1 कुरिन्थियों 3
3
कलीसिया मझ गुटबन्दी
1विश्वासी भाईयो, जेठि तेईनी मिंडी गल आ, मीं तुहां सिंउ तिहीं चारै गलै ना की, जिहीं आत्मिक मैहणुवां सिंउ कातै। मूं तुहां सिंउ तिहीं चारै गलै कांनी पेई, जिहीं संसारिक मैहणुवां जां मसीह मझ नवाँ विश्वासिया सिंउ कातै। 2मीं तुहांनि सिर्फ परमेश्वरेरै वचने ला बुनियादी शिक्षा दितोरी आ। जिहीं अक मैहणु एकि हल्कै बच्चैनी पींणेरै तेईनी सिर्फ दुध दींता, ना कि रोटी दींता; तिहियें मीं बि तुहांनि वचनेरी गहरी शिक्षा ना दित्ती, केईनी कि तुवे तैस टैंमा ऐतेई शिक्षा लींणनी जां समझणनी तियार ना थ्यै।
3केईनी कि तुवे ऐम्हीं बि अपड़ै पाप बाऐ स्वभाव मझ जींण जींतै। मूं ऐ पता, केईनी कि तुहां मझा बड़ै सारै मैहणु जलन कांनार जां योकिया सिंउ भिड़ियूंतै; ता ऐनि ला क्या ऐ साबित ना भूंतु कि तुवे अपड़ै पाप बाऐ स्वभावेरै वशा मझ अत्तै? जां क्या तुवे ऐस संसारैरा मैहणुवां सैयि जींण नत्तै जींतै? 4जेख्णी कौ बोलता, कि “आंउ पौलुसैरा” जां कौ बोलता, “आंउ अपुल्लोसैरा” ता क्या तुवे संसारेरै मैहणुवां सैयि जींण नत्तै जींतै?
5ता फिरी अपुल्लोस केणु आ? जां पौलुस केणु आ? असै सिर्फ परमेश्वरेरै सेवक अत्तै, असेड़ि बदौलत मैहणुवें मसीह पन विश्वास केया। असु मझ सभनियें सैहै कंम केया, जै परमेश्वरै असुनि कांनेरै तेईनी दित्ता। 6तुहांनि परमेश्वरैरा संदेश शुणांणार आंउ पेहिला मैहणु थ्या, ऐठणीरै तेईनी आंउ तैस मैहणु सैयि आ जेनि पट्टि मझ बी बाउ। तेठां किना बाद, अपुल्लोसै तुहांनि तुवाड़ै विश्वासा मझ मजबूत भूंणनी मजत की, ठीक तिहियें जिहीं अक हौरा मैहणु तैन्हांं बुटियनी पांणी दींता जै मोटियूंती अत्ति। पण परमेश्वरै तुहांनि नवाँ जीवन दितौरा जां तुहां आत्मिक रूपा मझ बधणेरै तेईनी मजत काता, जिहीं परमेश्वर बुटिया मौटैता। 7ऐठणीरै तेईनी ना ता बुटि लांणार खास आ, ना पांणी दींणार खास आ, पण सिर्फ परमेश्वर-ऐ खास आ, जै तैस बुटि मौटैता।
8मीं तुहांनि खुशखबरी शुणाय जां परमेश्वरैरा वचन पढ़ाणां शुरू केया, जां अपुल्लोसै तुहांनि पढ़ाणु जारी रखु। पण असु दोईयो केरा अकै मकसद आ: पण जै बुट्टी लांता तेसैरी कीमत जां जै पांणी दींता, तेन्हैरी कीमत अक समान आ, जां परमेश्वरा ऐन्हां दोईयोनि ऐन्हैरै कंमेरै मुताबिक ईनाम दींणा। 9केईनी कि असै दोईयो किट्ठै परमेश्वरेरै तेईनी कंम कातै जां कुरिन्थ शहरेरै विश्वासियो तुवे एकि पट्टी सैयि अत्तै, जै पट्टी परमेश्वरैरी आ। जां आंउ तुवाड़ी तुलना एकि घरा सिंउ बि करि सकता, जैस परमेश्वर बंणाता।
