Jerem%EDas 6
6
I je ajch'oj kkisutij rij i tinimit Jerusalén
1¡Ix jutzob'aj re ma Benjamín chix-anmajoq,
chitzukuj i k'ijib'al re tob'al ib', chixel chila pa tinimit Jerusalén!
Chixut'ij i trompeta pa Tecoa,
chiyaka jun ilb'al re chila Bet-haquerem,
man jun uyej, jun nim laj k'ax
kpe pqawi chi upetik pa moxab'.
2I tinimit Sion are pacha jun chom laj semsik ta'aj, chi kwulijsax na.
3Ipa ke'e wi ajyu'ul taq chij ru' kichij,
lik je sutinnaq chkij chkiwach,
xaq ni'pa i kichij ke'esan pa taq kitzal.
4I je ajch'oj chkij kkib'ij:
“¡Chiyijb'a iwib' chu'anik ch'oj chkij,
chixpetoq chqa'ana ch'oj chkij are tik'il ij!
Xwiri, ¡To' qawach yoj!
Man ya xqaj i ij xaq ya knajtir i a'ab' chqe.
5¡Chqa'ana ch'oji chkij cha'ab',
xaq chqawulijsaj i kitak' taq ja!”
6I Ajwal chi ronojel ktiki che uya'om i taqaniki:
“Chik'atzij i che' re anb'al re i elb'al b'ik
pa tinimit Jerusalén anb'al ch'oj chrij.
I tinimit lik k'oqtal chik rumal uya'ik jun tojb'alil puwi
man lik to' kamsanik ku'ano.
7Pa Jerusalén kwinaqir wi i mak atzalal,
keje pacha i ya chi kb'olb'at li chupam jun k'otom.
Lik xwi ktataj i kamsanik xaq u'anik i utz taj,
lik xwi i sokonik xaq i uk'axk'ol kwil chila.
8Ix aj Jerusalén, chimayij u'anik ni'pa i utz taj le,
man we kimayij taj, kinjek' wib' iwu'
kin-an ni chiwe pacha jun tz'inilik jyub',
kintalb'a ni kan uwach i tinimit.”
Utzijoxik uya'ik i tojb'alil
9I Ajwal chi ronojel ktiki che kub'ij:
“I aj Israel chi je kanajnaq kanoq
lik ketzukux na xaq kkamulix ni kitzukuxik,
pacha ukamulixik utzukuxik i uva chwi raqan, chuxol taq u'ab',
man keje ile lik mijun chik uva ksach kanoq.
10Yin xinla' uwach che: ¿Pachin kintawik
we kinch'aw chke, we kinya utzijol ile chke?
Lik tz'apil kixikin, Ajwal,
rumali ketan taj,
kkiyo'ya i atzij,
lik kumaj ti kiwach.
11I awoywal yet, Ajwal, u'anom chwe chi lik mi'naq woywal
xaq kintiki ti chik chu'atixik.”
I Ajwal xub'ij chwe:
Chawesaj awoywal chke i alab'om aj pa taq b'e,
chke i alab'om chi to' kkok'aj kib' pa taq tzob'ajil;
xaq kekichap i winaq chi je k'ulanik, junam ku' i kixoqil
xaq i rijab' chi k'iyal junab' chik o chke.
12I kachoch, kulew, xaq i kixoqil
ke'ax ni pki'ab' jub'an chik.
Man kinyak ni in-ab'
chuya'ik i tojb'alil pkiwi konojel i je jeqel pa tinimit le.
Yin in Ajwal, xinb'iw ile.
13Konojel che ch'utiq che nimaq,
xwi kkich'ob' utzukuxik i ch'akanik ru' ela';
I profeta xaq ajsujul sipon,
konojel is je t'oronel.
14Kkib'ij chi nti soktajnaq che intinimit,
kkib'ij chi ronojel is utz u'onom,
xwiri ronojel is utz taj.
15¡Lik utz te'eq wetene kixk'ix jub'i'
chu'anik i b'iroxik le chi kinch'ij ti rilik Yin!
Xwiri, keje ti ile ki'ano yix, lik kixk'ix ti pich' che,
¡Lik iweta'am tene chik wach taq i k'ixb'alil!
