Deuteronomio 28

Utzil chomal pkiwi i kekojonik

1We lik saq laj tzij katkojon che Awajwal Dios xaq ka'an ronojel ni'pa kub'ij utzij upixab' chi kinb'ij chawe wo'or, are uri i Ajwal katuya ni pkiwi konojel i tinimit re uwach i jyub' ta'aj. 2Xwi ta la ile, ronojel ni'pa i utzil chomal re i Ajwal kpe ni pawi man at kojonnaq che utzij i Dios. 3Lik kya' ni utzil chomal pawi pa tinimit xaq pa taq es, 4xaq kya' ni utzil chomal pkiwi awak'al xaq puwi ronojel atikon; xaq pkiwi konojel i kak'al achikop, achij xaq pkiwi konojel ni'pa i jalajuj taq achikop, 5xaq lik kya' ni utzil chomal puwi ronojel achikach xaq puwi i k'ijib'al ipa kyot' wi i or re i wa re trigo, 6Xaq kya' ni utzil chomal pawi yet che ronojel ni'pa i ka'ano.

7I Ajwal keujach ni pa'ab' i ajch'oj chawij are kkaj u'anik k'ax chawe. Lik ketusus na are ke'e chawij, xwiri lik to' kichkich chik ki'anom are ke'anmaj ni pa'ab' yet.

8I Ajwal kuya ni utzil chomal puwi k'olb'al awixim xaq puwi ronojel wach i ka'ano, saq laj tzij kuya ni utzil chomal puwi i ulew chi kuya Ire chawe yet.

9We ka'ano chrij pacha kub'ij utzij upixab' xaq we lik katb'in chupam ub'e, Awajwal Dios kumayij ti ub'ixkil uri chi lik at utinimit chi at jachtal pu'ab', chrij pacha ub'im chawe. 10Are uri konojel i tinimit re uwach i jyub' ta'aj kkil na chi yet at utinimit i Dios, man yet kasik'ij ni pub'i xaq lik kkixij ni kib' chawe. 11I Ajwal lik kuk'ut ni nim laj rutzil uk'ux chawe yet man kuya ni k'i awak'al, kuya k'i kak'al achikop xaq k'iyal taq atikon chwach ulew, chi xub'ij chke awatit amam, chi kuya ni chawe. 12Xaq kujaq ni nim laj ub'eyomal chawe chi are i kaj, man keje ile lik kpe ni jab' puwi awulew chi lik rajwaxik, xaq ku'an ni che atikon chi lik ku'an utz uwach. Kaya ni cha'im chke i jub'an chik tinimit, xwiri yet lik nti jun katchi'man ru'. 13I Ajwal katuya ni chunab'eyal, pa k'isb'al re taj; lik arewi at o pkiwi i jub'an chik winaq, lik chkixe' taj, xwiri we ka'ano xaq we katkojon che utzij upixab' Awajwal Dios chi xinya chawe wo'or. 14Lik msach chak'ux ronojel ni'pa i xinb'ij chawe, moq kat-e taq chukojik ki'ij i jub'an chik dios.

Utojik i qelanik

15 Xwiri we katkojon ti che Awajwal Dios xaq ka'an taj pacha kub'ij utzij upixab' xaq i u'atb'al tzij chi xinb'ij chawe wo'or, kpe uri ronojel i k'oqb'ali pawi: 16Lik ktzaq ni k'oqb'al pawi pa tinimit xaq pa taq es. 17Lik ktzaq ni k'oqb'al puwi achikach xaq puwi i k'ijib'al ipa kayot' wi or re i wa re trigo. 18Lik ktzaq ni k'oqb'al pkiwi awak'al xaq puwi ronojel atikon; xaq pkiwi konojel i kak'al achikop, achij xaq konojel ni'pa i jalajuj taq achikop. 19Xaq ktzaq ni k'oqb'al pawi yet ru' ronojel ni'pa i ka'ano.