10परमेश्वरै जै कंम मूंनी कांनेरै तेईनी दितौरा, मीं सैक्या बुद्धिमानी सिंउ केया; मीं तुवाड़ै शहरा मझ खुशखबरिरा प्रचार केया जां तुहां किना पेहिलै मैहणुवंनी यीशु मसीह पन विश्वास कांनेरै तेईनी तेन्हैरी मजत की। तेड़ां किना बाद होरनियां विश्वासी भाईयै सैक्या कंम जारी रखा, जै मीं शुरू क्यौरा थ्या। पण असु सभनियांं विश्वासिया जुगतीं विचार कांना चेहिंथा, कि असु परमेश्वरेरै कंम किहीं कांने चेहिंथै। 11ऐस घरा मझ, जै बंणाणु लाउरू आ, यीशु मसीह तैस घरेरी खाई सैयि आ। ऐठणीरा मतलब ऐ आ, कि यीशु मसीह-ऐ अक सैहै बत्त आ, जेनि ला मैहणु परमेश्वरा जांणि सकतै।
12अगर मसीहरै सेवक परमेश्वरेरी दितोरी सच्ची शिक्षा शिख्रांतै, ता सैक्या तैस घरा बणांणारै सैयि आ, जै सुन्ना, चांदी या कीमति घौड़ जेतेई अच्छी किस्मिरै समानै ला खाई भरतै। पण अगर सैक्यै झूठी शिक्षा शिख्रांतै, ता सैक्या तैस घरा बंणाणारै सैयि अत्तै, जै लकड़ी, घाह-कू जेतियै खराब समानै ला खाई भरतै। 13पण जेख्णी मसीह न्याएरी धियाड़ी दुबारे वापस ऐईंणु ता, तेसेरी आगी ला सभनियां केरै कंम परखियुणैं। अगर कोसक्यै मैहणुरै कंमेरी कोई कीमत आ, ता सै आगी लुहाई दींणी। 14पण अगर जेनि सेवकै खाई भरतै कंम क्यौरा जां तेसैरा क्यौरा कंम ना फुकियूंता, ता तेसनी ईनाम मेईंणा।
15पण जेख्णी मसीह बोलता, कि अगर एकि सच्चै सेवकै जै क्यौरू आ; सै बधिया ना, परमेश्वरा तेसनी कोई ईनाम ना दींणा, हलाँकि तैसरा सैक्या अनन्त जीवन ना मुकणा, जै परमेश्वरै दितौरा। 16हकीकत मझ तुहां पता, कि तुवे परमेश्वरैरा मन्दिर अत्तै जां परमेश्वरैरा आत्मा तुहां मझ वास काता। 17अगर कोई मैहणु तुहां, जै परमेश्वरैरा मन्दिर आ, तैस किना अलग काता ता परमेश्वरा तेसनी भयानक सजा दींणी; केईनी कि परमेश्वरैरा मन्दिर पवित्र आ जां सै तुवे अत्तै।
संसारिक ज्ञाना किना बचा
18अगर तुहां मझियां कोई सोचिया कि तुवे ऐस संसारैरा मैहणुवां मझ बड़ै समझदार अत्तै, ता तुहां ऐस संसारैरा मैहणुवां मझ मूर्ख बंणी गांहणु चेहिंथु। ऐठणीरै तेईनी कि तुवे परमेश्वरेरी नजरी मझ अपांणा समझदार बंणा सकिया। 19केईनी कि सच ऐ आ, कि संसारिक ज्ञान परमेश्वरेरी नजरी मझ मूर्खता आ; जिहीं पवित्र शास्त्रा मझ लिखोरू आ, कि “परमेश्वर-ऐ आ, जै बुद्धिमान मैहणुवां तेन्हेरी चलाकि मझ फसाय दींता।” 20जां पवित्र शास्त्रा मझ ऐ बि लिखोरू आ, कि “प्रभु बुद्धीमाना केरै मंना मझीं गलै जांणता, कि सैकेई बेकार अत्ति।” 21ऐठणीरै तेईनी मैहणुवां मझियां खास अगवो केरै बारै मझ घमण्ड कांना जां तैन्हांं पिचोरै चलणु छडि देया, केईनी कि परमेश्वरै तुहांनि सभ-किछ तुवाड़ी भलाईरै तेईनी दी दितोरू आ। 22खास करि चाहै आंउ पौलुस, क्या अपुल्लोस, क्या कैफा जेसैरू नाँ पतरस बि आ जां ऐस संसारेरी चीजै, चाहै तुवे मरि गहिया या जींतै रिय्हा, चाहै वर्तमान या भविष्य, तुहांनि ऐ सारी चीजै परमेश्वरै तुवाड़ी भलाईरै तेईनी दितोरी अत्ति। 23तुवे मसीहरै आधीन अत्तै, जां मसीह परमेश्वरेरै आधीन आ।
Currently Selected:
1 कुरिन्थियों 3: CDJNT
Highlight
Copy
Compare
Share
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
