Jerem%EDas 7
7
I ma Jeremías kub'ij utzij i Dios prachoch i Dios
1I Ajwal xlapan ru' ma Jeremías xaq xub'ij che: 2Chat-ol chila pa okb'al b'ik che i rachoch i Ajwal xaq chaya retamaxik i tzijoniki chila: Iwonojel yix ix aj Judá chi kixok b'i che uchija chukojik u'ij i Ajwal, chita i tzijoniki 3chi re i Ajwal chi ronojel ktiki che, re i Dios ke aj Israel: Chi'ana mas utz che ik'aslemal, xaq wach i ki'ano, man yin kinya uri chiwe chi k'a kixjeqi chwach ulew le. 4Mikub'a ik'ux chke ike le chi kixkit'oro are kkib'ij keje iri chiwe: ¡Riy i rachoch i Ajwal oliki, riy i rachoch i Ajwal oliki!
5Wetene ki'an mas utz che ik'aslemal xaq che i wach i ki'ano xaq lik ki'an utz che iwib' ku' i jub'an chik; 6xaq we keikamsaj ti aj naj pa taq chak, ak'alab' chi nti kiqajaw kichuch xaq i malkanib', xaq keikamsaj ti i winaq chi nti kimak che k'ijib'al le, xaq mitene kikoj ki'ij i jub'an chik dios, chi xa are ronojel ku'an i k'ax chiwe yix, 7yin kinya uri chiwe chi k'a kixk'iji waral, che ulew chi xinya chke iwatit imam ronojel ij saq.
8Yix kikub'a ik'ux che i xa t'oronel laj taq tzij chi lik nti kuchakuj chiwe.
9Kixel-anik, kixkamsanik, kimin iwib' ru' jun chik chi ix k'ulinaq ti ru', kikuxtaj ub'i i Dios puwi itzij chi qatzij taj, kisujuj pom chwach i tiox Baal, kikoj ki'ij i tiox chi nti iwe yix chke xaq iweta'am ti kiwach. 10Te'uri kixk'un chik pwachoch chi lik we yin, re kolik'utu iwib' chinwach. Kich'ob' taq yix chi waral lik nti kik'ulmaj; kich'ob' yix chi utz kimayij ti u'anik ni'pa i b'iroxik chi kinch'ij ti rilik Yin. 11¿Xatab'a kich'ob' yix chi wachochi lik we Yin, kijul i ili'omab'? Yin wilom ronojel ile. Yin in Ajwal, xinb'iw ile. 12Jix pa lo'laj ink'ijib'al chila Silo, chi are nab'e k'ijib'al xin-ulu re ink'ijib'al, xaq chiwila pe wach xin-an che rumal umak intinimit Israel. 13Tupu k'iyalmul insaqim chiwe chrij ik'aslemal, yix xiwaj ti xixkojon chwe, xaq mitene xikoj retalil chwe. Yin in Ajwal, xinb'iw ile. 14Rumali keje pacha xin-an che i lo'laj ink'ijib'al chila Silo, xaq keje ile kin-an che i wachochi chi lik we yin, chi xinya chiwe yix xaq chke iwatit imam, chi iya'om ik'ux yix che. 15Kixwesaj nu b'i yix chinwach pacha kelsaxik xin-an b'i chke iwatz icha' ujer, chi je umuq uxikin ma Efraín.
Suk'ul ti laj k'uxij ke aj Israel
16Yet, ma Jeremías, matlapan wu' puwi i tinimiti, xaq matz'onoj utzil chwe kumal ike. Lik ma'an pen utz'onoxik chwe man yin katinta taj. 17¿Kawil ti b'ari wach kki'an pa taq nimaq tinimit Judá, xaq pa taq b'e re i tinimit Jerusalén? 18I k'uwalxelab' kkitzukuj i si', i qajawxelab' kkinak' a' che, i chuchxelab' kkiyot' upam i or re i wa, te'uri kkisujuj chwach ati tiox chi Ati Ajawinel re i Kaj ub'i. Kkiqajsaj in-ij, xwi ta la ile, xaq kkisujuj i uwa'al uva muqb'am chkiwach i malkatel laj taq tiox. 19Xwi ti kkiqajsaj in-ij Yin, xaq lik kkiqajsaj ki'ij ike re yab'al kik'ix. Yin in Ajwal, xinb'iw ile. 20Rumali Yin, chi in Ajwal, lik qatzij kinb'ij chiwe chi kwesaj ronojel woywal che i k'ijib'al le xaq chke i winaq, xaq kwesaj ni woywal chke i konojel i chikop, chke i che' pa taq es xaq che ronojel i tikon. Keje na pacha jun a' chi lik kchup taj.
