा, जै कंम तुवे परमेश्वरेरी सच्चाय जांणना किना पेहिलै अपड़ि बुरी ईच्छाय पूरी कांनेरै तेईनी कातै रिहींथियै। 15पण अबै तुहां हर कंमा मझ जै तुवे कातै, पवित्र भूंणु चेहिंथु, जिहीं कि परमेश्वर पवित्र आ जेनि तुवे अपड़ि संतान भूंणेरै तेईनी चुणै। 16केईनी कि पवित्र शास्त्रा मझ ऐ लिखोरू आ, कि परमेश्वरै बोलोरू आ “तुहां पवित्र भूंणु चेहिंथु केईनी कि आंउ पवित्र आ।”
17जेख्णी तुवे प्रार्थना कातै, ता तुवे परमेश्वरानि अपड़ा पिता बोलतै; पण याद रखा, कि सै भेद-भाव ना काता। ऐठणीरै तेईनी जबकि तुवे इस धरती पन परदेशी भौ करि रींहथै, ता तुहां परमेश्वरैरा डर मनि करि तेसैरा बड़ा आदर कांना चेहिंथा। 18केईनी कि तुहां पता, कि जै तुवे पापा मझ जींण जींतै अत्तै, सै तुवाड़ै विजुर्गा केरै टैंमा किना ऐतियु आ। पण तुवे ऐस पापा किना बचा लियौरै अत्तै। तुवे सुन्ना या चांदी दी करि नत्तै बचाउरै; केईनी कि सुन्ना-चांदी मुकि गांहथा; 19पण तुवे यीशु मसीहरै कीमति खूनै ला बचाउरै अत्तै, जै यीशु मसीह निर्दोष जां निष्कलंक थ्या। 20इस संसारेरी रचनाय किना पेहिलै, परमेश्वरै ऐ निर्धारित करि लेईथियु, कि यीशु मसीह छडाणै वा भूंणा। पण सै तुवाड़ी मजत कांननी ऐन्हां लाष्ट धियाड़िया मझ ऐस संसारा मझ या। 21जै किछ बि मसीह क्यौरू आ, तेनी वजहि ला तुवे अबै परमेश्वरा पन विश्वास कातै। जां तुहैं अपड़ा विश्वास जा उम्मीद परमेश्वरा पन रखौरी आ; केईनी कि तेनी मसीह मौरा मझां जींतैरी दित्ता जां तेसनी बड़ी जादी महिमा दित्ती। ऐठणीरै तेईनी तुवे विश्वास कातै जां परमेश्वरा मझ तुवाड़ी आशा अबै मजबूत आ।
22केईनी कि सच्चाईरा पालन कांने ला तुवे शुद्ध क्यै; अबै तुहां अपड़ै विश्वासी भाईया सिंउ निष्कपट प्रेम कांना चेहिंथा। योकिया सिंउ ज्यादा सै ज्यादा पूरै मंन सिंउ प्रेम कातै रिय्हा। 23केईनी कि तुहांनि परमेश्वरै अक नवाँ जीवन दितौरा। तुहांनि ऐ जीवन ऐतेई कुनि चीजै ला ना मेऔरा, जै नाश भौ गांहणी; पण ऐ जीवन असुनि यीशु मसीह ला, जै परमेश्वरैरा जीवित वचन आ, तेनी वचने ला मेऔरा। 24पवित्र शास्त्र ऐ बोलता,
“हर अक जीव, मैहणु घहा सैयि अत्तै,
जां सैक्यै बंणेरै छैआ फुला सैयि अत्तै;
घाह ता शुकि गांहथु जां फुलै भुणां झड़ी गांहथै।
25पण परमेश्वरैरा वचन जै यीशु मसीह आ, हमेशा बंणी रींहणा।” ऐ जै लिखौरा वचन आ, ऐहै यीशु मसीहरै बारै मझीं खुशखबरी आ, जै मैहणुवंनी शुणांतै जां प्रचार कातै।
Currently Selected:
1 पतरस 1: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
