Filem%F3n 1

Ma Pablo kuya pan rutzil uwach ma Filemón

1Yin in ma Pablo chi in o prexil rumal i Jesucristo. Junam ru' i qachalal chwach i Cristo, a Timoteo, kintz'ib'aj b'i i wuji chawe yet ma Filemón; yet lik at qachi'il che i qachak, chi lik k'ax katqana'o. 2Xaq kqaya pan rutzil kiwach i jutzob'aj je re i Dios chi kkimol kib' pawachoch yet, xaq che i qachalal chwach i Cristo, ati Apia, xaq che i ma Arquipo, chi lik qachi'il che uchak i Ajwal. 3Kwaj yin kk'iji ni utz piwi, xaq i utz laj olem chi kpe ru' i Qaqajaw Dios, xaq i Ajwal Jesucristo.

Tioxinik che i Dios xaq i tz'onb'enik che

4Yin, are kinlapan ru' i Dios, lik katk'un chink'ux rumali chi lik arewi kintioxij che awumal yet, 5man intom utzijol chi lik kul ak'ux che i Ajwal Jesús xaq lik nim i k'axnab'al ak'ux chke konojel ni'pa je re i Dios. 6Yet lik akub'am ak'ux che Ajwal, lik keje pacha kqa'an yoj. Rumali chi kintz'onoj che i Dios, chi lik arewi kakub'a ni ak'ux che, k'a kawetamaj ni i utz chi kojtikini chu'anik rumal i k'axnab'al qak'ux che i Cristo. 7Lik kinkikotik, xaq lik o ukowil ink'ux rumal i k'axnab'al ak'ux yet chke, xaq awumal yet wachalal chwach i Cristo, ni'pa i je re i Dios lik o ukowil kik'ux.

I ma Pablo xutz'onoj jun utzil che i ma Filemón, tob'al re a Onésimo

8Rumali, tupu yin rumal inpatan chi uya'om i Cristo chwe, o pin-ab' katintaq chu'anik ni'pa i rajwaxik chi ka'ano, 9xwiri kin-an taj, k'iyal mul kintz'onoj utzil chawe pub'i i k'axnab'al k'uxij. Yin in ma Pablo, in rij chik, xaq in o prexil rumal i Jesucristo, 10kintz'onoj chawe chi cha'ana jun utzil che i a Onésimo. Ire le xel chwe pacha taq wak'al waral prexil, rumal i Jesucristo.

11Jela kanoq i a Onésimo le, xu'an che rib' jun utz ti laj ajtaqon chawe#1.11 Keje ile xub'ij i ma Pablo che, man reta'am chi xa anmajnaq i Onésimo ru' rajaw uchak., xwiri wo'or kuriq tan chik uchak chawe yet, xaq chwe yin. 12Wo'or kintaq chub'i awu'. Chak'ulaj ni awu' pacha ink'ulaxik yin ka'ano. 13Lik xwaj te'eq yin chi ire kkanaj wu' pacha ak'exel yet, kutob'ej we. Lik kuriq te'eq uchak chwe tz'aqat in o prexil; in tz'apilik xa rumal i utz laj tzij k'ak' re i Dios. 14Xwiri nti jun b'iroxik katintaq chu'anik we kawaj taj. Kwaj ti kin-an pen chawe man i utzil chi kintz'onoj chawe; kwaj taj we are ti arayijb'al yet. 15Moqxa keje xraj i Dios ile che i a Onésimo: Chi xel jub'i' awu' man wo'or k-e chik awu' xaq kk'iji awu' ronojel ij saq. 16Ire wo'or, keje ti chik pacha jun ajtaqon, ire lik o u'ij; lik jun awachalal chwach i Cristo chi lik k'ax ni kana'o. Yin qatzij lik k'ax kinna'o, xwiri yet lik mas k'ax ni chana'a chinwach yin. K'ax chana'a man utz laj ajchak, xwiri mas k'ax kana ni wo'or man awachalal chik rumal i Ajwal.

17Yet, we lik in awachi'il chi k'ax kinana'o, cha'ana uri utzil chwe: Chak'ulaj i a Onésimo awu'; cha'ana che pacha Yin kinak'ulaj awu'. 18We o umak u'anom chawe, xaq we o uk'as awu', yin kintoj chawe. 19Yin kintz'ib'aj b'i i tziji ru' in-ab': Yin, chi in ma Pablo, lik kintoj na. Keje ile kin-an na tupu are yet o pacha ak'as wu', man wumal yin ariqom ak'aslemal chwach i Dios. Ile nti uchak kink'unsaj chak'ux, xwiri xinb'ij na. 20Rumali wachalal chwach i Cristo, cha'ana i utzil chomal le chwe rumal i Ajwal; chakub'saj ink'ux pacha kmajawik man qachalal qib' rumal i Cristo.

21Kintz'ib'aj iri chawe, man weta'am chi lik katkojon ni che intzij, xaq ka'an ni mas puwi i kintz'onoj chawe. 22Xaq chayijb'a ipa kink'iji wi are kinupon tan chik iwu'. Keje cha'ana ile, man kul ink'ux che chi Dios kuya ni chiwe wach itz'onom che, chi kinupon ni chisolixik.

K'isb'al taq uya'ik i rutzil wachij

23Xaq i ma Epafras chi o wu' kuya pan rutzil awach; ire wachi'il prexil rumal i Jesucristo. 24Xaq i ma Marcos kuya pan rutzil awach, xaq keje i ma Aristarco, xaq i ma Demas, xaq keje i ma Lucas chi kinkito ru' uchak i Ajwal.

25Chk'iji ni utz re i Ajwal Jesucristo piwi yix. Keje ile kwaj (Amén).

Currently Selected:

Filem%F3n 1: ACHICUB

Highlight

Copy