Hebreos 1

I Dios xch'aw pub'i Uk'ojol

1Ujer, i Dios xub'ij utzij chke i qatit qamam, lik k'iyalmul xub'ij chke, te'uri ike xkib'ij chke i jub'an chik winaq, jalajuj taq u'ankil xu'ano, xwiri lik xuya i utzij chke. 2Xwiri wo'or, che i k'isb'al taq iji, i Dios xuya retamaxik utziji chqe pub'i Uk'ojol xu'an i ulew, i ij, i ik', xaq i ch'umil. Xaq ub'im kan i Dios chi ronojel, kuya pu'ab' Uk'ojol wach taq i olik. 3Che i Uk'ojol le kqil wi utzunb'al uchomalil i Dios; xaq i nim laj u'ij i Dios. Pacha i Jesucristo xaq keje Ire. Are i Jesucristo kok'aw utzij ru' ronojel wach i olik, ru' utzij chi lik nim ucho'ab' rok'am ile. Chrijil chik ukuyik qamak, x-e chikaj, xaq xkub'i puwiqab'im i ukub'ib'al i Dios chi o u'ij.

I Uk'ojol i Dios, lik atz u'ij chkiwach i ángel

4Uk'ojol i Dios, lik mas atz u'ij chkiwach i ángel, man i Uqajaw uya'om upatan chi mas o u'ij chkiwach ike.

5Man i Dios mitjulaj xub'ij taq che jun ángel:

“Yet at ink'ojol;

chi inya'om ak'aslemal.”

Xaq xub'ij ti tziji:

“Yin pacha in Uqajaw ire;

ire pacha ink'ojol.”

6X-on panoq, i Dios are xutaq li Uk'ojol, chi atz u'ij chwach i jyub' ta'aj, xub'ij:

“Konojel i ángel chkikojo u'ij i Wak'al.”#1.6 Keje ile tz'ib'talik.

7I Dios keje iri kub'ij:

“I Dios ku'an chke i ángel chi je keje pacha i tew; man lik kki'an i mantar re i Dios chi lik o u'ij

i je keje pacha urep a'.”

8Xwiri, che Uk'ojol, keje iri kub'ij:

“Awajawinik yet Dios, lik nti uk'isik.

I atb'al tzij chi ka'ano, lik suk'ulik.

9Yet lik kawaj i suk'ulik, tzel kawil i suk'ul taj,

rumali at u'ulum i Dios,

xaq uya'om jun nim laj kikotemal chawe,

chi mas nim chkiwach awachi'il.”#1.9 Keje ile tz'ib'tal chupam i wuj re i Dios: Salmos 45.6-7.

10Xaq kub'ij:

“Yet, Ajwal, chuxeb'al ij saq xakub'a i jyub' ta'aj;

xaq lik xa'an i kaj.

11Ni'pa ile kk'is uwach,

xwiri yet nti ak'isik, ronojel ij saq.

Ronojel ile xa k-elab'ik pacha jumolaj k'ul.

12Ronojel ile, kab'us na pacha ka'an che jun k'ul;

ronojel ile kajalwachij pacha jun winaq kujal u'u'.

Xwiri yet katjaltaj taj,

xaq i ak'aslemal nti uk'isik.”#1.12 Keje ile tz'ib'talik: Salmos 102.25-27 (griego).

13I Dios mitjulaj ub'im iri che jun ángel:

“Chatkul pinwiqab'im,

k'a keinya ni pawaqan i je ajch'oj chawij.”#1.13 Xwi che Uk'ojol xub'ij i Dios ile: Salmos 110.1 Cf. Xaq Mateo 22.44; Hechos 2.33-35; 1 Corintios 15.25; Efesios 1.20.

14Konojel i ángel lik je tewalil, xaq je rajchak i Dios; je taqtal chkito'ik i winaq chi lik ketotaj ni rumal i Dios.

Currently Selected:

Hebreos 1: ACHICUB

Highlight

Copy