Jerem%EDas 23
23
Roy-exik re k-on panoq
1I Ajwal kub'ij: “¡To' kiwach i ajyu'ul chij chi kkiya chke inchij chi kesachik xaq kekicher b'ik!”
2I Ajwal, chi ki-Dios aj Israel, kub'ij chke i ajyu'ul chij chi kerajawin puwi utinimit: “Yix ikichersam b'i inchij, i'anom chke chi ke'anmaj b'ik, xaq lik je ichajim taj. B'ay, yin lik utz uya'ik utojb'alil kin-an chiwe rumal ni'pa i utz taj chi xi'ano. Yin in Ajwal, xinb'iw ile. 3Xaq lik yin na keink'am chal inchij pa taq tinimit ipa xeinkichersaj wi b'ik, kinmol ni kichi' xaq keink'am chali pa ketzuq wi, man keje ile k'i ni kak'al kealaxik. 4Kinkoj ni ajyu'ul ke chi kechajiwik, man keje ile lik nti o kkixij kib' che, xaq kramtaj ti jun chke ike. Yin in Ajwal, xinb'iw ile.”
5I Ajwal kub'ij:
“Kuriqa ni jun ij chi kin-an ni
che ma David, lik are ni jun umuq uxikin ire,
krajawin ni ru' no'oj
i u'anik i suk'ulik xaq i utz pa nim laj tinimit.
6Che taq i ij are krajawinik, i tinimit Judá lik ktotaj na,
xaq i je aj Israel lik utz ni kik'aslemal.
Are ub'i iri kkb'ij ni che:
I Ajwal are qach'akanik.”
7I Ajwal kub'ij: “Kuriqa ni jun ij chi kib'ij ti chik i tzij pub'i i Ajwal chi keje iri kib'ij: Puk'aslemal i Ajwal, chi xeresaj li aj Israel pa Egipto, 8are i kib'ij are iri: Puk'aslemal i Ajwal chi xeresaj li kimuq kixikin aj Israel che i tinimit pa moxab', xaq pa ronojel i jub'an chik nimaq taq tinimit, chila ipa je kichersam te'eq b'ik. Xaq kejeqi ni chwach kulew.”
Tzijonik chkij i profeta
9Tzijonik chkij i profeta:
Kinna yin kel i wanima pa nik'aj,
ronojel inch'akul lik ksiksatik,
pacha taq in ab'arel,
jun achi chi t'ub'ul uch'akul rumal uwa'al uva muqb'am,
rumal i Ajwal
xaq rumal utzij chi lik ch'am.
10Pa tinimit le lik je k'i i winaq chi kkimin kib' ku' jub'an chik chi je k'ulinaq ti ku',
xaq je k'i i winaq chi to' kelajaj chu'anik i utz taj,
chi ru' wach o pki'ab' u'anik kki'anb'ej i utz taj.
Rumali i Ajwal xuk'oqoj xaq
i ulew xchaqijik
xaq ni'pa i chaqij es pa taq tz'inilik jyub' xek'atik.
11I Ajwal kub'ij:
Xaq keje ne i profeta xaq i je ajsujul sipon, lik je itzel laj taq winaq,
lik chupam wachoch je inriqom wi chi kki'an i utz taj.
12Rumali i kib'e
lik equm xaq lik pilin:
Yin kin-an ni chke chi ketakpux b'ik xaq ketzaqik.
Man yin kink'am na li i utz taj pkiwi
are kuriq i ij re utojb'alil kimak.
Yin in Ajwal, xinb'iw ile.
13Yin je wilom i profeta chi je aj Samaria
kki'an i b'iroxik chi kuqajsaj in-ij Yin:
Man xa pub'i i Baal kib'im i tzijonik
xaq ki'anom che intinimit Israel chi kjech'ab' kib'e.
14Yin wilom i profeta chi je aj Jerusalén
kki'an i b'iroxik chi ch'am taj:
Kkimin kib' ku' winaq chi je k'ulinaq ti ku',
xaq to' t'oronik kki'ano,
xaq kkiya ukowil kik'ux itzel laj taq winaq chi mijun kujek' rib' chupam umak.
Ike xaq i winaq chi je jeqel pa tinimit
lik je keje chwe yin pacha i tinimit Sodoma xaq Gomorra.
15Rumali yin, chi in Ajwal, chi ronojel kintiki che,
kinb'ij iri chkij i profeta:
Kinya ni chke chi kkitij i b'iroxik chi lik k'a,
kinya ni chke chi kkitu' i ya chi o b'enen ru',
man i kimak i profeta chi je aj Jerusalén
lik paxnaq chub'i uwach chupam ronojel i tinimit.
16I Ajwal chi ronojel ktiki che, kub'ij:
“Ix aj Israel, mikoj retalil
che wach kkib'ij i profeta
Ni'pa i kkib'ij le lik qatzij taj,
b'iroxik chi xa je are ike kinojim,
chi nti inb'im yin chke.
17Ni'pa i kkiqajsaj u'ij intzij
kb'ix chke: Mixb'isonik man ronojel is utz kelik.
Xaq ni'pa je teren chrij kib'uyil
chu'anik i utz ti laj urayijb'al kik'ux,
kb'ix chke: Mijun utz taj kpe piwi.”
Sik'inik re ma Jeremías
18Xwiri ¿Pachin taq wa reta'am wach ruwam uwach i Ajwal?
