1 कुरिन्थियों 1
1
नमस्कार
1आंउ पौलुस ऐ चिट्ठी लिखता, आंउ परमेश्वरेरी ईच्छाय सिंउ चुणियोरा, कि आंउ प्रभु यीशु मसीहरा खास चैला बणूं। आंउ ऐठि अपड़ै विश्वासी साउगी सोस्थिनेस सिंउ आ, जै मिंडी मजत काता। 2आंउ ऐ चिट्ठी परमेश्वरेरी कलीसियेरा तैन्हांं विश्वासियनि लिखता, जै कुरिन्थुस शहरा मझ अत्तै; जै परमेश्वरै अपड़ै रूपा मझ अलग क्यौरै अत्तै। सैक्यै यीशु मसीह मझ अक कांनेरै तेईनी जां तेसेरै अपड़ै पवित्र मैहणु भूंणेरै तेईनी शदाउरै अत्तै; जिहीं-चारै तेनी होरै चुणोरै अत्तै, जै असेड़ै प्रभु यीशु मसीहरी हर जगाय अराधना कातै; केईनी कि सैक्या असु सभनियांं केरा प्रभु आ। 3आंउ प्रार्थना काता, कि असेड़ै पिता परमेश्वर जां प्रभु यीशु मसीहरी तरफ सिंउ तुहांनि अनुग्रह जां शांति मेईंती रिय्हा।
मसीह मझ आशीषै
4आंउ तुवाड़ै बारै मझ अपड़ै परमेश्वरैरा हमेशा धन्यवाद काता रींहथा, केईनी कि परमेश्वरै तुहांनि यीशु मसीह मझ अक भूंणैरी वजहि ला सारै अनुग्रह दितोरै अत्तै। 5केईनी कि तुवाड़ा यीशु मसीह सिंउ गहरा सम्बंध आ, परमेश्वरै तुहांनि बड़ै प्रकारेरी काबलियति दितोरी अत्ति; ऐत मझ यीशु मसीहरा संदेश प्रचार कांनेरी काबलियत जां तेसेरी आत्माय सिंउ सभनियां चीजा केरै बारै ज्ञान शामिल आ। 6सै खास काबलियति, जै परमेश्वरै तुहांनि दितोरी अत्ति, ऐ साबित काति कि मसीहरै बारै मझ संदेश सच आ। 7जां ऐनि वजहि ला पवित्र आत्माय तुहांनि सैकेई सारी काबलियति दितोरी अत्ति, जैन्हैरी तुहां जरूरत आ, हलाँकि तुवे असेड़ै प्रभु यीशु मसीहरै वापस ऐईंणैरा इन्तजार कातै अत्तै। 8परमेश्वरा तुवे लाष्टी तेईनी विश्वासा मझ मजबूत रखणै, ताकि जेख्णी असेड़ै प्रभु यीशु मसीह दुबारे वापस ऐईंणु ता तुवे निर्दोष ठहरिया। 9परमेश्वरा ऐहीं कांनु, केईनी कि सैक्या जै बोलता, तैस कांनेरै तेईनी विश्वासयोग्य आ जां तेनी तुवे अपड़ै पुत्र, असेड़ै प्रभु यीशु मसीहरी संगती मझ शदाउरै अत्तै।
कलीसियै मझ गुटबन्दी
10मिंडै विश्वासी भाईयो, आंउ असेड़ै प्रभु यीशु मसीहरै अधिकारै ला तुहां सिंउ विनती काता, कि तुहां सभनियां योकिया केरी गल मनणी चेहिंथी जां तुवाड़ी अकै गल जां अकै मकसद भुईया, जेनि ला तुवे योकिया सिंउ मिलि-जुलि करि रिय्हा। 11केईनी कि मिंडै विश्वासी भाईयो, खलोएरै परिवारेरै मैहणुवें मूंनी तुवाड़ै बारै मझ शुणाउरू आ कि तुहां योकिया मझ लड़ाई-झगड़ै भूंतै अत्तै। 12मिंडै बोलणैरा मतलब ऐ आ, कि तुहां मझां कोई ता अपड़ै आपानि बोलता, कि “आंउ पौलुसैरा चैला, ता कोई बोलता कि, आंउ अपुल्लोसैरा चैला” ता कोई बोलता, कि “आंउ कैफा पतरसैरा चैला, ता कोई बोलता, आंउ मसीहरा चैला।” 13ऐकेई गल अच्छी ना, केईनी कि मसीह हिस्सै मझ ना बंडियोरा। ऐक्या पौलुस ना थ्या जै तुवाड़ै तेईनी क्रूसा पन मुआ, क्या तुहैं मिंडै चैलै बंणनेरै तेईनी बपतिस्मा लियौरा थ्या? 14आंउ परमेश्वरैरा धन्यवाद काता कि मीं क्रिस्पुस जां गयुस ऐन्हां दुवां भाईया छडि करि तुहां मैहणुवां मझां कोसनि बि बपतिस्मा ना दिता। 15फिरी कोई बि ऐहीं ना बोलि सकता कि तुवे मिंडै चैलै बंणी करि बपतिस्मा लींतै थ्यै। 16जां हाँ, मूं ऐम्हीं याद यैई कि मीं स्तिफनासेरै घरेरै मैहणुवंनी बि बपतिस्मा दितौरा; ऐन्हां छडि करि मूं ना पता कि मीं कौसकेनि बपतिस्मा दितौरा। 17केईनी कि मसीह आंउ बपतिस्मा दींणेरै तेईनी ना, पण खुशखबरी शुणाणेरै तेईनी भेईजौरा जां जेख्णी आंउ खुशखबरिरा प्रचार काता, ता आंउ बोलणा मझ अपड़ि काबलियतिरा उपयोग ना काता; पण मैहणु मूं सिर्फ मिंडी काबलियतिरै कारण मनतै जां सैक्यै क्रूसा पन मसीहरी मोउतिरी शक्तिरै बारै मझ ना जांणतै।
