Jerem%EDas 22
22
Tzijonik chrij i nim laj rachoch i ajawinel re i Judá
1I Ajwal xub'ij chwe: “Jat pa nim laj rachoch i ajawinel xaq chaya i tzijoniki 2chwach i ajawinel re i Judá, chi kul pukub'ib'al mam David chi o u'ij, xaq chkiwach i raqan u'ab' xaq chkiwach i winaq re tinimit: Chita utzij i Ajwal. 3Chi'ana i utz xaq i suk'ulik che i k'ijib'ali, chiwesaj i nib'a' pu'ab' i k-anaw k'ax che, miqajsaj ki'ij xaq mitene mib'ij taq k'ax laj taq tzij chke i je aj naj, chke i ak'alab' chi nti chik kiqajaw kichuch xaq mitene chke i malkanib'. Che i k'ijib'ali meikamsaj i winaq chi nti kimak. 4We lik qatzij ki'an ile chi xixintaq che, lik arewi uri o ni ajawinel chi kkub'i pukub'ib'al mam David chi o u'ij, ike le lik ke'ok nu b'i pa okb'al re i nim laj rachoch i ajawinel, pa taq ch'ich' chi wiqtalik xaq rij taq kaway je achnimam ni kumal i kaqan ki'ab' i winaq re i tinimiti. 5Xwiri we kikoj ti retalil che ni'pa i saqinik le, i rachoch i ajawinel le lik k-on na pacha i ja wulijnaq. Yin in Ajwal, xinb'iw ile.”
6Man i Ajwal kub'ij chrij i nim laj rachoch i ajawinel re i Judá:
Yet at keje chwe yin pacha i jyub' Galaad,
pacha utzam jyub' Líbano,
xwiri lik pinb'i Yin kinb'ij chi kin-an ni pacha jun tz'inilik jyub' che ni'pa ile.
Xaq lik pacha jun k'ijib'al chi lik nti winaq chwach.
7Keintaq b'i winaq chu'anik ch'oj chawij chi lik yijil kich'ojb'al,
ru' nojb'al kkisachb'ej awach.
Kkichet nu b'i i chomiq taq aqan chi lik chakalte' o awu',
te'uri kkik'aq ni pa a'.
8Winaq re k'iyal nimaq taq tinimit, keik'aw ni che i nim laj tinimiti k-on panoq xaq kkitz'onoj ni chkiwach: ¿B'uchak i Ajwal keje iri xu'an che i nim laj tinimiti? 9Xaq kkila' ni uwach chkiwach. Man xko'taj kan i trat chi u'anom i Ajwal ku' chi ki-Dios, xaq xe'ok chukojik ki'ij jub'an chik dios.
Utzijonik ma Jeremías chrij ma Salum (Joacaz)
10-11Mixo' che ma ajawinel Josías,
mixo' che ukamik,
are chixo' che uk'ojol chi ma Salum,
chi k-ek xwiri ktzalij ti chaloq,
lik kril ti chik uwach i ulew ipa alaxnaq wi.
Man i Ajwal kub'ij chrij ma Salum, chi uk'ojol ma Josías, ajawinel re i tinimit Judá, chi xkub'i pa kub'ib'al chi o u'ij chrijil chik uqajaw, chi xel che i k'ijib'ali: Lik ktzalij ti chaloq. 12Are ku'ano xa kkam che i tinimit ipa xk'am wi b'ik, rumali kril ti chik uwach i tinimiti.
Tzijonik chrij ma Joacim
13¡To' awach yet chi rumal i mak atzalal
xaq u'anik i utz taj kayak awachoch, xaq nimaq taq ja ke ajawinelab',
xaq ka'an chke i jub'an chi kechakunik
xwiri keatoj taj!
14Chi kab'ij: “Kinyak jun nim laj wachoch,
xaq pukale lik nimaq taq uwaja kin-an che.”
Xaq kinkanaj wantana che,
xaq i uwach taq xan kinch'uq ru' i chakalte'
xaq kintz'aj ru' i tzunb'al kaq.
15¿Kach'ob' wa yet, chi xa rumal sutim awij ru' chakalte', at ajawinel chik?