20I Ajwal kutaq na li k'oqb'al pawi, kusach ni anojb'al xaq lik b'is ru' ronojel ni'pa i ka'ano, lik naj taj katk'asi'ik man Ire kusach ni awach, man yet xawo'taj utzij upixab' Awajwal Dios rumal i jalajuj taq i utz taj chi xa'ano. 21Xaq i Ajwal kutaq na li k'ax laj taq yob'il pawi k'a katkam na chila che i ulew ipa katjeqi wi. 22I Ajwal kuya na li k'ax laj taq yob'il pawi chi lik kkamsanik pacha la: A' tew, ij tij chi lik kji'sanik, sipoj, k'atik xaq i jalajuj taq yob'il puwi atikon, i jalajuj taq k'ax le lik katro'taj taj k'a katukamsaj na. 23Man i Ajwal ku'an che i kaj chi kuya ta li jab' chawe, xaq ku'an che i ulew chi kuya ti chik atikon. 24I Ajwal kutzaqsaj na li uk'aj ulew xaq seneb' pawi puk'exel i jab' k'a katkam na, 25xaq kqajsax ni a'ij kumal i ajch'oj chawij. Lik kab'isoj enam chu'anik ch'oj chkij ike lik kixtususik xwiri i anmajik loq to' kichkich chik, lik kkib'isoj ni konojel i winaq chwach i jyub' ta'aj wach taq kak'ulmaj. 26Konojel i k'uch xaq i jalajuj itzel taq chikop kkitij ni ati'lal are at kamnaq chik xaq lik mijun kexib'iw b'ik.

27I Ajwal kupetsaj ni jalajuj taq ch'ak chawij pacha xkik'ulmaj aj Egipto, xaq sipoj, sarna, xaq i jalajuj taq salch'ip chi lik nti kunb'al re. 28Xaq ku'an ni chawe chi katch'ujerik, katpotz'irik xaq lik to' kk'achir ni ak'ux. 29Lik to' katmalal na, katb'inik pacha jun mawach, lik kel ti utz ronojel ni'pa i ka'ano; lik to' arewi kqajsax a'ij xaq katel-axik xwiri mijun katuto na. 30Kach'ob'o chi katk'uli ru' jun ixoq chi lik k'ax kana'o, xwiri jun chik kkotz'i ru' ixoq le. Ka'an ni jun awachoch, xwiri katk'iji ti chuxe', katik ni jalajuj taq tikon re i uva, xwiri katij ti uwach; 31lik chawach kkamsax ni atoro xwiri katij ti pich' i ti' che. Lik chawach yet kmaj b'i a'axna xwiri kya' ti chik chawe. I ajch'oj chawij kkimaj nu b'i achij, xwiri mijun katuto chumajik chke. 32Ak'ojol xaq i je ami'al, lik chawach yet kejach nu b'i chke i winaq aj naj chi aweta'am ti kiwach, lik ronojel ij kawaj yet kawil chik kiwach, xwiri kattikar ti che. 33Winaq chi aweta'am ti kiwach kkitij b'i uwach atikon xaq kkik'am nu b'i ronojel ni'pa ach'akom chwach achak. Ij ij kki'an ni k'ax chawe xaq kkipetsaj b'is ru' awanima. 34Are kawil ronojel ni'pa ile, are uri kpe ni ch'ujerik chawe. 35I Ajwal kupetsaj jub'an itzel laj taq ch'ak pach'ek, che taq awa' xaq che ronojel ach'akul, xwiri lik katutzir ti chik.

