Jerem%EDas 8
8
1I Ajwal kub'ij: Che taq i ij le kelsax na li kib'aqil i winaq pa taq kijul, ronojel kib'aqil i ajawinelab', kib'aqil aj-atzil re i tinimit Judá, kib'aqil ajsujul sipon, kib'aqil i profeta xaq kib'aqil ni'pa xejeqi chila pa tinimit Jerusalén. 2Xaq kekisa ni kan chwa ij, chwa ik', xaq chwa ronojel i ch'umil chi lik k'ax xkina'o, xki'an kipatan chkij, xeterej chkij, xkik'am taq kino'oj chke xaq xkikoj ki'ij. Mijun keyakawik re kkimuqu. Kekanaj ni chwach taq ulew pacha taq achaq. 3Ni'pa k'a kek'asi kan chke i je utz ti laj taq winaq le, xaipa keriqtaj wi chrijil chik kikichersaxik b'ik, are mas kkitz'uyunej i kamik chwach i k'aslemal. Yin in Ajwal, chi ronojel kintiki che, xinb'iw ile.
Uya'ik kiwach aj Israel ku' ajch'oj xaq i utojb'alil chi kya' chke
4Yet, ma Jeremías, chab'ij i tzijoniki chke i winaq chi kinb'ij yin:
Jun are ktzaqik, kwalij chik;
jun are kusach ub'e ktzalij chik che i b'e.
5¿B'uchak uri, yix ix aj Israel, kiya iwach ru' ajch'oj chwij?
¿B'uchak uri, yix ix aj Jerusalén, kiwuwaj inwach ronojel ij saq?
¿B'uchak uri, yix lik ki'an qelqel che i iwib'
xaq kiwaj ti kixtzalij chaloq?
6Yin lik arewi intatb'em wach i kib'ij
xwiri lik intom taj we o jun b'a'krijnaq uk'ux chu'anik umak,
xaq lik kub'ij i saq laj tzij:
¿Wach ile chi xin-an yin?
Konojel lik kelajaj che i anem,
pacha taq je kaway chi kik'apem chik kichi' pa ch'oj.
7Reta'am ne i chak'jowox chi krupup chikaj junpa ktzalijik.
Ixkuku, wich'il, xaq i joj
keta'am junpa ke'e che jun chik k'ijib'al.
Xwiri yet, intinimit,
aweta'am ti uwach in-atb'al tzij.
8¿B'uchak uri kib'ij yix chi lik o ino'oj xaq iweta'am
wach kub'ij u'atb'al tzij i Ajwal?
¡Chi je ajtz'ib', xa ru' t'oronel laj tz'ib'b'al,
xkitz'ib'aj wi!
9Xwiri i o kino'oj le lik k-an ni chke chi kqaj ni ki'ij,
to' kixim kib' pacha chikop aj pa taq es je tzaqnaq chupam i chapb'al ke.
¿Ipa o wi kino'oj le,
man kixutum intzij?
10Rumali, kinjach ni kixoqil chke i jub'an chik achiyab',
xaq i kulew kinya ni chke jub'an chik.
Man konojel che ch'utiq che nimaq,
xwi kkich'ob' utzukuxik i ch'akanik ru' ela';
i profeta xaq ajsujul sipon,
konojel is je t'oronel.
11To' kuwam uwach ronojel ni'pa i ki'anom intinimit;
kkib'ij chi ronojel is utz onom,
xwiri ronojel is utz taj.
12¡Lik utz te'eq wetene kixk'ix jub'i' chu'anik i b'iroxik le chi kinch'ij ti rilik Yin!
Xwiri keje ti ile ki'ano, yix lik kixk'ix ti pich' che,
¡Lik iweta'am tene chik wach taq i k'ixb'alil!
Rumali, are kinya utojb'alil chiwe,
kitakij ni iwaqan xaq kixtzaq na pacha kki'an i jub'an chik.
Yin in Ajwal, xinb'iw ile.
13I Ajwal kub'ij:
“Keink'atzij ni intinimit pacha taq uk'atzixik i trigo.
Mijun chik uva kkanaj kan chwi raqan,
xaq mijun chik higo kkanaj kan chwi raqan.
Xwi chik uxaq chi matz'krijnaq uwach.”
14I winaq kkib'ij na:
“¿Wach taq uchak kojkanaj kan waral?
¡Qonojel jo' pa nimaq taq tinimit chi sutim rij ru' tapial nim uwach,
man su' chojkikamsaj!
I Ajwal chi qa-Dios, ku'an chqe chi kojkamik,
ku'an chqe chi kqatu' i ya chi o b'enen ru',
rumal xojmakun chwach ire.
15Qoy-em te'eq qelik chisaq,
xwiri nti utz kojtijin chuk'ulmaxik.
Qoy-em te'eq rutzil qawach,
xwiri to' xib'in ib' qariqom.
16¡Ya kk'un ajch'oj chqij!
¡Ya ktataj chik i kuxlab' i kaway pkitzam k'a chila pa Dan!
Are kyirir i kaway kyikyat ronojel ulew.
Xek'un chusachik uwach i tinimit xaq ronojel ni'pa o chupam,
konojel i nimaq taq tinimit xaq konojel ni'pa je jeqel chwach.”
17I Ajwal kub'ij:
“Kintaq b'i itzel laj taq kumatz chiwij,
chi kixkich'opij,
i kumatz le nti jun moxinik ktiki taq chke.”
K'ax chi kutij ma Jeremías rumal utinimit
18Inb'is lik nti ukunb'alil, i
wanima lik kuch'ij ti chik.
19I kijilawik intinimit
lik ktataj chupam ronojel i nim laj tinimit:
“¿Nti b'a chik i Ajwal pa tinimit Sion?
¿Nti chik rajawinel chila?”
I Ajwal kub'ij:
“¿B'uchak xiqajsaj in-ij chukojik ki'ij i tiox
chi lik nti kkichakuj xaq malkatel laj taq tiox?”
20Xik'aw i sa'ij, xk'is i molonik,
xaq yoj oj elsam ti chwach i kamik.
21Lik kintij uyej junam ru' intinimit rumal i k'ax chi kutijo;
i b'is xaq i xib'rikil lik u'anom k'ax chwe yin.
22¿Xatab'a nti jun kunb'al pa Galaad?
¿Xatab'a nti jun chila chi kkunanik?
¿B'uchak krutzirsaj ti intinimit?
Currently Selected:
Jerem%EDas 8: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
