Deuteronomio 29
29
Utrat i Ajwal ku' aj Israel chila Moab
1Keje kub'ij i trat iri chi xuya i Ajwal che ma Moisés chi kki'an aj Israel chila che i tinimit Moab; i trat le uwi chik i jun chi xuya chke chila chwi jyub' Horeb. 2Ma Moisés xumol kichi' aj Israel, xub'ij chke:
Yix xiwil ronojel ni'pa xu'an i Ajwal chila pa Egipto, che ma faraón, chke i je rajpatan xaq chke konojel uwinaq, 3yix lik xiwilo ni'pa nimaq taq il xaq i nimaq taq anik le. 4Xwiri k'a are u'anom wo'or i Ajwal uya'om ti inojb'al xaq uya'om ti chiwe chi kita ub'e wach ke'el usuk' ronojel ni'pa ile. 5Kawinaq (40) junab' xixrok'aj pa tz'inilik jyub' chaqij, che ronojel ni'pa taq i ij le x-on ti tel i'u' xaq xjar ti ixajab'. 6Xitij ti wa re trigo, xaq xitu' ti uwa'al uva muqb'am chi lik ch'am, re kiwilb'ej re chi Iwajwal lik are i Dios yix.
7Are xojk'un che i k'ijib'ali, i ajawinel re i tinimit Hesbón chi ma Sehón xaq i ajawinel re i tinimit Basán chi ma Og, xe'el li chu'anik ch'oj chqij xwiri yoj xeqach'ako. 8Xqamaj kan i kulew, xqaya chke utzob'ajil ma Rubén, ma Gad xaq chke i nik'aj utzob'ajil ma Manasés. 9Rumali, chi'ana ronojel pacha kub'ij i trat man keje ile ronojel ni'pa ki'ano kixel ni utz ru'.
10Wo'or imolom iwib' iwonojel yix chwach Iwajwal Dios, konojel ni'pa aj-atzil chke i tzob'ajil, je uwi ujolom i tinimit, nimaq kipatan xaq konojel achiyab' aj Israel, 11je ak'alab', ixoqib' xaq konojel aj naj chi je o chixol yix kmajan che ajtzukul si' k'a che ajk'amol ya, 12man kkiya kib' chu'anik ronojel ni'pa kkib'ij man kki'ano pacha kub'ij utrat i Ajwal Dios chi xu'an iwu' yix wo'or. 13Wo'or kkanajik chi yix ix utinimit i Ajwal xaq are Ire i-Dios yix, chrij pacha usujum chke iwatit imam chi mam Abraham, mam Isaac xaq mam Jacob. 14Xwiri xwi ti iwu' yix k-on wi utrat i Ajwal, 15xaq ku' konojel ni'pa je nti chi chqaxol yoj wo'or chwach i Ajwal. 16Yix lik iweta'am wach te'eq qak'aslemal pa Egipto ujer, xaq wach qik'awik loq pa jalajuj taq tinimit chi qariqom li pqab'e. 17Chila xqil wi jalajuj taq dios chi je saqil taj xaq ch'am ti laj taq tiox, chi je antal ru' che', ru' ab'aj, ru' an-o'oj xaq ru' i saq-o'oj, chi konojel i winaq le kkikoj u'ij. 18Mijun achi, mijun ixoq, mijun alk'uwal xaq mijun tzob'ajil chi kro'taj kan i Ajwal Dios xa rumal taq ukojik ki'ij i ki-dios i jalajuj taq tinimit le. Mijun chiwe yix ku'an taq che rib' pacha i es chi k'a i ra' xaq lik kkamsanik.
19Chrijil chik utayik ronojel ni'pa i tzij re i trati, we o jun kuch'ob' taq xaq kuna taq ire chi lik utz laj winaq xaq kub'ij: Ronojel lik utz kel ni chwi in-ab' tupu kin-ano wach kwaj yin; xwiri we keje ku'an ile, are ire uri kesachaw i winaq konojel. 20I Ajwal kukuy ti umak, xane kresaj roywal che i achi le xaq ktzaq ni ronojel k'oqb'al puwi chi b'ital chupam i wuji, xaq kuchup ni kiwach umuq uxikin chwach ulew. 21Xaq kresaj ni achi le chkixol konojel kitzob'ajil aj Israel, xaq kutzaqsaj ni chupam i jalajuj taq k'ax chrij pacha ronojel i k'oqb'al re i trat chi tz'ib'tal chupam i wuji re i atb'al tzij. 22I jalajuj taq lemajil re k-on panoq imuq ixikin yix chi kek'unik k-on panoq, xaq keje i aj naj chi kek'un chkixol, lik kkil ni jalajuj taq k'ax xaq i jalajuj taq yob'il chi kutaq li Ajwal chwach ulewi. 23Ike le kkil ni ulew chi pacha asufra, pacha atz'am xaq pacha ulew k'atnaq. Lik nti k-on utz chila chwach ulew le man mitene i es kel loq. Lik pacha xuk'ulmaj are xchup kiwach i tinimit Sodoma, Gomorra, Adma xaq i tinimit Zeboim rumali i Ajwal lik xpe roywal chke.
24Are uri konojel i winaq chwach i jyub' ta'aj kkitz'onoj ni chkiwach: “¿B'uchak xu'an i Ajwal ile che i ulew? ¿B'uchak chi lik xpe roywal i Ajwal?” 25I la'b'al uwach i tz'onb'enik le are iri: “Man xko'taj kan i trat re i Ajwal, chi Ki-Dios i katit kimam, chi xu'an ku' are xeresaj li pa Egipto. 26I winaq le xe'e chukojik ki'ij i jub'an chik dios xaq xexuki chkiwach, xwiri i jalajuj taq dios le lik keta'am ti kiwach xaq nti uya'om chke. 27Rumali xpe roywal i Ajwal chke i winaq le, xaq xutaq li jalajuj taq k'oqonik pkiwi chi tz'ib'tal chupam i wuji. 28Ru' nim laj roywal xeresaj b'i chupam kulew, xeutaq b'i che i jub'an chik tinimit pacha ktijin u'anik wo'or.”
29O i b'iroxik chi qeta'am taj: Ile xwi Qajwal Dios reta'am; xwiri o jalajuj taq b'iroxik chi saqim chqe yoj xaq chke i qak'al man arewi kqa'ano wach i kub'ij, ile are ronojel utzij upixab' xaq u'atb'al tzij i Ajwal.
Currently Selected:
Deuteronomio 29: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
