Hebreos 3

I Jesucristo, atz u'ij chwach i mam Moisés

1Yix, wachalal chwach i Cristo, chi lik ix re chik i Dios, ix sik'tal rumal i Ta chikaj, rumali, chixch'ob'on che i Jesucristo, are ire Apóstol xaq i atz laj rajpatan i Dios, ni'pa i qaya'om qak'ux che uk'utunik ire. 2I Jesucristo lik xutz'aqatsaj upatan chi yatal che rumal i Dios, pacha xu'an i mam Moisés ujer, chi lik xu'an upatan chwach i Dios, lik xrok'aj utzam chke i rak'al i Dios. 3I Jesucristo yatal mas u'ij chwach i mam Moisés, xaq keje pacha jun aj-anol ja, mas o u'ij chwach i ja chi ku'ano.#3.3 I usuk' i tzij xaq ke'eloq: “I mer rajaw ja o mas u'ij chkiwach i je aj prachoch.” We keje usuk' i tzij le, lik kumaj rib' uri ru' i versículo 5 y 6. 4Ronojel i ja o i ke'anawik, xwiri are i Dios x-anaw ronojel wach taq i olik. 5I mam Moisés, pacha utz laj ajchak, utz upatan u'anom chke i rak'al i Dios. Are i upatan i mam Moisés xuk'ut chke wach ku'aljinsaj ni Dios chke k-on panoq. 6Xwiri, i Jesucristo, lik are Uk'ojol i Dios, chi saqil laj rajaw ja. Lik utz upatan ku'an pkiwi i rak'al i Dios, are yoj oj rak'al le, xwiri we kqasach ti ukub'ib'al qak'ux che i Ajwal, xaq i kikotemal chi kqana wo'or rumal i utz chi kqatij ru' i Ajwal k-on panoq.

Uya'ik ukowil k'uxij re u'anik i utz

7Rumali, chqa'ana pacha kub'ij Lo'laj Utewal i Dios chi tz'ib'tal kan chupam uwuj i Dios:

Wo'or, we kita uch'awb'al i Dios,

8mi'an ko che iwanima, miqel uri utzij pacha xki'an iwatit imam ujer pa taq tz'inilik jyub' chaqij.

Ike xkik'am upam i Dios.

9I iwatit imam le, chila xkik'am wi inpam,

tupu kawinaq (40) junab' xkil uk'iyal nim laj anik chi xin-ano tob'al ke.

10Rumali xpe woywal chke i winaq le.

Xinb'ij: “Ike lik kewi je sachnaq pkik'ux;

kkaj ti keb'in chupam i utz laj b'e we yin.” Xincha.

11Rumali, xpe woywal chke, xaq xinb'ij:

“Qatzij, lik kinya ti chke chi ke'ok che i uxlanem wu' yin.”#3.11 Keje utzij i Dios ile chi tz'ib'tal kanoq. Salmos 95.7-11.

12Wachalal chwach i Cristo, chi'ana kwent iwib' chi mijun chiwe yix o taq ranima utz taj xaq we kukoj taj, man xa kujek' rib' ru' i Dios k'aslik. 13Are i chi'ana, chiya ukowil ik'ux chiwach ij ij. Miwoy-ej jun chik ij pacha kub'ij uwuj i Dios, lik chi'ana wo'or; man keje ile mijun chiwe yix kt'ortaj ni rumal i mak atzalal, i ku'an ko che ranima. 14Man yoj lik o qe che ronojel ni'pa i kuya i Cristo we lik kqasach ti ukub'ib'al qak'ux che; pacha ujeqik xqa'ano, xaq keje chqak'isa wi.

15Chk'un chik'ux i tziji chi tz'ib'tal chupam uwuj i Dios:

“Wo'or, we yix kita uch'awb'al i Dios, mi'an ko che iwanima;

miqel uri utzij pacha xki'an iwatit imam ujer.”#3.15 Keje ile tz'ib'talik. Salmos 95.7-8.

16Kintz'onoj ut: ¿Pachin keje xe'anaw ile? ¿Pachin xkita utzij i Dios i x-on panoq xekojon ti chik che? Je are ike chi i mam Moisés xeresaj li pa tinimit Egipto. 17¿Je pachin i winaq chi kawinaq junab' (40) xpe roywal i Dios chke? Ku' i winaq chi xemakunik xaq xekam chila pa tz'inilik jyub' chaqij. 18¿Je pachin i winaq ub'im i Dios chi lik kkiriq ti uxlanem ru'? Je are ike chi xkiqelo. 19Chi uri kqil wi, chi xya' ti chke xe'ok che i k'ijib'al re uxlanem, man xkikub'a ti kik'ux che utzij i Dios.

Currently Selected:

Hebreos 3: ACHICUB

Highlight

Copy