Hebreos 2

Mqo'taj i tzij chi re i totajik

1Rumali o uchak kqakoj retalil che i saq laj tzij chi qatom le, man keje ile kqo'taj ti kan i utz laj b'e. 2I ángel xkib'ij utzij upixab' i Dios chke i winaq; x-aljinik chi lik pacha atb'al tzij ni'pa xkib'ij. Rumali ni'pa i xkikoj taj, xa xkiqelo, lik xkitoj i kimak pacha kmajawik. 3Lik are i tzij le are i totajik. Rumali, nim ni tojb'al mak kpe pqawi yoj we kqakoj ti retalil che i tzij le. Are nab'e xelsax ub'ixkil are i qatotajik, lik are i Ajwal xub'ij. X-on panoq, ni'pa i kitom wach i xub'ij ire, chi lik saq laj tzij; te'uri xkib'ij chqe yoj. 4Xwi ta la ile, i Dios xu'ano xaq xuk'ut chqe ru' nimaq taq il, ru' nimaq taq aljinsab'al, xaq nimaq taq anik, k'utb'al re ucho'ab'; xaq xuya Lo'laj Utewal i Dios chqe, ru' jalajuj taq anik chi xraj uya'ik i Dios chqe yoj.

I Jesús keje pacha i ratz ucha'

5I Dios uya'om ti pki'ab' i ángel we ke'ajawin taq puwi i jyub' ta'aj chi kqil na k-on panoq, are ile are i jyub' ta'aj chi kintijin chub'ixkil. 6Ile, xe'eloq pacha xub'ij jun, chi ujer tz'ib'tal kan chupam uwuj i Dios:

Ajwal, ¿Wach nawi qa'ij yoj oj winaq, chi lik arewi oj o pak'ux?

¿Wach nawi qa'ij yoj chi to' oj winaq, chi lik katij a'ij chqachajixik?

7K'iyal ti mas ij xa'an che chi xa jub'i' qajnaq u'ij chkiwach i ángel,

xwiri lik xaya u'ij xaq i nim laj uchomal.

8Ronojel wach i olik, aya'om pu'ab'.#2.8 Keje ile tz'ib'tal kanoq. Salmos 8.4-6.

Chi kqata wi chi ronojel ni'pa i olik, i Dios uya'om pu'ab' i Jesús; nti antalik we yatal ti pu'ab'. Qatzij, k'amaja ni k-iltajik chi ku'at tzij puwi ronojel wach i olik, 9xwiri i Dios xu'an che i Jesús, chi k'iyal ti ij xqaj u'ij chkiwach i ángel. I Dios rumal i k'axnab'al uk'ux, i Jesús xkamsax pkik'exel konojel i winaq man lik are ile kmajaw che Ire. Wo'or koksax i nim laj u'ij uchomal rumal i uyej chi xutij qumal yoj.

10Ronojel wach i olik are i Dios anawnaq, man keje ile xraj ire, xaq kuriq uchak che. Kraj i Dios chi ni'pa i rak'al lik o ke che ni'pa i o chila chikaj ru' Ire. Rumali lik xu'an suk'ulik che i Jesucristo man xutij uyej waral chwach i jyub' ta'aj, chi uch'ob'om i Dios, man are Ire Tol ke konojel i winaq. 11Man qonojel ni'pa i k'ax kqana i Dios xaq kojkojon che, lik oj rak'al Ire. Xaq i Jesús lik Uk'ojol i Dios rumali kk'ix ti chub'ixkil chi qatz qacha' qib' ru' Ire. 12Qeta'am ile man keje iri tz'ib'tal kan chupam uwuj i Dios:

Katinlap ni chke wachalal chwach i Cristo,

xaq kinb'ixaj a'ij chkiwach ni'pa i kimolom kib', kojb'al a'ij.#2.12 Keje ile tz'ib'talik: Salmos 22.22.

13Xaq tz'ib'talik:

Che ire, kinkub'a wi ink'ux che i Dios, man are ire intob'al.

Xaq tz'ib'talik:

“Chi in o wi ku' i wak'al chi i Dios uya'om chwe.”#2.13 Keje ile tz'ib'talik: Is 8.17-18.

14Yoj xa oj winaq chi o qach'akul, xaq qab'aqil; xaq i Jesucristo are xk'un chi chwach i jyub' ta'aj, xaq o uch'akul i o ukik'el pacha ke i winaq. Keje ile are xk'unik xuya rib' che i kamik, qajsab'al re ucho'ab' i jun chi rajaw i kamik. Ile are i Itzel. 15Keje xu'an i Jesucristo ile, elsab'al ke chisaq ni'pa i je o pa k'ax rumal kixib'rikil; man ike lik chkalaxik loq xkixij kib' che i kamik. 16Qatzij, i Jesucristo xk'un ti chkito'ik i ángel, ire ajtol ke i winaq xk'unik; keutob'ej i je umuq uxikin i mam Abraham. 17Rumali o uchak chi lik x-on winaq chi katz kicha' kib' ku' ike. Keje ile kmajawik xu'ano, man are xuriq i ij re upatan, lik are i atz laj rajpatan i Dios, Ire lik are ukub'ib'al kik'ux man lik kril tob'al kiwach. I kamik chi xujach wi rib', are i tojb'al re kimak konojel i winaq chwach i Dios. 18Wo'or keuto pachin je o pa k'amb'al pamaj, man xaq keje ire xutij uyej, xutij i k'ax xaq xk'am upam.

Currently Selected:

Hebreos 2: ACHICUB

Highlight

Copy