I aqajaw lik xuqusij uk'aslemal,
xwiri lik xu'an i utz xaq i suk'ul laj atb'al tzij,
rumali is ronojel xel utz ru'.
16Xeuto i nib'a'ib' ru' ni'pa o ke che, xaq ni'pa i je ajaj laj taq winaq,
rumali chi is xel utz ru'.
Ile are ke'eloq chi i winaq chi ku'an ronojel ile reta'am in pachin Yin.
Yin in Ajwal, xinb'iw ile.
17Xwiri yet lik xwi katk'achir
rumal i ch'akanik chi utz ti uriqik k-anik;
kakamsaj i jun chi nti umak,
ka'an k'ax chke xaq keakamsaj atinimit pa chak.
18I Ajwal keje iri kub'ij chrij ma Joacim, chi uk'ojol ma Josías, ajawinel re i Judá:
“Lik nti jun chi kro'ej taq ukamik.
Lik nti jun chi ko'ik xaq kub'ij:
¡Ay, wachalal achi! ¡Ay, wachalal ixoq!
¡Ay, wajaw! ¡Ay, wajawinel!
19I umuqik keje na pacha taq umuqik jun axna:
Kjukukex nu b'ik
xaq kelsax nu b'i pa Jerusalén.”
Tzijonik chrij i tinimit Jerusalén
20“¡Tinimit Judá, chatel b'i puwi i jyub' Líbano, xaq chatsik'inoq!
¡Ko chatsik'in chwi nimaq taq jyub' Basán!
¡Chatsik'in li tzam taq jyub' Abarim,
man konojel ni'pa i qus katkilo kijamom chik kib' pa ch'oj!
21Yin xatin-ijla che taq i ij are at o chupam i utz,
xwiri lik xawaj ti intayik.
Lik keje ile a'anom li k'a pawak'alil:
¡Lik xawaj ti xata inch'awb'al!
22I tew lik keuchararej ni konojel i awaj-atzil,
xaq qus kkilo ke'elsax b'i pa cho'ab' chwach kulew.
Lik kqaj ni a'ij xaq kaya ni ak'ix,
rumal ronojel ni'pa amak.
23Yet wo'or lik utz at o chupam asok,
chupam awachoch chakalte' chi k'amtal li pa Líbano,
¡Xwiri ya katij ni uyej are kpe i k'ax pawi,
pacha uk'axk'ol jun tujanik!”
Utzijonik i Dios che i ajawinel ma Jeconías
24I Ajwal xub'ij che ma Conías, chi rak'al ma Joacim, chi ajawinel re i tinimit Judá: “Lik kinb'ij pub'i ink'aslemal: Tupu yet lik at jun b'aq chi o che uwi in-ab' wiqab'im, xwiri yin lik katwesaj nu b'i chila 25jachb'al awe chke i je ajch'oj chawij, chi je ajkamsanel chi lik kaxij awib' chke. Katinjach ni che ma Nabucodonosor, chi ajawinel re i tinimit Babilonia, xaq chke aj Caldea. 26Katintaq b'i yet xaq i achuch che jun ulew chi xril ti iwalaxik, xaq chila na kixkam wi chi ix keb'.” 27Keje uri ile chi ike ketzalij ti chali chwach ulew chi lik kkaj te'eq tzalijik chwach.
Sik'inik re i profeta
28¿I ma Conías keje pacha jun xar tel chi lik nti uchak,
jun yab'al chi lik nti jun kajwanik?
¿B'uchak xtaq b'i ire xaq i ralk'uwal
che jun ulew chi keta'am taj ipa o wi?
29¡Ulew, ulew, ulew,
chata utzij i Ajwal!
30I Ajwal kub'ij:
“Chitz'ib'aj ub'i achi ri chupam i wuj ipa tz'ib'tal wi kib'i i winaq,
pacha jun achi chi nti rak'al,
pacha jun achi chi utz taj xel uk'aslemal.
Man mijun chke umuq uxikin
kkub'i ni pukub'ib'al i mam David chi o u'ij,
chu'atik tan chik tzij pa tinimit Judá.”
Currently Selected:
Jerem%EDas 22: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