36I Ajwal ku'an ni chawe yet xaq che awajawinel chi katk'am nu b'i che jun tinimit chi aweta'am ti upam xaq keta'am ti aqajaw achuch. Chila lik kakoj ni ki'ij i jub'an chik dios chi je antal ru' che' xaq ru' ab'aj. 37Ronojel ni'pa i jalajuj taq tinimit ipa katuk'am b'i Ajwal, lik kkixij ni kib' i winaq chawe, katkiyo'ya na xaq lik tzeb'al na chkiwach ike ni'pa kak'ulmaj na. 38Lik nim ni tikon katiko xwiri lik xa jub'i' uwach kamolo man i sak' kkitij b'i uwach atikon. 39Katik ni uva xaq lik kachajij na, xwiri katu' ti i uwa'al uva muqb'am xaq nti uwach kamolo man i amol kkik'is b'i ronojel. 40Lik k'i ni uche'lal i olivo katik chwach ronojel awulew, xwiri kakoj ti aceite chawij man i uwach tikon, are k'amaja kerijab'ik, ketzaq kitukel. 41Keak'uwalij ni ak'ojol xaq ami'al xwiri kek'iji ti awu' man kechap b'i kumal ajch'oj chawij, kek'am b'i che jun chik tinimit. 42Ronojel i jalajuj taq che' xaq i jalajuj taq echa' chi o chwach awulew, lik kek'is nu b'i kumal i sak'. 43I winaq aj naj chi je o patinimit, ike ij ij mas o kicho'ab', xwiri yet ij ij xa kk'is acho'ab'. 44Ike lik o ni ub'itaq ke re kkiya ni chawe pa cha'im, xwiri yet lik nti o awu' chi kaya pa cha'im chke ike; ike lik o ni ki'ij chwach i jyub' ta'aj xwiri yet lik nti pich' a'ij.

45Ronojel ni'pa i k'oqb'al le ktzaq ni pawi yet, lik kterej ni chawij xaipa kat-e wi k'a kuchup ni uwach ak'aslemal, man xawaj ti xatkojon che Awajwal Dios xaq xa'an taj pacha kub'ij utzij upixab' xaq u'atb'al tzij chi uya'om Ire chawe. 46Ronojel iri xa are jun k'amb'al pamaj chawe yet xaq chke amuq axikin ronojel ij saq, 47man xakoj ti u'ij Awajwal Dios ru' kikotemal xaq ru' saqil laj ak'ux are xuya i k'iyal taq utzil chomal chawe. 48Ka'an ni kichak i je ajch'oj chawij chi keutaq b'i Ajwal chi kki'an ni ch'oj chawij, katij ni k'ax rumal i numik, k'atik, katij ni ile chi nti chik a'u' xaq lik katik'aw ni chupam jalajuj taq nib'a'il. I Ajwal ku'an ni chawe chi katij ni nim laj k'ax pki'ab' k'a ksach ni awach. 49K'a che jun nim laj tinimit chi lik mas naj o wi chwach i jyub' ta'aj, i Ajwal kuk'aq na li jun tinimit chawij yet chi lik juntir kk'unik pacha jun xik krupupik chi xaq kata ti ub'e kich'ab'al; 50i winaq le chi xek'unik chi aj naj, lik je itzel laj taq winaq, man kkil ti pich' tob'al kiwach i rijab' xaq nti pich' k'axnab'al kik'ux chke ak'alab'. 51Ike kekitij nu b'i konojel kak'al achikop xaq ronojel ni'pa uwach atikon chi kuya awulew, k'a kkik'is nu b'i chawe ronojel; man lik nti chik pich' trigo, uwa'al uva muqb'am, aceite, kak'al achikop xaq kak'al achij, keje ile katkam ni rumal numik.

