1 कुरिन्थियों 2
2
क्रूसा पन चाढ़ोरै मसीहरै बारै मझ संदेश
1विश्वासी भाईयो, जेख्णी आंउ तुहांनि परमेश्वरेरै बारै मझ संदेश शुणांता या, ता मीं बडी-बडी गलै ना बोलि। मीं समझदार बंणनैरी कोशिश बि ना की। 2केईनी कि मीं ऐ सौचि लियौरू थियु कि आंउ सिर्फ यीशु मसीहरै जां क्रूसा पन तेसेरी मोउतिरै बारै मझ बोलता। 3हकीकत मझ आंउ तुहां सिंउ रींहथै टैंमा कमजौर, डरौरा थ्या जां मूंनी शिल्हणीं-कंपणी बि लगौरी थी। 4मिंडी शिक्षाय जां प्रचारा मझ मैहणुरी ज्ञान बाई चलाकिरी गलै ना थी; पण पवित्र आत्माय तुहांनि एकि सामर्थी तरीकै ला लुहाउ कि जै संदेश मीं तुहांनि शुणाउरा, सैक्या सच आ। 5ताकि तुवाड़ा विश्वास मैहणुरै ज्ञाना पन ना, पण परमेश्वरेरी सामर्थ्य पन निर्भर भुईया।
परमेश्वरैरा ज्ञान
6तांबि आंउ तैन्हांं मैहणुवां मझ तैस ज्ञान बाऐ संदेशैरी घोषणा काता, जै आत्मिक रूप सिंउ विश्वास मझ मजबूत आ, पण ऐ मैहणुवां केरा ज्ञान जां ऐस संसारैरा मैहणुवां केरा ज्ञान ना; जैन्हैरा नाश भूंणै वा। 7पण जैस ज्ञानेरी असै गल कातै अत्तै, सैक्या ज्ञान परमेश्वरैरा ज्ञान आ, जै गुप्त थ्या। ऐम्हीं तेईनी कोई बि ऐस ना जांणीथ्या। ऐत किना पेहिलै कि परमेश्वरै पृथ्वी बंणाय, तेनी पेहिलै किना फैसला करि लियौरा थ्या, तेसेरै ज्ञानै ला असुनि इज्जत मेईंणी।
8जै ऐस संसारेरै हाकिमा मझां कुनि बि परमेश्वरेरी योजना ना समझि, केईनी कि अगर जांणतै भुईं ता महिमा वा प्रभु क्रूसा पन ना थ्या चाढ़ना। 9पण पवित्र शास्त्रैरा ऐ अर्थ आ; कि जेख्णी सैक्यै बोलतै,
“ना कदि कुनिक्यै तकाउ, ना कदि कुनिक्यै शुणौरू आ
जां ना कदि कुनिक्यै तैन्हांं अदभुत चीजा केरी कल्पना क्यौरी आ,
जै परमेश्वरै तैन्हांं मैहणुवां केरै तेईनी तियार क्यौरी आ, जै तैस सिंउ प्रेम कातै।”
10पण परमेश्वरै ऐकेई गलै असु पन मतलब खास चैला पन पवित्र आत्माय ला प्रकट की; केईनी कि ऐतियु किछ बि ना जै परमेश्वरैरा आत्मा ना जांणता। यौ-तेईनी कि परमेश्वरेरै गहरै विचार बि पवित्र आत्मा जांणता। 11मैहणुवां मझां केणु कोसक्यै मैहणुरी गलै जांणता, सिर्फ मैहणुरी आत्मा जै तैस मझ आ? तिहियें सिवाय परमेश्वरेरै आत्माय बगैर हौरा कौ बि परमेश्वरेरै विचार ना जांणि सकता।
12असै तिहीं चारै ना सौचतै जा समझतै, जिहीं ऐस संसारेरै होरै मैहणु कातै; पण परमेश्वरै असुनि अपड़ा आत्मा दितौरा, कि असु तैन्हांं गला केरा पता लगिया, जै परमेश्वरै असुनि दितोरी अत्ति। 13जां ऐठणीरै तेईनी असै मतलब खास चैलै ऐन्हां गला होरनियां मैहणुवंनी शुणांतै। ता असै ऐन्हां गला केरा उपयोग ना कातै, जै गलै मैहणुरै ज्ञाना किना मेईंती, पण असै तैन्हांं गला शुणांतै जै परमेश्वरैरा पवित्र आत्मा असुनि शुणांता, जै आत्मिक ज्ञानै ला आत्मिक गलै समझांता। 14पण जैस मैहणु किनि परमेश्वरैरा आत्मा ना, सैक्या सच्ची आत्मायरी गलै ना मनता; केईनी कि सैकेई तेसेरी नजरी मझ मूर्खै बाई गलै अत्ति; केईनी कि अक मैहणु अपड़ि कीमत तेख्णी बुझि सकता, जेख्णी तैस मझ पवित्र आत्मा भूंता। 15सैक्या मैहणु जैन्हांनि पवित्र आत्मा मेऔरा, सैक्या तैन्हांं सभनियां चीजा समझि सकतै, जै पवित्र आत्मा शिख्रांता; पण जैन्हां मैहणुवां किनि पवित्र आत्मा ना, सैक्या तैन्हांं मैहणुवां केरी गलै ना समझि सकतै जैन्हां किनि आत्मा। 16ऐ सच आ, केईनी कि जिहीं पवित्र शास्त्रा मझ लिखोरू आ;
“कोई बि ऐ ना जांणि सकता कि प्रभुरै मंना मझ कितु आ। कौ तेसनी सलाह ना दी सकता?” पण असै विश्वासी समझि सकतै कि मसीहरै मंना मझ कितु आ।
Currently Selected:
1 कुरिन्थियों 2: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
