Popular Bible Verses from Hebreos 11

Share

Jun, we o ukub'ib'al uk'ux che i Dios, lik kuna uri puk'ux chi kril na wach i roy-em. Nti k-ono we k'amaja krilo, xwiri reta'am chi qatzij kril na. I qatit qamam lik o i ukub'ib'al kik'ux che i Dios, rumali i Dios utz xerilo.

Xwiri we kul ti qak'ux che i Dios, kojtiki ti uri chu'anik wach kumaj uwach. We kqaj kojtejeb' ru' i Dios, o uchak kqakojo chi qatzij o i Dios; xaq o uchak chi kul qak'ux che, chi Ire kuya i utz chke ni'pa i kkitzukuj.

Rumal ukub'ib'al qak'ux che i Dios, qeta'am chi Ire, ru' uch'awb'al, xu'an i kaj xaq i jyub' ta'aj. Rumali, ni'pa i kqil wo'or, are i Dios xuyijb'a ru' uch'awb'al, che ti wach k-iltaj uwach xuyijb'a wi.

Xaq i mam Abraham ujer, lik kul uk'ux che i Dios. Rumali, are xsik'ix rumal i Dios, xukojo wach i xb'ix che. Xel putinimit, xumaj b'i ub'e, reta'am taj ipa k-e wi. I mam Abraham x-e jeqel che i ulew chi Dios usujum che; chila xk'iji wi pacha jun aj naj. Xuch'ijo man kul uk'ux che i Dios; reta'am chi k-on panoq kya' ni che ni'pa i sujum che. Xjeqi chupam i wu'waq taq ja, xaq keje ni ma Isaac, chi rak'al mam Abraham; xaq keje ni ma Jacob chi ri umam. Xaq chke ike, i Dios usujum i ulew le.

I mam Noé ujer, lik kul uk'ux che i Dios. Rumali, are xb'ix che rumal i Dios chi o taq i kpetik chi rilom taj, xwiri ire xkojonik xaq xuyijb'a i nim laj barco tob'al ke i ralk'uwal. Rumal i ukub'ib'al uk'ux mam Noé le, ire xeuk'oqoj i winaq re i uwach jyub' ta'aj, rumali ire lik xya' suk'ul laj atb'al tzij che rumal i ukub'ib'al uk'ux.

Xaq i mam Enoc, lik xukub'a uk'ux che i Dios. Rumali, lik k'aslik, xk'am b'i chikaj rumal i Dios. Rumali, xriqtaj ti uch'akul chi, i uwuj i Dios kub'ij, are k'amaja kk'am b'i i mam Enoc rumal i Dios, ni'pa i xu'ano, utz xril i Dios.

Ujer i a Caín, i a Abel xkisujuj kisipon chwach i Dios. I a Abel lik xukub'a uk'ux che i Dios, rumali, wach i xusujuj che i Dios, mas utz xelik chwach i xusujuj i a Caín. Rumali i Dios utz xril i a Abel chi lik suk'ul i xu'ano, xaq utz xril usipon che. Rumali i a Abel tupu ujer kamnaq, yoj wo'or qeta'am wach i utz laj kub'ib'al k'uxij, rumal wach xu'an ire.

Xaq i ati Sara o ukub'ib'al uk'ux che i Dios, rumali, tupu ire kalan taj, i Dios xuya ucho'ab'. Te'uri xk'iji rak'al, tupu nim laj winaq chik. Keje ile xu'ano man i mam Abraham xukojo chi i Dios lik ku'an na pacha ub'im che.

Keje ile xu'an i mam Abraham, man roy-em chik rokik che jun chom laj tinimit chi o uxeb'al lik ko chila chikaj. Man i tinimit le are i Dios ch'ob'ownaq u'anik; xaq are Ire xyijb'awik.

X-on panoq, xaq i mam Moisés le, xu'aljinsaj ukub'ib'al uk'ux che i Dios. Are nim chik, lik xraj ti chik kb'ix che chi are ralab' umi'al i ma faraón, chi ajawinel pa Egipto. Ire xuch'ob'o chi utz taj kutij i utz i chom ku' i ne te re i Dios, man ile xa kik'awik, xa ksachik. Xuch'ob' ire chi mas utz kutij ni k'ax ku' i winaq chi je re i Dios. Xuch'ob' ire, utz we kutij uyej rumal ukub'ib'al uk'ux che i Mesías chi taqtal loq. Keje ile xuch'ob'o man roy-em na wach usujum i Dios che. Xuch'ob' ire, mas utz ile chwach ronojel taq i b'eyomal chila pa Egipto. Rumal ukub'ib'al uk'ux che i Dios, xel i mam Moisés pa ulew Egipto. Xuxij ti rib' che i roywal i ajawinel, xwiri, jikil uk'ux x-ek, pacha taq lik kril uwach i Dios.

I mam Abraham ujer, are xk'am upam rumal i Dios, ilb'al re we o ukub'ib'al uk'ux che, xusujuj ukamsaxik uk'ojol chi a Isaac, pacha jun usipon chwach i Dios. Keje ile xu'ano, tupu xa jun uk'ojol. Tupu are i uk'ojol ile chi usujum i Dios che.

Xaq i ixoq Rahab chi chwach uch'akul kuch'ak wi upwaq xu'aljinsaj ukub'ib'al uk'ux che i Dios. Ire xkam ti junam ku' i je qelqel laj taq winaq man ire lik ru' ronojel uk'ux xeuto i winaq chi to' je ajtaqenel aj Israel.

X-on panoq, i aj Israel winaq xaq xki'aljinsaj ukub'ib'al kik'ux che i Dios are xe'ik'aw chupam i Mar kaq. Chk'un chik'ux, are xe'ok b'i chuchi' i ya, are uri i Dios xujaq upam i mar; keje ile chaqij i kib'e xe'ax ch'aqap. Xwiri, i aj Egipto winaq, are xkitij te'eq ik'awik, xemuqtaj kan pa ya.

X-on panoq, i aj Israel winaq xki'aljinsaj tan chik ukub'ib'al kik'ux che i Dios are xesutin chrij i tinimit Jericó. Are xel wuqub' ij i kisutinik, xwulij b'i i nim laj tapial re i tinimit le, are uri xe'ok pa tinimit.

X-on panoq i mam Moisés xu'aljinsaj tan chik ukub'ib'al uk'ux che i Dios, man xu'an i nima'ij Pascua. I xeutaq chukitzkaxik kik' che taq uchija che i kachoch. Man are kik'aw i ángel ajkamsanel kukamsaj ti nab'e k'ojol ke i jalajuj taq alk'uwal aj Israel.

X-on panoq, xaq i mam José le, xu'aljinsaj ukub'ib'al uk'ux che i Dios are ya kkamik. Xub'ij chi k-on panoq i aj Israel winaq ke'elsax ni pki'ab' i aj Egipto. Xub'ij kanoq chi chkik'ama b'i ub'aqil ku', are ke'ek.

X-on panoq, i ma Jacob le xu'aljinsaj ukub'ib'al uk'ux che i Dios, rumali are ya kkamik, xuk'am ucho'ab' che uch'amiy, xuxukb'a ujolom, xaq xukoj u'ij i Dios. Xuya u'ab' pkiwi i ri umam xaq xub'ij chke chi kya' ni i utzil chomal chke. I ri umam le, je rak'al i ma José.

X-on panoq, xaq i mam Isaac xu'aljinsaj ukub'ib'al uk'ux che i Dios, rumali xub'ij chke i rak'al chi qatzij kya' ni i utzil chomal chke. I kib'i i rak'al le: Jun, a Jacob; i jun a Esaú.