¿Pachin taq wa rilom xaq utom utzij i Ajwal?
¿Pachin taq wa lik utatb'em wach kub'ij?
19I roywal i Ajwal, keje pacha jun jab' tew upam,
pacha jun tew chi lik kjuk'uk' upam,
chi kujuk'uk'ej rib' pkiwi itzel laj taq winaq.
20I roywal i Ajwal kik'aw taj,
k'a ku'an na pacha uch'ob'om u'anik.
Kuriqa ni jun ij chi yix kixch'ob'on na
xaq kita ni ub'e ni'pa i b'iroxiki.
Utzijonik i Ajwal chkij i saqil ti laj taq profeta
21“Yin xeintaq tu b'i i profeta,
xaq mitene xinch'aw chke,
xwiri ike pa'anem
je enaq chub'ixkil i tzij pinb'i yin.
22Wetene keta'am wach wuwam uwach yin,
kkitzijoj te'eqi intzij che intinimit,
kki'an te'eqi che chi kko'taj kan i utz ti laj kib'e,
xaq kko'taj te kani ni'pa i utz taj chi kki'ano.”
23I Ajwal kub'ij:
Tupu lik naj xaq we naqaj, yin lik in Dios.
24¿Pachin taq wa ktiki chruwaxik rib' chinwach yin?
Man yin lik in o chwach i kaj xaq chwach i ulew.
Yin in Ajwal, xinb'iw ile.
25Intom i nuk'unik tzij chi qatzij taj ke i profeta le, chi kki'an taq che kib' kkib'ij i tzij pinb'i Yin, xaq kkib'ij taq chi kelapan wu' Yin are keachik'ik. 26¿K'a junpa nawi i profeta le kkimayij ub'ixkil taq i b'iroxik chi qatzij taj, chi to' kinojim ike? 27Ru' i achik' chi kkilap chkiwach, kkaj kki'an chke intinimit chi kinsach chkik'ux, pacha xki'an i katit kimam chi xinsach chkik'ux xaq xeterej chrij i tiox Baal. 28-29¡We o jun profeta xu'an jun achik', lik chub'ij uri chi xa jun achik' xu'ano, xwiri we are intzij xb'iw che, lik utz uri utzijoxik chu'ana che! Xatab'a xaqjun uxaq k'im ru' i ch'irajil. Intzij keje pacha i a', xaq pacha jun ch'ayb'al chi ku'an ch'aqa taq che i nim laj ab'aj. Yin in Ajwal, xinb'iw ile.
30Rumali kinsaqij chi lik in ajch'oj chkij i profeta chi kkel-aj taq intzij chkiwach. Yin in Ajwal, xinb'iw ile. 31Kinsaqij chi lik in ajch'oj chkij i profeta le, chi kki'an taq che kib' chi intzijonik yin i b'iroxik chi xa je are ike je nojiwnaq. 32Kinsaqij chi lik in ajch'oj chkij i profeta le chi kkilap i kachik' chi qatzij taj, chi ru' i nuk'unik tzij chi qatzij taj le xaq ni'pa i kkich'ach'a kki'an che intinimit chi kjech'ab' kib'e. Yin je intaqom tu b'ik, xaq nti jun taqanik inya'om chke, rumali chi ketiki ti chkito'ik i tinimit. Yin in Ajwal, xinb'iw ile.
Wach ub'ixkil utzijonik i Ajwal
33Ma Jeremías, we o jun winaq re i tinimit xaq we jun profeta xaq we jun ajsujul sipon kutz'onoj chawe: ¿Wach utaqom u'anik i Ajwal? Yet chab'ij keje iri chke: I Ajwal kub'ij chi reqan Ire ix are yix, chi xaq ku'an na chi ktzaqik. 34We jun profeta xaq we ajsujul sipon xaq we jun winaq re i tinimit kuchapb'ej i tzij “Re ku'anb'ej i xya' chuqul rumal i Ajwal”, yin kinya ni utojb'alil che ire xaq chke i ralk'uwal. 35We o jun kutz'onoj che jun awamiy xaq we che jun awachalal, utz keje iri chub'ij: ¿Wach la'b'al uwach uya'om i Ajwal? ¿Wach ub'im? 36Xwiri muchapb'ej chik i tziji: “Taqanik re i Ajwal” man we o jun kuchapb'ej, yin kin-an na chi i utzij lik xa reqan na. Yix i'anom che utzij i k'aslik Dios chi xaqmanal kel usuk' pijolom, chi are i Dios chi ronojel ktiki che.
37Ma Jeremías chatz'onoj chke i profeta: ¿Wach la'b'al uwach uya'om i Ajwal? ¿Wach ub'im? 38We keje iri kkib'ij: “Re ku'anb'ej re i xya' chuqul rumal i Ajwal”, chala'a uri uwach chke. I Ajwal kub'ij: “Yix k'a kichapb'ej i tzij chi xinb'ij chiwe kichapb'ej ti chik, 39yin kixinwalijsaj na pacha jun eqan, yix xaq i tinimit chi xinya chiwe xaq chke iwatit imam, lik kixwesaj chinwach xaq kixsach chink'ux. 40I qajsab'al i'ij xaq i yab'al ik'ix lik ronojel ij saq kinya ni piwi, xaq kin-an na chi ksach ti chik'ux ronojel ile.”
Currently Selected:
Jerem%EDas 23: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
