Hebreos 10

I ujer atb'al tzij chi qas ti utz

1I ujer atb'al tzij chi xutz'ib'aj i mam Moisés ile uk'exwach i saqil chi ktijin loq, xa are unab'eyal i saqil laj usuk'. I ujer atb'al tzij le ktiki ti chkisuk'b'axik i winaq chwach i Dios. Tupu junab' junab' kkisujuj ukik'el chikop chwach, xwiri ktiki ti chkisuk'b'axik ni'pa i ketejeb' ru' i Dios. 2Wetene i atb'al tzij ktiki chrelsaxik i mak atzalal, lik nti ne chik kimaki kkina'o, xaq lik kkimayij neri usujuxik i sipon. 3Xwiri i usujuxik ukik'el chikop junab' junab', xresaj ti kimak; i anik le xa kuk'unsaj tan chik pkik'ux chi o kimak. 4Man i ukik'el i toro, xaq i ral taq chab'at ktiki ti chrelsaxik kimak i winaq.

I ukamik i Jesucristo

5Rumali i Jesucristo are xk'un chi chwach i jyub' ta'aj, keje iri xub'ij che i Dios:

Yet kawaj ti ukik'el chikop chi ksujux chawe; xaq kawaj ti to' wach taq i ksujux chawach.

Puk'exel ile xayijb'a inch'akul.

6Kumaj ti awach kporox chikop chawach; kumaj ti awach ksujux k'exelaj chawe elsab'al kimak i winaq.

7Are uri xinb'ij: “Nim laj Dios, chi in o wi, in k'unnaq chu'anik wach i kawaj yet;

kin-ano pacha i tz'ib'tal kan chupam i ujer wuj.”#10.7 Salmos 40.6-8 (gr.).

8Che i tzij le, kqata wi chi i Jesucristo nab'e xub'ij chi i Dios kraj ti chik ukik'el chikop, xaq mitene wach taq i kkisujuj chwach. Kraj ti ksujux chikop, xaq kporox chikop chwach elsab'al kimak i winaq. Kraj taj, tupu i ujer atb'al tzij xb'in ile chi kki'ano. 9Te'uri xub'ij chik: “Nim laj Dios, chi in o wi, in k'unnaq chu'anik wach i kawaj yet.” Kqata uri chi i Dios xresaj i nab'e anik re ukamsaxik chikop, xaq xuya ukamsaxik i Jesucristo puk'exel ile. 10I Jesucristo xu'ano wach xraj i Dios. Rumali qonojel yoj lik u'anom chik ch'am i Dios chqe pqanima, man ire xusujuj uch'akul, xa julaj xu'ano, xaq lik re ronojel ij saq.

11Konojel i ajsujul sipon ke i aj Judío winaq, kki'an kipatan ij ij. Lik arewi kkisujuj kik'exel i winaq, xwiri ile lik nti uchak, man ktiki ti chrelsaxik kimak i winaq. 12Xwiri i Jesucristo keje ti ile xu'ano. Ire lik xa julaj xusujuj rib' xaq lik re ronojel ij saq, elsab'al kimak i winaq. Te'uri xkub'i puwiqab'im i Dios chila chikaj. 13Chila kroy-ej wi, k'a kuriq ni ij are keya' ni ajch'oj praqan u'ab'. 14Man xa rumal jun sipon chi are i Jesucristo; Ru' ile xu'an i suk'ulik chke k-e ij saq chkij ni'pa i je jachom pu'ab' i Dios. 15I Lo'laj Utewal i Dios ku'aljinsaj chqe chi saq laj tzij ile. Keje iri kub'ij:

16K-on panoq i trat chi kin-an ku' ike chrijil chik i ij le are iri:

Kinya in-atb'al tzij pkanima ike;

wach inno'oj yin,

kintz'ib'aj pkinojb'al ike. Keje ile xub'ij i Ajwal.

17Xaq kub'ij: Kink'unsaj ti chik chink'ux ni'pa i mak atzalal ki'anom.#10.17 Keje ile xub'ij: Jeremías 31.33-34 (cf. Hebreos 8.8-12).

18B'ay, we elsam chik i qamak chqij, nti chik uchak uri we ksujux taq i sipon tojb'al re qamak.

