Hebreos 11

Kub'ib'al k'uxij che i Dios

1Jun, we o ukub'ib'al uk'ux che i Dios, lik kuna uri puk'ux chi kril na wach i roy-em. Nti k-ono we k'amaja krilo, xwiri reta'am chi qatzij kril na. 2I qatit qamam lik o i ukub'ib'al kik'ux che i Dios, rumali i Dios utz xerilo.

3Rumal ukub'ib'al qak'ux che i Dios, qeta'am chi Ire, ru' uch'awb'al, xu'an i kaj xaq i jyub' ta'aj.#11.3 Génesis 1.1; Salmos 33.6,9. Rumali, ni'pa i kqil wo'or, are i Dios xuyijb'a ru' uch'awb'al, che ti wach k-iltaj uwach xuyijb'a wi.

4Ujer i a Caín, i a Abel xkisujuj kisipon chwach i Dios. I a Abel lik xukub'a uk'ux che i Dios, rumali, wach i xusujuj che i Dios,#11.4 Génesis 4.3-7. mas utz xelik chwach i xusujuj i a Caín. Rumali i Dios utz xril i a Abel chi lik suk'ul i xu'ano, xaq utz xril usipon che. Rumali i a Abel tupu ujer kamnaq, yoj wo'or qeta'am wach i utz laj kub'ib'al k'uxij, rumal wach xu'an ire.

5Xaq i mam Enoc, lik xukub'a uk'ux che i Dios. Rumali, lik k'aslik, xk'am b'i chikaj rumal i Dios. Rumali, xriqtaj ti uch'akul chi, i uwuj i Dios kub'ij, are k'amaja kk'am b'i i mam Enoc rumal i Dios, ni'pa i xu'ano, utz xril i Dios.#11.5 Keje ile tz'ib'tal chupam uwuj i Dios. Génesis 5.21-24. 6Xwiri we kul ti qak'ux che i Dios, kojtiki ti uri chu'anik wach kumaj uwach. We kqaj kojtejeb' ru' i Dios, o uchak kqakojo chi qatzij o i Dios; xaq o uchak chi kul qak'ux che, chi Ire kuya i utz chke ni'pa i kkitzukuj.

7I mam Noé ujer, lik kul uk'ux che i Dios. Rumali, are xb'ix che rumal i Dios chi o taq i kpetik chi rilom taj, xwiri ire xkojonik xaq xuyijb'a i nim laj barco tob'al ke i ralk'uwal.#11.7 Génesis 6.13-22; 7.1. Rumal i ukub'ib'al uk'ux mam Noé le, ire xeuk'oqoj i winaq re i uwach jyub' ta'aj, rumali ire lik xya' suk'ul laj atb'al tzij che rumal i ukub'ib'al uk'ux. 8Xaq i mam Abraham ujer, lik kul uk'ux che i Dios. Rumali, are xsik'ix rumal i Dios, xukojo wach i xb'ix che. Xel putinimit, xumaj b'i ub'e, reta'am taj ipa k-e wi#11.8 Xwiri x-ek man kul uk'ux che i Dios chi kk'am b'i che i ulew chi xsujux che rumal i Dios..#11.8 Génesis 12.1-5. 9I mam Abraham x-e jeqel che i ulew chi Dios usujum che; chila xk'iji wi pacha jun aj naj. Xuch'ijo man kul uk'ux che i Dios; reta'am chi k-on panoq kya' ni che ni'pa i sujum che.#11.9 Cf. Hebreos 6.13-15. Xjeqi chupam i wu'waq taq ja, xaq keje ni ma Isaac, chi rak'al mam Abraham; xaq keje ni ma Jacob chi ri umam. Xaq chke ike, i Dios usujum i ulew le.#11.9 Génesis 23.4; 26.3; 35.12,27. 10Keje ile xu'an i mam Abraham, man roy-em chik rokik che jun chom laj tinimit chi o uxeb'al lik ko chila chikaj. Man i tinimit le are i Dios ch'ob'ownaq u'anik; xaq are Ire xyijb'awik.

11Xaq i ati Sara#11.11 Chi rixoqil i mam Abraham. o ukub'ib'al uk'ux che i Dios, rumali, tupu ire kalan taj, i Dios xuya ucho'ab'. Te'uri xk'iji rak'al, tupu nim laj winaq chik. Keje ile xu'ano man i mam Abraham xukojo chi i Dios lik ku'an na pacha ub'im che. 12Keje ile, i mam Abraham, purijal xk'iji rak'al. X-on panoq lik xek'iyar umuq uxikin pacha uk'iyal i ch'umil, pacha uk'iyal i seneb' chuchi' i mar.#11.12 Génesis 15.5; 22.17; 32.12. Lik k-an ti chik tikilem chrajlaxik.

