Apocalipsis 12

I ixoq

1Te'uri x-aljin jun nim laj k'utb'al re chwa kaj: O jun ixoq upasim rib' chupam i ij, lik pacha u'u' u'anom che; i ik' o chuxe' i raqan, xaq o jun koron chi o kab'lajuj ch'umil che. 2I ixoq le, raxwinaq, ksik'in rumal uk'axk'ol; lik uyej kutij rumal ralaxik i rak'al.

Jun nim laj itzel kumatz chi dragón ub'i

3Are uri x-aljin chik jun k'utb'al re chwa kaj: Keje pacha jun nim laj itzel kumatz kaq rij chi dragón ub'i. O wuqub' ujolom, lajuj rok'a', xaq o jun koron chkijujunal i wuqub' ujolom. 4Ru' uje, xumes li urox uk'iyal i ch'umil chikaj; te'uri xuk'aq li chwach i jyub' ta'aj. I nim laj itzel kumatz le xk'iji chwach ixoq chi ya kk'iji rak'al, man kutij b'i rak'al are kalaxik. 5Te'uri ixoq, xk'iji rak'al, ral ala. I upatan i rak'al le, are u'atik tzij pkiwi konojel taq i tinimit ru' jun ch'amiy ch'ich'.#12.5 Apocalipsis 19.15. Cf. Salmos 2.9. Xwiri, xaqte'et i rak'al i ixoq le xmaj b'i che, xk'am b'i ru' i Dios chila pa o wi i ukub'ib'al chi o u'ij. 6Te'uri i ixoq x-anmajik, x-e pa tz'inilik jyub' chaqij chi uyijb'am i Dios che, re tob'al rib'. Chila kk'iji wi oxib' junab' ru' nik'aj#12.6 I mer tzij xub'ij are: “Oxwinaq oxmo' (1,260) ij uwach.”; xaq lik utz utzuqik x-anik.

7Te'uri xwil jun nim laj ch'oj chila chikaj. Je are i ángel junam ru' i kaj-atzil, chi are i ángel Miguel#12.7 Daniel 10.13,21; 12.1; Judas 9., xki'an ch'oj ru' i nim laj itzel kumatz. I nim laj itzel kumatz le xaq je o u-ángel ru', lik xki'an ch'oj chkij i utz laj taq ángel. 8Xwiri, i ángel Miguel junam ku' u-ángel xetiki chuqajsaxik kicho'ab' i jub'an, lik xkiya ti chik chke kek'iji chila chikaj. 9I nim laj itzel kumatz#12.9 Cf. Génesis 3.1-5. xk'aq li uri chwach i jyub' ta'aj. Ire le are i nim laj itzel kumatz chi ax o wi chi “Itzel” kb'ix che, xaq “Satanás”. Ire le are ajt'oronel re ronojel uwach i jyub' ta'aj. Xwiri xk'aq li chwach i jyub' ta'aj junam ku' u-ángel. 10Are uri xinta jun nim laj ch'awb'al chikaj, chi xub'ij:

¡Ya o chik i totajik chqe yoj!

¡I Dios u'aljinsam i nim laj ucho'ab'! ¡U'aljinsam chi Ire are i nim laj atol tzij!

¡Xaq u'aljinsam rajawinik chi o pu'ab' i Jun chi u'ulum Ire, chi Mesías ub'i!

Alaj ile, man ya resam chub'i itzel,

chi to' kukoj kimak i winaq; man

ire le lik chipa'ij chicha'ab' to' kukoj kimak i qachalal chwach i Dios.

11Xwiri, i qachalal chwach i Cristo xetiki chuqajsaxik u'ij;

lik xetiki che rumal ukik'el i Ral Chij chi xkamsaxik chi Tol qe,

xaq ru' i tzijonik chi ki'aljinsam uwach, junam ru' i wach taq ki'anom, rumal utzij i Dios chi lik qatzij.

Ike, k'ax ti xkina i kik'aslemal chwach i jyub' ta'aj, are i xki'ano,

xkiya kib' chwach i kamik rumal ub'ixkil utzij i Dios.

12¡Lik chixkikotoq,

yix chi ix aj chikaj!

Xwiri ¡to' iwach yix chi ix jeqel chwach i jyub' ta'aj, xaq i yix chi ix aj pa mar!

Man i Itzel qajnaq chik iwu' yix. Ire, lik nim ni roywal petnaq,

man reta'am chi k'iyal ti chik ij kkanaj chwach.

Keje ile xinta che i ch'awb'al chikaj.

13I nim laj itzel kumatz, are xuna'o chi xelsax li chikaj i xk'aq li chwach i jyub' ta'aj, xujeq uri roqtaxik i ixoq chi xalax rak'al. 14Xwiri, i ixoq xya' keb' nimaq taq uxik' pacha uxik' jun nim laj kotxik. Are uri, krupupik x-e che uk'ijib'al che i tz'inilik jyub' chaqij; naj xel chwach i nim laj itzel kumatz le. Chila ktzuq wi oxib' junab' ru' nik'aj. 15I itzel kumatz xuxab'uj jun nim laj ya puchi' pacha raqana re kuchararejb'ej re i ixoq. 16Xwiri i ulew xuto i ixoq; xujaq rib' i xub'i' b'i i ya chi xel puchi' i nim laj itzel kumatz. 17Rumali, i nim laj itzel kumatz lik xpe roywal che i ixoq, xaq x-e chu'anik ch'oj chkij i jub'an umuq uxikin i ixoq le. Ike le je are i kekojon che utzij upixab' i Dios; lik je teren chrij i saq laj tzij chi u'aljinsam i Jesucristo. 18#12.18 Chupam jub'an chik wuj re utzij i Dios kriqtaj ti jun versículo ri. I nim laj itzel kumatz xtak'i chuchi' i mar.

Currently Selected:

Apocalipsis 12: ACHICUB

Highlight

Compare

Copy