Hebreos 12

Qacho'ab' chupam i jalajuj taq k'ax

1Yoj chqij chqawach lik kqilo chi je k'i i winaq xki'aljinsaj ukub'ib'al kik'ux che i Dios. Rumali chqakanaj kan ronojel ni'pa i b'iroxik chi kojresaj chupam ub'e i Dios xaq i makunik chi xaqmanal ku'an chqe, man i qak'aslemal lik pacha jun anem chi lik rajwaxik chi o qacho'ab'. 2Mqamayij uch'ob'ik i Jesús, man are ire xyaw ukub'ib'al qak'ux chuxeb'al loq, xaq are ire kyaw ni chqe chi kqariq na wach i qakub'am qak'ux che. I Jesús xutij uyej chwach i krus. I ukamsaxik le chi xki'an che, lik nim laj k'ixb'al che ire, xwiri, xuya rib' che, man reta'am we xik'aw che ile, te'uri nim laj kikotemal kutij na. Are x-antaj ile, x-ekub'i puwiqab'im i ukub'ib'al i Dios chi o u'ij.#12.2 Salmos 110.1; Efesios 1.20; Filipenses 2.6-11; Hebreos 1.3; 2.9; 8.1; 10.12.

3Chixch'ob'on uri che wach xuk'ulmaj i Jesús. Ire, nim uyej xutij pki'ab' i ajmakib' laj taq winaq. Rumali, yix mb'a'krij ik'ux, xaq misach ukowil ik'ux. 4Yix lik iwilom ti i kamik rumal i mak atzalal, pacha i kamik xik'aw wi Ire. 5¿Xatab'a ya xsach pik'ux wach kub'ij i Dios? Kixupixb'aj pacha jun qajawxel keupixb'aj i rak'al. Chupam uwuj i Dios kub'ij:

“Wak'al, maxutuj asuk'b'axik chi kya' chawe rumal i Ajwal,

man xa tijojb'al awe chu'ankil i utz.

Msach ukowil ak'ux are katij yaj rumal.

6Man i Ajwal keusuk'b'a ni'pa i k'ax keuna'o;

xaq kuya i tojb'alil pkiwi ni'pa i je rak'al chik.”#12.6 Keje ile tz'ib'tal chupam uwuj i Dios. Proverbios 3.11-12 (gr.).

7Chich'ija ni'pa i k'ax kitijo suk'b'al iwe, man i Dios keje ku'an chiwe pacha ku'an jun qajawxel chke i rak'al. ¿Xatab'a o jun ak'al kjek' ti rumal uqajaw? Qatzij kjek'ik. 8I Dios we kixujek' taj, pacha ku'an chke konojel i rak'al; yix ix saqil laj ti rak'al uri. 9Are oj ch'utiq te'eq, i qaqajaw qachuch waral chwach i jyub' ta'aj, kojkijek'o suk'b'al qe; xaq lik kojkojon te'eq chke: ¿B'uchak uri kqaya ti qib' pu'ab' i Qaqajaw aj chikaj ru' wach kraj ku'an chqe? Kqariqb'ej re i qak'aslemal. 10Are oj ch'utiq, i qaqajaw qachuch xojkisuk'b'a. Xki'an chqe pacha xmajawik chi utz xkich'ob' ike. Xwiri qatzij, are i ku'an i Dios chqe, are anb'al re i utz chqe. Kraj ire oj ch'am pqak'ux pacha ire. 11Qatzij, are kya' utojb'alil chqe kqaj taj, man lik k'ax. Xwiri we nim qak'ux kqach'ijo, kya' uri jun k'aslemal chqe re utz olem xaq lik suk'ulik.

12Rumali, chikowij ik'ux. Chiya icho'ab' che i'ab' chi kosnaq, xaq che iwaqan chi nti chik ucho'ab' kb'inik.#12.12 Isaías 35.3. 13Chix-ol che i b'e suk'ulik.#12.13 Proverbios: 4.26. We keje ile ki'ano, we o jun qachalal kixrilo chi nti qas ucho'ab', kukowij uri ub'inik chwach i Dios xaq kel ti chupam i utz laj b'e.#12.13 I mer tzij kub'ij keje iri: I aqanij jetz' kutzir na, y kjech'ab' ti chik.

Jek'anik re i chajinik

14Chikoch'ij iwib' che jun k'aslemal, utz chix-ol ku' konojel i winaq xaq chixkojon che i Dios, man we keje ti ile ki'ano, keiwila ti uri uwach Ire. 15Miya'o chi kujek' taq rib' jun winaq ru' i Dios, xaq miya'o chi mijun kujeq taq jun ch'oj chkixol i tzob'ajil, man ile utz taj lik pacha taq jun tikon lik k'a, chi ku'an k'ax xaq lik kixritzij na. 16Miya'o chi o jun chiwe kuch'ak taq umer chwach uch'akul xaq kuk'aq b'i u'ij i Dios; Man chk'un chik'ux, wach xu'an i ma Esaú ujer; xro'taj kanoq wach i o re che rumal i Dios.#12.16 Ire o te'eq u'ij rumal i Dios, man atz chkixol i rachalal. Xwiri xuk'ayij u'ij le che ucha' xa rumal jun wa'im.#12.16 Génesis 25.29-34. 17Xaq iweta'am yix chi x-on panoq x-e ru' uqajaw, kutz'onoj te'eq utzil chomal re i Dios puwi chi o re ire che, xwiri xya' ti chik che. Tupu lik xo'ik, xwiri lik xtiki ti chik che.