13I mam Abraham, ru' uk'ojol, xaq ru' i ri umam, xkisach ti ukub'ib'al kik'ux che i Dios. Xkisach taj k'a are xekamik, tupu k'amaja kya' pki'ab' wach usujum i Dios chke. Xe'eloq pacha k'a naj xkil panoq wach usujum i Dios chke. Lik xekikotik are xkilo. Ike xkib'ij chi waral xa pacha to' je aj naj je k'unnaq, to' je aj-ik'awel chwach i jyub' ta'aj.#11.13 Génesis 23.4. 14Pachin kub'ij keje ile, alaj uri chi lik k'amaja kuriq rulew, k'a kb'in chutzukuxik. 15Ike xkich'ob' ti chik kitinimit ipa je petnaq wi. Wetene xkich'ob' chik tzalijik chila, xetzalij teneri. 16Xwiri, xkirayij jun kitinimit lik utz na chwach ipa xe'el wi loq, man xkirayij i kitinimit aj chila chikaj. Rumali, i Dios kk'ix ti che, are kb'ixik chi Ire ki-Dios ike,#11.16 Éxodo 3.6,15. man uyijb'am jun kitinimit.

17I mam Abraham ujer, are xk'am upam rumal i Dios, ilb'al re we o ukub'ib'al uk'ux che, xusujuj ukamsaxik uk'ojol#11.17 Génesis 22.1-14. chi a Isaac, pacha jun usipon chwach i Dios. Keje ile xu'ano, tupu xa jun uk'ojol. Tupu are i uk'ojol ile chi usujum i Dios che. 18Ujer, i Dios ub'im che: “Rumal awak'al a Isaac kek'iyar ni amuq axikin.”#11.18 Génesis 21.12. 19I mam Abraham reta'am chi i Dios lik nim i ucho'ab' chuwalijsaxik jun kamnaq. Xel uri chi i mam Abraham pacha xril uk'ojol kamnaq te'eq,#11.19 Génesis 22.5,13. xaq k'unnaq chik saq chwach.

20X-on panoq, xaq i mam Isaac xu'aljinsaj ukub'ib'al uk'ux che i Dios, rumali xub'ij chke i rak'al chi qatzij kya' ni i utzil chomal chke. I kib'i i rak'al le: Jun, a Jacob; i jun a Esaú.#11.20 Génesis 27.27-29,39-40.

21X-on panoq, i ma Jacob le xu'aljinsaj ukub'ib'al uk'ux che i Dios, rumali are ya kkamik, xuk'am ucho'ab' che uch'amiy, xuxukb'a ujolom, xaq xukoj u'ij i Dios. Xuya u'ab' pkiwi i ri umam xaq xub'ij chke chi kya' ni i utzil chomal chke. I ri umam le, je rak'al i ma José.#11.21 Génesis 47.31—48.20 (gr).

22X-on panoq, xaq i mam José le, xu'aljinsaj ukub'ib'al uk'ux che i Dios are ya kkamik. Xub'ij chi k-on panoq i aj Israel winaq ke'elsax ni pki'ab' i aj Egipto. Xub'ij kanoq chi chkik'ama b'i ub'aqil ku', are ke'ek.#11.22 Génesis 50.24-25; Éxodo 13.19; Josué 24.32.

23X-on panoq, xaq i uqajaw uchuch i a Moisés xki'aljinsaj ukub'ib'al kik'ux che i Dios, are xalax i a Moisés, xkil uqajaw uchuch chi lik chom laj ak'al. Lik kul kik'ux che i Dios chi keuto na; rumali, xkixij ti kib' che i atb'al tzij le, chi xuya i ajawinel chi ni'pa i alab'om kealaxik kekamsaxik. Ike oxib' ik' xkuwaj i ak'al le.#11.23 Éxodo 1.22—2.2.

24X-on panoq, xaq i mam Moisés le, xu'aljinsaj ukub'ib'al uk'ux che i Dios. Are nim chik, lik xraj ti chik kb'ix che chi are ralab' umi'al i ma faraón, chi ajawinel pa Egipto.#11.24 Éxodo 2.10-12. 25Ire xuch'ob'o chi utz taj#11.25 Wetene xu'ano, ke'eloq ajmak laj winaq chwach i Dios man i aj Egipto xkikoj ti u'ij i Dios; i mam Moisés, aj Israel winaq. kutij i utz i chom ku' i ne te re i Dios, man ile xa kik'awik, xa ksachik. Xuch'ob' ire chi mas utz kutij ni k'ax ku' i winaq chi je re i Dios. 26Xuch'ob' ire, utz we kutij uyej rumal ukub'ib'al uk'ux che i Mesías chi taqtal loq. Keje ile xuch'ob'o man roy-em na wach usujum i Dios che. Xuch'ob' ire, mas utz ile chwach ronojel taq i b'eyomal chila pa Egipto.

27Rumal ukub'ib'al uk'ux che i Dios, xel i mam Moisés pa ulew Egipto.#11.27 Cf. Éxodo 2.11-15. Xuxij ti rib' che i roywal i ajawinel, xwiri, jikil uk'ux x-ek, pacha taq lik kril uwach i Dios. 28X-on panoq i mam Moisés xu'aljinsaj tan chik ukub'ib'al uk'ux che i Dios, man xu'an i nima'ij Pascua. I xeutaq chukitzkaxik kik' che taq uchija che i kachoch. Man are kik'aw i ángel ajkamsanel kukamsaj ti nab'e k'ojol ke i jalajuj taq alk'uwal aj Israel.#11.28 Éxodo 12.21-30.

