Apocalipsis 11

1Are uri xya' jun pajb'al pin-ab', pacha jun tani, xaq xb'ix chwe: Chatwalijoq, chapaja i rachoch i Dios xaq i sujb'al sipon, xaq chawajlaj ni'pa i winaq ketijin chukojik u'ij i Dios chila. 2Xwiri mapaj uwaja re i rachoch i Dios, man ile yatal chke i winaq chi nti Dios ku'. Ike, oxib' junab' ru' nik'aj#11.2 Xub'ij warali, keb' kawinaq (42) ik' chi ke'eloq oxib' junab' ru' nik'aj. kkiqajsaj ni u'ij i ch'am laj tinimit. 3Xwiri, yin keintaq b'i keb' ajsaqinel tzij chi kikojom ki'u' as, chuya'ik i tzijonik re k-on panoq re oxib' junab' ru' nik'aj. Keje xub'ij i Dios ile chwe.

4I je keb' ajsaqinel tzij le, je are i pacha keb' uche'lal olivo#11.4 I aj Israel winaq keta'am chi je o keb' profeta je tak'al chwach Ire. I mam Zacarías, chi profeta, ub'im kanoq chi i keb' le je pacha keb' uche'lal olivo chwach i Dios. chi je o chwach i Dios, xaq i keb' tzuk'b'al chi xaq o chwach Ire, chi Rajaw i jyub' ta'aj.#11.4 Cf. Zacarías 4.1-3,11-14. 5We o jun kraj ku'an k'ax chke, ktiki ti chu'ankil, man o ni a' kel pkichi' ike, porb'al re pachin kraj ku'an k'ax chke. Keje ni kikamsaxik ile kki'an chke ni'pa i je ajch'oj ku'. 6Xaq o pki'ab' kkitz'apij i kaj man keje ile kpe ti jab', tz'aqat kki'an kipatan chub'ixkil utzij i Dios. Xaq o pki'ab' kki'an kik' che uwach i ya, xaq kkikoj itzel taq k'ax chwach i jyub' ta'aj xa ni'pa taq mul kkaj u'ankil.

7Xwiri are keutzin chub'ixkil i saqil laj tzij, jun nim laj itzel chikop kel li pa nim laj jul chi jaqtal kanoq; ku'an ni ch'oj ku', xaq ktiki ni chke, xaq keukamsaj na. 8Te'uri i kich'akul ike le, to' kekanaj kan pa taq b'e chila pa nim laj tinimit Jerusalén, pa xripik xaq xtz'aw wi i Ajwal. I tinimit le ke'eloq lik utz taj; kmajaw ni uri che we kb'ix “Sodoma” che, o we kb'ix “Egipto” che. 9Ni'pa i winaq re ronojel taq tinimit, ronojel taq ulew, ronojel taq kijayil, ronojel taq ch'ab'al, ike to' kekitaqej i kamnaq je o pa b'e; keje kki'an ni ile oxib' ij ru' nik'aj. Kkiya taj chi kemuqik. 10Ni'pa i je re uwach i jyub' ta'aj lik kekikot na rumal kikamik i keb' le. Rumal i kikikotemal kkiya kisipon chkiwach, man i winaq re uwach i jyub' ta'aj lik xek'achir ni kumal i keb' profeta le.

11Xwiri, are xik'aw oxib' ij ru' nik'aj, i Dios xuk'unsaj chik saq chkiwach, xaq xewalij chik; xaq ni'pa i xkil ile lik xkixij ni kib' rumal. 12Te'uri i keb' profeta le xkita jun nim laj ch'awb'al chikaj chi kb'ix chke: “¡Chixel li chikaj”; Ike xe'el b'i chikaj pa sutz'. I je ajch'oj chkij lik xekilo. 13Are uri juntir xpe jun nim laj kab'raqan; ni'pa i ja pa tinimit, xewulij lajuj unimal che i tinimit. Je lajujwinaq wuqlajujmo' (7,000) winaq xekam ni rumal i kab'raqan le. Ni'pa i winaq chi k'a xek'asi kanoq, lik xkixij ni kib'; te'uri lik xkikoj ni u'ij i Dios aj chikaj.

14Keje ile xk'is ni ukab' k'ax chi ub'im i ángel; xwiri juntir kk'un chik i urox k'ax.

Uch'awsaxik i uwuq trompeta

15Te'uri i uwuq ángel xuch'awsaj u-trompeta, xaq xtataj jub'an ch'awb'al chila chikaj. Ko xkib'ij:

I ajawinik re konojel i tinimit chwach i jyub' ta'aj

o chik pu'ab' i Qajwal Dios, xaq pu'ab' i Cristo.

Ire ku'an ni rajawinik k-e ij saq chrij.

Keje ile xkib'ij.

16Te'uri i kajib' juwinaq (24) nimaq taq winaq chi je kul pa kikub'ib'al chi o u'ij chwach i Dios, ike xexuki chwach i Dios; xkiqajsaj kijolom k'a chwach ulew i xkikoj u'ij. 17Xkib'ij:

Yet, Ajwal Dios chi Ronojel Kattiki Che,

yet chi ax at o wi, xaq are at o wo'or,

kqatioxij chawe man ak'amom i nim laj acho'ab',

xaq ajeqom u'anik a'atb'al tzij.

18I winaq chwach i jyub' ta'aj lik petnaq koywal,

xwiri, nti k-ono man ya xuriq i ij chi lik xpe awoywal.

Ya xuriq i ij ka'at ni tzij pkiwi i je kamnaq, wach i ki'anom.

Ya xuriq i ij chi kaya ni kisipon i je aj-anol achak, ike chi profeta,

ike chi kijachom kik'aslemal chawe,

ike chi kkikoj a'ij,

ni'pa i nimaq xaq i ch'utiq;

xaq ya xuriq i ij kasach ni kiwach ike chi ketijin chuyojik uwach i jyub' ta'aj.

Keje ile xkib'ij i nimaq taq winaq chwach i Dios.

Ilanik pa wachij re yijb'al ib'

19Te'uri, xintaqej i xwil i chom laj rachoch i Dios chila chikaj jaqal na; xaq chila pa ja xwil wi i lo'laj kaxa chi o i utrat i Dios chupam. Are uri, xpe urep a', xaq xpe i kraqlaj ray, xaq jub'an chik ch'awb'al, xaq xpe jun kab'raqan, xaq xpe jun nim laj jab' lik saqb'ach upam.

Currently Selected:

Apocalipsis 11: ACHICUB

Highlight

Compare

Copy