Rumali, are kinya utojb'alil chiwe,
kitakij ni iwaqan xaq kixtzaq ni pacha i jub'an chik.
Yin in Ajwal, xinb'iw ile.
Kiqelanik aj Israel
16I Ajwal kub'ij che utinimit:
“Chixtak'al pa taq b'e xaq chiwila,
chitz'onoj ipa o wi i ujer taq b'e,
ipa o wi i utz laj b'e, chixb'in uri che man kiriq uri i uxlanem.”
Xwiri ike kkib'ij, “kqaj taj, kqaj ti kojb'in che.”
17I Ajwal xeukoj chajinelab' xaq xub'ij che i tinimit:
“Chitatb'ej are kxut'ix i trompeta.”
Xwiri i tinimit xub'ij: “Kqaj ti utatb'exik ile.”
18Rumali i Ajwal kub'ij:
“Chitatb'ej ix nimaq taq tinimit,
chiwetamaj wach kuk'ulmaj intinimit.
19Winaq chi ix aj chwach ulew, chita iri:
Kink'am li jun nim laj uyej puwi i tinimiti,
rumal i utz taj chi kki'ano,
man xkikoj ti retalil che intzij,
are i xki'ano, xkixutuj in-atb'al tzij.
20¿Wach uchak kik'am li pom chwe chi aj pa Sabá,
xaq kik'am taq li muy laj taq es chwe ke aj najil taq tinimit?
Yin kumaj ti inwach i umuyal uk'ok'al chi kisujuj taq chwe
xaq mitene i jub'an chik chikop chi kiporoj chinwach.”
21Rumali i Ajwal kub'ij:
“Kin-an ni che i tinimit le kutakij nu b'i rib' xaq ktzaq na,
qajawxelab' xaq alk'uwalxelab', winaq chi ix o naqaj xaq i amiy,
xaqjun kamik kki'ano.”
Umajik ulew xjeqan li k'a pa moxab'
22I Ajwal kub'ij:
“K'a naj che i ulew pa moxab' o jun nim laj tinimit chi lik o ucho'ab' kuyijb'a li rib' che i petik.
23Kiyijb'am kib' ru' kich'ojb'al chi are i ch'ab' xaq i che' jutz utzam;
je are i utz ti laj taq winaq lik kkil ti pich' tob'al wachij,
i kisik' lik keje pacha uch'awb'al i mar,
xaq je annaq rij taq kaway.
Lik je yijil chu'anik ch'oj chrij i tinimit Sion.”
24I winaq pa tinimit Jerusalén kkib'ij:
“Qatom i tzijonik
xaq i xib'rikil u'anom chqe chi nti chik qacho'ab';
lik kqana uk'axk'olil xaq i uyej,
pacha jun ixoq are kalanik.
25¡Mix-e pa taq es
xaq mix-e pa taq b'e!
¡I ajch'oj lik uyijb'am rib' ru' rajch'ojb'al,
lik xaipa o nimaq taq xib'rikil!”
26¡Umi'al intinimit,
chakojo a'u' as k'utb'al re uk'axk'ol,
chab'alkatij awib' pa taq chaj,
chixb'isonoq xaq lik chixsik'in che o'ej,
keje pacha are kkam jun iwak'al chi xa jun olik.
Man i jun chi ksachaw qawach,
lik ya kk'un chu'anik ch'oj chqij!
27I Ajwal xub'ij chwe: “Yin kinya chaqul chi ka'an jun ilb'al re che intinimit. Chak'ama kipam ilb'al re wach u'onom kik'aslemal.”
28Ajwal, konojel ike le lik je qelqel,
lik je ajnuk'ul tzij laj taq winaq xaq lik xaqmanal kki'ano,
lik kkina taq ike pacha taq je anch'ich' xaq i ch'ich'.
29I wal are lik ko kuwaluj i tew,
ku'an che i a' chi kuyayursaj i raxch'ich'.
Lik nti uchak uri chi kejos-ix taq ile,
man i utz ti laj taq winaq lik kesach taj.
30Rumali chi kya' ni pkib'i: “Saq-o'oj chi uk'aqik chub'i re,”
man yet Ajwal, je aya'om chik junla.
Currently Selected:
Jerem%EDas 6: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