29X-on panoq, i aj Israel winaq xaq xki'aljinsaj ukub'ib'al kik'ux che i Dios are xe'ik'aw chupam i Mar kaq. Chk'un chik'ux, are xe'ok b'i chuchi' i ya, are uri i Dios xujaq upam i mar; keje ile chaqij i kib'e xe'ax ch'aqap. Xwiri, i aj Egipto winaq, are xkitij te'eq ik'awik, xemuqtaj kan pa ya.#11.29 Éxodo 14.21—15.21.

30X-on panoq, i aj Israel winaq xki'aljinsaj tan chik ukub'ib'al kik'ux che i Dios are xesutin chrij i tinimit Jericó. Are xel wuqub' ij i kisutinik, xwulij b'i i nim laj tapial re i tinimit le, are uri xe'ok pa tinimit.#11.30 Josué 6.12-21. 31Xaq i ixoq Rahab chi chwach uch'akul kuch'ak wi upwaq xu'aljinsaj ukub'ib'al uk'ux che i Dios. Ire xkam ti junam ku' i je qelqel laj taq winaq man ire lik ru' ronojel uk'ux xeuto i winaq chi to' je ajtaqenel aj Israel.#11.31 Chi utinimit ixoq Rahab.#11.31 Ixoq Rahab xeuto; rumali, xkamsax taj are xekamsax i jub'an chi xekojon ti che i Dios.#11.31 Josué 2.1-21; 6.22-25.

32¿Wach chik mas kinb'ij chiwe? Xwi ile, lik k-an taj ti chik ub'ixkil chiwe wach i xki'an i ma Gedeón, xaq i ma Barac, xaq i ma Sansón; xaq wach i xki'an i ma Jefté, i ma David, i ma Samuel, xaq i je profeta. 33Ike, rumal ukub'ib'al kik'ux che i Dios, xetiki chumajik i k'iyal taq tinimit. Xkik'ut i suk'ul laj atb'al tzij, xkik'am i sujunik chi i Dios ub'im pub'i, xkitz'apij i kichi' i koj ru' ni'pa ile.#11.33 Jueces 14.5-6; 1 Samuel 17.34-37; Daniel 6. 34O jujun xemin pa orno,#11.34 Daniel 3. xwiri xekam taj tupu nim ucho'ab' i a'; o jujun laj xekamsax ru' ch'ich' chi k'ulala o uware, xwiri i Dios xeuto chi xekamsax taj; o i nti kicho'ab', xwiri rumal ukub'ib'al kik'ux che i Dios lik xk'iji kicho'ab'; xaq o jujun, are xki'an ch'oj, xekich'ak i achiyab' chi je ajch'oj chkij. 35Rumal ukub'ib'al kik'ux che i Dios, je o ixoqib' chi xkil i kak'al je kamnaq te'eq, xwiri xewalij chik che i kamik, xaq xeya' tan chik chke.#11.35 11.35 1 Reyes 17.17-24; 2 Reyes 4.25-37.

Xaq je o jujun x-ani k'ax chke xaq xekamik; xkixutuj i kelb'al chwach i k'ax le, lik xko'taj ti kan i Dios. Keje ile xki'an ike, ch'akb'al re kik'aslemal mas chom na chwach re i waral. 36O jub'an chik xkich'ijo xeyo'yaxik, xaq xkich'ijo are xya' kilo'xik;#11.36 Jeremías 20.2; 37.15. xaq xwi ta la ile, xaq xkich'ijo chi xexim ru' karena, xaq xetz'apix prexil.#11.36 1 Reyes 22.26-27; 2 Crónicas 18.25-26; Jeremías 20.2; 37.15; 38.6. 37O jub'an chik xekamsax ru' ab'aj,#11.37 Cf. 2 Crónicas 24.20-21. xaq je o jujun xepir pa nik'aj ru' sierra#11.37 Xkitij i k'ax man xkimayij ti ukojik u'ij i Dios.. Xaq je o jujun xekamsax ru' ch'ich' chi o uware k'ulala.#11.37 Jeremías 26.23. O jujun xe'e jela, xe'e jewa, nti ki'u', to' utz'umalil chij, utz'umalil chab'at xkikojo; lik je nib'a', xaq xe'oksax il, lik xaqmanal x-an chke. 38Ike le to' keb'in pa taq jyub' tz'inilik, xaq pa taq k'achelaj; kewar pa taq jul, pa taq pek. Ike le lik je utz; kmajaw ti chke kek'iji ku' i jub'an winaq chwach i jyub' ta'aj.#11.38 1 Reyes 18.4; 19.9.

39I Dios lik kkikot ku' ike man xrilo chi kul kik'ux che Ire. Xwiri lik mijun chke ike xya' i sipon chke chi usujum i Dios chke. 40Man uch'ob'om i Dios chi kuya ni utzil chomal chqe, xwiri Ire uch'ob'om i utz chke junam qu' yoj man keje ile ike xaq ketz'aqat na pacha kraj i Dios.

Currently Selected:

Hebreos 11: ACHICUB

Highlight

Compare

Copy