Chojtejeb' ru' i Dios

19Wachalal chwach i Cristo, rumal ukik'el i Jesucristo, kojtiki che okik chwach i Dios pa lo'laj uk'ijib'al, lik kqaxij ti qib' che i okik. 20Man are xkam i Jesús, xujaq i kortin chi kuya ti te'eq chqe kojik'awik. Xwiri wo'or i Jesús lik k'aslik, xaq rumal Ire yoj utz kojtejeb' ru' i Dios ru' jun k'ak' k'aslemal xaq junwi. 21Are i Jesucristo are i atz laj rajpatan i Dios chwach i rachoch i Dios chila chikaj. 22Chojtejeb' ru' i Dios lik ru' ronojel qak'ux; mqa'an keb' qapalaj chu'ankil, chqa'ana ru' ukub'ib'al qak'ux saqil. Ire u'anom chik ch'am che i qanima#10.22 I mer tzij xub'ij are iri: I qanima kitztal., rumali, kuna qak'ux chi nti chik qamak; xaq i qach'akul ch'ajtal chik ru' i ch'am laj ya. 23Choj-oloq jikil qak'ux che chi kqil na wach taq usujum i Dios chqe. Mqo'taj kan ukub'ib'al qak'ux che, xaq mb'a'krij qak'ux chroy-exik, man i Dios lik ku'an na wach usujum chqe. 24Chqato qib' chqawach chunimarsaxik i k'axnab'al qak'ux, xaq chu'anik i utz. 25Xaq arewi, chqamolo qib' pa taq molb'al ib'; mqamayij u'ankil. Qatzij, je o jujun kkimol ti chik kib' qu'. Xwiri utz kqamol qib' yoj man keje ile kqaya ukowil qak'ux chqawach, wo'or mas neri o rajwaxik, man ya knaqajab' i ij re uk'unik tan chik i Ajwal.

26Yoj chi qeta'am chik i saq laj tzij, we xa chu'ankil kojok tan chik che makunik, nti chik jun chik qak'exel uri tojb'al re i qamak. 27We keje ile kqa'ano, mqoy-ej uri chi Dios kril tob'al qawach; xa kqoy-ej i nim laj tojb'al mak kpe ni pqawi. Xa kqoy-ej i a' chi kusachsaj ni kiwach ni'pa i je ajch'oj ru' i Dios.#10.27 Isaías 26.11. 28I aj Judío winaq, we o jun chke kro'taj kan u'ankil i atb'al tzij chi tz'ib'tal kan rumal i mam Moisés, kkamsaxik, we je o keb' oxib' ajsaqinel tzij chrij ire, kkamsax uri rumal umak. Nti tob'al uwach.#10.28 Deuteronomio 17.2-6; 19.15. 29¿Kikoj ti yix chi lik nim i tojb'al mak kmajaw chke i winaq chi kkiqajsaj u'ij uk'ojol i Dios xaq kkik'aq b'i u'ij ukik'el, ile je are i kkiyo'ya utewal i Dios chi lik k'ax keuna'o? I kik' le are i kuya u'ij i trat, xaq ru' ile ike xe'elsaxik je re Ire. 30Kutoj ni uri umak. Qeta'am ile man i Ajwal Dios xub'ij: “I tzalijb'al uwach chke, wach i ki'anom, we yin u'ankil ile. Yin kinyaw i tojb'al mak chke, wach i ki'anom.” Keje ile xub'ij. I uwuj i Dios xaq kub'ij: “I Ajwal Dios ku'an ni atb'al tzij pkiwi i winaq je re ire.” Keje ile kub'ij.#10.30 Deuteronomio 32.35-36. 31I jun chi xa kupetsaj roywal i k'aslik Dios, lik xib'in ib' ru', ¡To' uwach ire are ktzaq ni pu'ab' i Dios le!#10.31 K'ax utojik umak ku'ano.

32Chk'un chik'ux wach iwilom ujer, are k'ate xikoj i saq laj tzij; nim i k'ax xpe chiwij, xwiri xich'ij ru' ukowil ik'ux. 33O jujun chiwe yix chi xqajsax i ij, xaq k'ax xech'aw chiwij chkiwach konojel i winaq. Xaq o jujun chiwe chi xijunamsaj iwach ku' i ketijin chrilik i k'ax le; rumali xaq yix xitij i k'ax ku'. 34Xeito i je tz'apilik man xiwil tob'al kiwach. Xaq xiya iwib' chke i je aj-atol tzij chi xkimaj ub'itaq iwe; xwiri xixkikotik. Xixb'ison taj man iweta'am chi o ub'itaq iwe chila chikaj chi lik mas utz; ile lik kk'is ti chik. 35Rumali, misach ukowil ik'ux, man ile kuk'am li jun nim laj sipon re i Dios chiwe. 36Mb'a'krij ik'ux chupam i k'ax, lik chich'ija k'a kik'is ni u'anik ni'pa kraj i Dios chiwe chi ki'an na. Te'uri kya' ni chiwe wach usujum ire. 37Chupam uwuj i Dios, keje iri kub'ij:

“K'iyal ti chik ij kkanajik,

te'uri i jun chi kk'unik, kk'un na;

kb'aytaj taj.

38I winaq chi kijachom kib' pin-ab', chi utz kik'ux chinwach, ike o ni kik'aslemal rumal ukub'ib'al kik'ux chwe.

Xwiri we jun kinro'taj kanoq,

yin kinkikot ti uri ru' ire.”#10.38 Keje ile kub'ij i Dios: Habacuc 2.3-4 (gr.).

39Xwiri, yoj oj ti kachi'il ike chi ketzalij chkij; oj keje taj pacha ike chi ksachsax kiwach. Yoj oj kachi'il i jub'an chi kikub'am kik'ux che i Ajwal, rumali kojtotajik.

Currently Selected:

Hebreos 10: ACHICUB

Highlight

Compare

Copy