18I k'ijib'al ipa xixupon wi yix keje taj pacha i k'ijib'al ipa xeupon wi i aj Israel winaq ujer. Ike xeupon chuxe' i jyub' chi Sinaí ub'i are xya' utzij upixab' i Dios chke. Chila xkilo chi kjuluw i a', lik xu'on eqmuj i x-equmarik, xaq kjuk'kan i tew. 19Are je o chila xkita uch'awb'al i trompeta xaq uch'awb'al i Dios, xwiri are i xetawik lik xkitz'onoj che chi chumayij ch'awik. 20Keje ile xki'ano, man lik xek'achir che i tzij chi ub'im chke: “Mijun chiwe, xaq mijun chikop kol-el waral che i jyub'i. We xkojon ti che ile, kkamsaxik; kk'aq che ab'aj o kkamsax ru' ch'ich'”.#12.20 Éxodo 19.12-13. 21Lik xib'in ib' ru' wach xkilo. I mam Moisés xub'ij: “Lik kinsiksat rumal inxib'rikil”.#12.21 Deuteronomio 9.19.

22Xwiri yix chi ix re i Cristo ix tejeb'naq chik che jun jyub' mas nim u'ij chwach i jyub' chi xeupon wi ike. Ix tejeb'naq chuxe' i jyub' Sion, chi ke'eloq utinimit i Dios k'aslik, xaq Jerusalén aj chikaj kb'ix che. Chila kimolom wi kib' uk'iyal lajujwinaq kamo' (1,000) ángel chi kkikoj u'ij i Dios. 23Ix tejeb'naq chik che i molb'al ib' ku' i nab'e taq rak'al i Dios, ni'pa i tz'ib'tal kib'i chwach i wuj chila chikaj. Ix tejeb'naq ru' i Dios chi ku'an ni atb'al tzij pkiwi konojel i winaq. Ix tejeb'naq ru' i kanima i je utz laj taq winaq chi suk'ul kik'aslemal chwach i Dios. 24Ix tejeb'naq ru' i Jesucristo chi rumal Ire i Dios xu'an jun trat k'ak' iwu'; ile rumal i ukik'el i Jesús chi xutix chwach i krus are xkamik, xaq ch'ajb'al re i mak atzalal. I ukik'el ire kmajaw taj pacha ukik'el i a Abel ujer.#12.24 I ukik'el i a Abel xukoj umak i a Caín chwach i Dios, xwiri, i ukik'el i Jesucristo kutz'onoj i kuyb'al qamak yoj chwach i Dios. Génesis 4.10.

25Rumali chi'ana kwent, mixutuj are kraj qajek'ik. I iwatit imam xkixutuj i Dios are xraj kijek'ik chi chwach i jyub' ta'aj, xwiri lik xkitoj ni i kimak, ¿Xatab'a kqatoj ti qamak yoj we kqaxutuj i jun chi kch'aw li chqe chikaj? Lik kqatojo na.#12.25 Éxodo 20.22. 26Ujer, are xch'aw i Dios puwi i jyub' Sinaí, xsilab' i jyub' rumal uch'awb'al. Xwiri wo'or, ub'im chik i Dios chqe: “Juyak chik kinsilab'saj i jyub' ta'aj, xaq xwi ti ile, xaq kinsilab'saj i kaj”; xub'ij.#12.26 Hageo 2.6. 27Are xub'ij “juyak chik”, kqata uri chi ni'pa taq i u'anom i Dios chi ksilab'saxik, ile kelsax na;#12.27 I usuk' i keb' versículo ri moq are iri: I Dios kusach ni uwach i kaj, y jyub' ta'aj; ni'pa u'anom, kujalwachij na chwach jun chik chi ksach ti chik uwach. Yoj kojok na chila pa ku'at wi tzij i Dios; i k'ijib'al le ksachsax ti uwach. ni'pa taq i ksilab' taj, ile kkanajik, ksach ti chik uwach. 28I ajawinik re i Dios chi kuya chqe, ile ksilab'sax taj, xaq kelsax taj. Chqatioxij ile, xaq chqakojo u'ij i Dios ru' ronojel qak'ux, xaq chqatioxij i nim laj k'axnab'al uk'ux pacha i kmajawik. 29Man i Dios, pacha jun a' chi kuporoj ni'pa i utz taj chi o chwach.#12.29 Deuteronomio 4.24; 9.3.

Currently Selected:

Hebreos 12: ACHICUB

Highlight

Compare

Copy