Apocalipsis 10

I ángel rok'am i ral b'orom wuj

1Te'uri, xwil chik jun ángel, nim ucho'ab', ktijin li uqajik chikaj. Ire ch'uqum rij che i sutz', xaq o jun xok-ab' puwi ujolom. I upalaj pacha utzunb'al ij kwalch'inik, xaq i raqan pacha ketzun a' chi kjuluwik. 2Xaq pu'ab' o jun ral wuj jaqalik. Are xqajik, xuya i raqan wiqab'im puwi i mar; i raqan moxim xuya puwi i ulew. 3Are uri, ko xsik'inik, pacha uch'awb'al jun koj. Are keje xu'an ire ile, are uri xtataj wuqub' ch'awb'al pacha uch'awb'al jab'. 4Are xuxlan ile, yin laj xinjeq utz'ib'axik wach xkib'ij, xwiri, xinta jun ch'awb'al aj chikaj chi xub'ij chwe: “Matz'ib'aj ile; ma'aljinsaj chke i winaq wach taq kib'im i wuqub' uch'awb'al jab' le.” Xb'ix chwe.

5Te'uri i ángel le chi xwilo chi tak'al puwi i mar, xaq puwi ulew, ire xuyak u'ab' wiqab'im chikaj, 6lik kinb'ij pub'i i Dios rumal Ire chi k'aslik k-e ij saq chrij, chi xaq x-anaw i kaj, xaq i uwach i jyub' ta'aj, xaq i mar, xaq ronojel ni'pa i olik. Keje iri xub'ij: “Lik kb'aytaj ti chik mas. 7Are kuriq i ij chi kuch'awsaj u-trompeta i uwuq ángel, are i k'utb'al re uri chi Dios ya xutzin chuyijb'axik wach uch'ob'om na. Pacha i ub'im chke i rajchak ujer, chi profeta, keje ku'an ni ile.” Keje ile xub'ij i ángel.

8Te'uri i ch'awb'al chi intom chikaj, xinu'ijla chik. Xub'ij chwe: “Jat ru' i ángel le chi tak'al puwi i mar xaq puwi ulew. Jak'ama i ral wuj jaqalik chi o pu'ab'.” Xub'ij. 9Are uri xin-e ru' i ángel, xaq xintz'onoj i ral wuj che. Ire xub'ij chwe: “Chachapa xaq chatija b'ik. Ile ku'an ni che i pachi' pacha ujelal uwa'al kab', xwiri are o chik chapam, k-on ni k'a.” Xub'ij chwe.

10Te'uri xinchap i wuj chi o pu'ab' i xintijo. I pinchi' xu'ano pacha ujelal uwa'al kab', xwiri, are xtijtajik, lik xuya ni uk'ayil chinpam. 11Te'uri xb'ix chwe: “Yet, o uchak kapaxsaj chik utzijol wach k-on ni Dios chke uk'iyal taq tinimit, uk'iyal taq ulew, uk'iyal taq atol tzij, uk'iyal taq winaq, xaq i jalajuj taq ch'ab'al.” Xb'ix chwe.

Currently Selected:

Apocalipsis 10: ACHICUB

Highlight

Compare

Copy