52Ronojel atinimit ksutix ni rij k'a kwulijsax na li tapial chi lik naj rij xaq lik nim uwach, chi xaq akub'am te'eq ak'ux che, qatzij, ksutix ni rij atinimit xaq k-ani ni ch'oj chawij chila chwach ulew chi kuya i Ajwal chawe. 53Are sutim chik rij atinimit kumal ajch'oj chawij, lik nti chik uri katel wi, are uri katuchap i wa'jal xaq rumal i numik le lik katij nu b'i ami'al awalk'uwal chi uya'om Awajwal Dios chawe. 54Tupu o jun winaq chixol yix chi lik utz uk'ux, xwiri tzel ni kril i ratz ucha', rixoqil chi lik k'ax kuna'o xaq i rak'al chi k'a je k'as kan ru', 55man kraj ti kuya jub'i' kiti', i ti'ij le are kich'akul i rak'al chi keukamsaj re kutijo man lik nti wa re ktijawik are ktijin u'anik ch'oj pa taq tinimit xaq lik katij ni nim laj k'ax rumal i nim laj b'is chi kkiya ajch'oj chawe 56tupu o jun ch'am laj ixoq chixol, chi lik kraj tene kutak'b'a jub'i' raqan chwach ulew we nti uxajab' man lik ch'am xaq lik ch'u' i raqan, xwiri ixoq le lik tzel ni kril i rachijil chi lik k'ax kuna'o, xwi ta la ile, xaq keje ku'an ni chke i rak'al 57man kuya ti jub'i' kiti', i ti'ij le are kich'akul i rak'al chi k'ate kealaxik xaq kutij ne b'i katz'um, ronojel ile ani'al kutijo man lik nti wa re ktijawik are ktijin u'anik ch'oj pa taq itinimit.

58We ka'an ti ronojel ni'pa i atb'al tzij chi tz'ib'tal chupam i wuji, xaq we kakoj ti u'ij i ch'am xaq i nim laj ub'i Awajwal Dios, 59i Ajwal kutaq na li nimaq taq yob'il xaq nimaq taq k'ax pawi yet xaq pkiwi amuq axikin, xaq itzel laj taq yob'il chi lik kkuntaj ti chik. 60Ku'an na chi kpe chik i jalajuj taq yob'il pawi xaq i nimaq taq il chi xpe pkiwi aj Egipto, chi lik xaxij awib' rumal, ile lik arewi katik'aw chik chupam. 61Xwi ta la ile, xaq kutaq chali jub'an chik yob'il xaq nimaq taq k'ax pawi chi tz'ib'tal ti chupam i wuji re i k'utunik, chi xaq lik kuk'is nu b'i ak'aslemal. 62Yet, Israel, chi lik ix k'i te'eq pacha i ch'umil chi je o chwa kaj, kix-ob' na, lik ix keb' oxib' chik kixkanajik, rumal xatkojon ti che Awajwal Dios. 63I Ajwal pacha ukikotik are xatuk'iyarsaj xaq are xuya utzil chomal pawi, xaq keje uya'ik i jalajuj taq k'ax ile pawi ku'ano, man lik katelsax b'i chwach ulew chi kuya i Ajwal chawe. 64I Ajwal ku'an ni chawe chi katkicher nu b'i pa jalajuj taq tinimit, chila kakoj wi ki'ij jub'an chik dios chi je antal ru' che' xaq ru' ab'aj, chi yet xaq awatit amam xiwetamaj ti kiwach. 65Tz'aqat are at o pa jalajuj taq tinimit le, katkikot taj xaq lik katuxlan taj, man i Ajwal ku'an ni chawe chi to' kaxij awib' to' kb'ison ab'a'wach xaq kb'ison ak'ux. 66Ak'aslemal arewi o pa k'ax, kaxij ni iwib' chipa'ij chicha'ab' man lik aweta'am taj junpa katkam anoq. 67Lik nim ni xib'rikil kana'o man kawil i jalajuj taq b'iroxik pawach, xaq kab'ij na are ksaqirik: “¡Kwaj yin wetene oknaq chik a'ab'!” Are cha'ab' kab'ij na: “¡Kwaj yin wetene saqirnaq chik!” 68Tupu i Ajwal xub'ij chawe chi kattzalij ti chik che i b'e chi k-e pa Egipto, xwiri i Ajwal le ku'an ni chawe chi kat-e chik chila, katuk'am nu b'i pa barco xaq katuk'ayij ni chke ajch'oj chawij pacha at winaq chi at o pa k'ax rumal rajaw achak xwiri lik mijun katlo'owik.

Currently Selected:

Deuteronomio 28: ACHICUB

Highlight

Copy

Compare