21I Ajwal chi ronojel ktiki che, chi ki-Dios aj Israel, kub'ij chke utinimit: Chisujuj ronojel ni'pa umuyal uk'ok'al, xaq chikamsaj i chikop ni'pa kiwaj, xaq chitija i ti'ij le. 22Xwiri yin are xewesaj li iwatit imam pa Egipto, lik nti xinb'ij chke, mitene xeintaq chusujuxik umuyal uk'ok'al xaq mitene i porom sipon. 23Xwi xeintaq che chi kekojon chwe, man keje ile yin in ki-Dios, xaq ike je intinimit. Xaq xinb'ij chke chki'ana utz che kik'aslemal pacha xeintaq che, man keje ile is utz na ke'el ru' wach i kki'ano. 24Xwiri xekojon taj xaq xkikoj ti retalil chwe, are i xki'ano xkiya kib' che i kib'uyil chu'anik i utz ti laj taq urayijb'al kik'ux. Puk'exel ketzalij chal wu', xa xinkixutuj kanoq. 25Lik k'a are xe'el li iwatit imam pa Egipto xaq k'a are o wi wo'or, yin lik inmayim ti kitaqik b'i wajpatan chi je are i profeta. 26Xwiri yix xixkojon taj xaq xikoj ti retalil chwe, are i xi'ano xa ne mas b'uy xi'an che iwib' chkiwach iwatit imam.
27Yet, ma Jeremías, chab'ij ronojel i b'iroxiki, tupu kkikoj ti retalil chawe, chatsik'in chub'ixkil chke tupu kkila' ti uwach chawe. 28Chab'ij chke: “Are i nim laj tinimit iri chi kkojon ti che i Rajwal Dios, mitene kraj chi ksuk'b'axik. Ronojel i saqil laj tzij lik kkib'ij ti chik.”
Ukojik ki'ij i dios chi saqil taj pa Jerusalén
29¡Ix, aj Jerusalén, chik'upij iwi xaq chik'aqa b'ik!
¡Chib'ixaj jun b'ix re b'is chwi pelpaq taq loma!
Man i Ajwal mi'naq roywal ku' awinaq,
je ro'tam kanoq xaq je uxutum kanoq.
30I Ajwal kub'ij: I winaq aj Judá ki'anom jun b'iroxik chi kumaj ti inwach yin: Xkiya i ch'am ti laj taq kitiox chupam i wachoch chi lik we yin, xaq xkiqajsaj u'ij i wachoch.
31Chila chwa ta'aj Ben-hinom, xki'an jun sujb'al sipon Tofet chi ch'am ti laj k'ijib'al re porb'al kimi'al kalk'uwal i winaq, i anik le lik je intaqom ti yin chu'anik xaq lik mitene xik'aw ile pinjolom. 32Rumali Yin, chi in Ajwal, kinb'ij chi kuriqa ni jun ij chi i k'ijib'al le kb'ix ti chik Tofet che, xaq mitene ta'aj Ben-hinom, are i kb'ix che Ta'aj re i Kamsanik. Xaq chila Tofet kemuq ni i kamnaq, man nti chik mas k'ijib'al. 33I kich'akul i kamnaq le kajwax ni re kkitij i tz'ikin chi je ajtijol ti'ij, xaq chke itzel taq chikop xaq lik nti ke'oqtaw b'ik. 34Kin-an na chi kinsach uwach i b'ix re i nima'ij xaq re i kikotemal pa taq tinimit Judá xaq xol taq b'e re i tinimit Jerusalén, xaq i b'ix re k'ulankil. Ronojel i tinimit k-on ni pacha jun tz'inilik jyub'.
Currently Selected:
Jerem%EDas 7: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