मसीहरी शक्ति जां परमेश्वरैरा ज्ञान
18केईनी कि जै मैहणु परमेश्वरा किना अलग करियूंणै, तैन्हांंनि सजा मेईंणी, सैक्यै क्रूसा पन मसीहरी मोउतिरी कीमत ना जांणतै; पण असेड़ै तेईनी जै ऐम्हीं बचायूंतै अत्तै, असु ऐ पता कि ऐ परमेश्वरेरी शक्तिरा प्रमाण आ। 19केईनी कि पवित्र शास्त्रा मझ परमेश्वर बोलता, कि “मूं ज्ञानियां मैहणुवां केरा ज्ञान नाश करि दींणा, जां समझदारा केरी समझ बेकार करि दींणी।”
20जां असै ऐनि गलै ला समझतै कि जै बुद्धिमान अत्तै, तेन्हैरै ज्ञानेरी कोई कीमत ना; मूसेरी व्यवस्था शिख्रांणारा शास्त्रिया केरी बि कोई कीमत ना जां ऐस संसारा मझ ऐतिया मैहणुवां केरी बि कोई कीमत ना, जै गलै कांना मझ चालाक अत्तै; केईनी कि परमेश्वरेरै सांमणै ऐस ज्ञानेरी कोई कीमत ना। 21केईनी कि परमेश्वरै अपड़ै ज्ञानेरै अनुसार ऐ तकाउरू आ, कि मैहणुरै ज्ञानै ला संसार तैस कदि ना जांणि सकता। ऐठणीरै तेईनी परमेश्वरा ऐ बधिया लगु कि ऐस खुशखबरिरै प्रचारैरा प्रयोग तैन्हांं सभनियांं केरै उद्धारेरै तेईनी करिया, जै विश्वास कातै; हलाँकि किछ मैहणु ऐस मूर्खता समझतै।
22ऐ यहूदी मैहणुवां केरै तेईनी मूर्खता बाई गल लगती, केईनी कि सैक्यै ऐस सच्चाई साबित कांनेरै तेईनी स्वर्गा किना चिन्ह चांहथै जां होरी जातिरै मैहणु ज्ञानेरी खोजि मझ अत्तै। 23पण असै ऐक्या प्रचार कातै कि मसीह असुवां असेड़ै पापा किना छडांणेरै तेईनी क्रूसा पन मरि ग्या; केईनी कि सैक्यै सोचींथ्यै कि मसीह सदा जींता रींहणा, ऐठणीरै तेईनी यहूदियै विश्वास ना करिया, कि यीशु ऐ मसीह थ्या। होरनियां जातिया केरै मैहणु सौचतै कि ऐ अक मूर्खै वा संदेश आ। 24पण जै कोई परमेश्वरै अपड़ै मैहणु भूंणेरै तेईनी शदाउरै अत्तै, चाहै यहूदी या होरी जाति दोईयो केरै तेईनी ऐहै यीशु मसीह-ऐ परमेश्वरेरी सामर्थ जां ज्ञान आ। 25केईनी कि परमेश्वरेरी मूर्खता मैहणुवां केरै ज्ञाना किना जादी ज्ञानवान आ जां परमेश्वरेरी कमजोरी मैहणुरी शक्ति किना जादी ताकतवर आ।
26मिंडै विश्वासी भाईयो, ऐस बारै मझ सौचा, कि तुवे क्या थ्यै, जेख्णी परमेश्वरै तुवे चुणथियै; मैहणुवां केरी नजरी मझ तुवे ज्यादा ज्ञानवान ना थ्यै जां ना जादै सामर्थी थ्यै जां ना समाजा मझ तुवाड़ा त्यौता रुतबा थ्या। 27पण ज्ञानवान जां शक्तिशाली मैहणुवां लज्जित कांनेरै तेईनी परमेश्वरै सैक्यै मैहणु चुणीं लियै, जै संसारेरी नजरी मझ मूर्ख जां कमजौर अत्तै। 28परमेश्वरै सैक्यै चुणै, जै संसारेरी नजरी मझ नीच अत्तै, तुच्छ अत्तै जां जैन्हैरी कि गिणती ऐ ना सै बेकार करि दिता जै बड़ा जरूरी समझियुंता। 29परमेश्वरै ऐहीं कियु ताकि कोई बि प्राणी परमेश्वरेरै सांमणै घमंड ना करिया। 30पण परमेश्वरै तुवे यीशु मसीह सिंउ अकजुट क्यौरै अत्तै, जां मसीह ला सैक्या असुनि अपड़ा ज्ञान दींता। परमेश्वर बि असु तेसेरी नजरी मझ धर्मी बंणाता। यीशु मसीहरै द्वारा असै पवित्र बणायूंतै जां सैक्या असुनि पापा किना छुटकारा दींता। 31ऐठणीरै तेईनी जिहीं पवित्र शास्त्रा मझ लिखोरू आ, कि “अगर कोई घमण्ड कांना चहिया ता सैक्या प्रभु मझ घमण्ड करिया।”
Currently Selected:
1 कुरिन्थियों 1: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
