Deuteronomio 27
27
Utz'ib'axik i atb'al tzij chwach taq ab'aj chila chwi jyub' Ebal
1Ma Moisés xaq konojel i raqan u'ab' i tinimit xkiya i taqaniki chke konojel i winaq:
“Chi'ana ronojel ni'pa kinb'ij chiwe wo'or. 2Are ki'axuj i raqana Jordán xaq are kixok chwach ulew chi kuya Iwajwal Dios chiwe, kitak'b'a ni uwach jub'an nimaq taq ab'aj xaq kitz'aj ni ru' chun, 3xaq chwach kitz'ib'aj ni ronojel i atb'al tzij are kixok chwach ulew chi kuya Iwajwal Dios chiwe yix, are ulew chi lik o uwa'al kab' xaq o leche chwach chi lik kramtaj taj, lik pacha xusujuj chke iwatit imam. 4Are i'axum chik i raqana Jordán, rajwaxik kitak'b'a ni uwach jub'an nimaq taq ab'aj chila chwi jyub' Ebal chi xinb'ij chiwe, xaq kitz'aj ni ru' chun. 5-6Xaq ki'an ni jun sujb'al sipon ru' jub'an ab'aj kojb'al u'ij Iwajwal Dios. Lik nti kiyijb'a che ab'aj le, lik pacha u'anom keje ile kikojo. Chila puwi i sujb'al sipon le kiporoj ni sipon chwach Iwajwal Dios. 7Xaq kisujuj ni isipon re chomb'al ib' xaq chila chwach Iwajwal Dios, kitij wi iwa xaq ki'an ni i nima'ij. 8Chwach i nimaq taq ab'aj, rajwaxik chi lik utz utz'ib'axik i tzij pixab' ki'an che chi inya'om chiwe.”
9Chrijil chik ile ma Moisés junam ku' i ajsujul sipon chi aj Leví, xub'ij chke aj Israel:
“Mixch'awik, chita iri: Wo'or yix ix utinimit Iwajwal Dios. 10Rumali, rajwaxik chixkojon che xaq chi'ana pacha kub'ij utzij upixab' xaq u'atb'al tzij chi xinya chiwe wo'or.”
Uk'iyal i k'oqonik
11Lik che i ij le ma Moisés xub'ij chke i winaq:
12Yix are i'axum chik i raqana Jordán i utzob'ajil ma Simeón, ma Leví, ma Judá, ma Isacar, ma José xaq ma Benjamín ke'e ni puwi i jyub' Gerizim yab'al utzil chomal puwi i tinimit le. 13I utzob'ajil ma Rubén, ma Gad, ma Aser, ma Zabulón, ma Dan, xaq ma Neftalí ke'e ni puwi i jyub' Ebal man kkitz'onoj i k'oqb'al. 14Are uri aj Leví kkib'ij ni chke konojel i winaq aj Israel, lik kesik'in ni chub'ixkil i tziji:
15“Xapachin jun ku'an jun utiox, lik kk'oqox na tupu lik ch'ich' tiox antal rumal i jun chi reta'am u'anik xaq tupu lik kruwaj che jun k'ijib'al chi lik alaj taj, ile lik tzel kril i Ajwal.” Are uri konojel i winaq kkib'ij na: “Lik keje ile ch-antaj na.”
16“Xapachin jun kuk'oqoj uqajaw xaq we uchuch, lik kk'oqox na.” Are uri konojel i winaq kkib'ij na: “Lik keje ile ch-antaj na.”
17“Xapachin jun kuyoj umojon i rach lok'anij majb'al kan rulew, lik kk'oqox na.” Are uri konojel i winaq kkib'ij na: “Lik keje ile ch-antaj na.”
18“Xapachin jun kutaq b'i jun mawach che i b'e chi utz taj, lik kk'oqox na.” Are uri konojel i winaq kkib'ij na: “Lik keje ile ch-antaj na.”
19“Xapachin ku'an jun utz taj che jun aj naj, che jun ak'al chi nti chik uqajaw uchuch xaq we che jun malkan, lik kk'oqox na.” Are uri konojel i winaq kkib'ij na: “Lik keje ile ch-antaj na.”
20“Xapachin jun alk'uwalxel kumin rib' ru' rixoqil uqajaw, lik kk'oqox na man kuqajsaj u'ij uqajaw.” Are uri konojel i winaq kkib'ij na: “Lik keje ile ch-antaj na.”
21“Xapachin jun ku'an urayijb'al uch'akul ru' jun chikop, lik kk'oqox na.” Are uri konojel i winaq kkib'ij na: “Lik keje ile ch-antaj na.”
22“Xapachin jun kumin rib' ru' ranab', lik kk'oqox na, tupu umi'al uqajaw ru' jun chik ixoq, xaq we ralit uchuch ru' jun chik achi. Are uri konojel i winaq kkib'ij na: Lik keje ile ch-antaj na. 23Xapachin jun kumin rib' ru' uchuch uji', lik kk'oqox na.” Are uri konojel i winaq kkib'ij na: “Lik keje ile ch-antaj na.”
24“Xapachin jun chi kukamsaj jun rach lok'anij xa chrij, lik kk'oqox na.” Are uri konojel i winaq kkib'ij na: “Lik keje ile ch-antaj na.”
25“Xapachin jun kuk'am jun mer re kamsab'al jun winaq chi nti umak, lik kk'oqox na.” Are uri konojel i winaq kkib'ij na: “Lik keje ile ch-antaj na.”
26“Xapachin jun chi kuya ti u'ij u'atb'al tzij i Dios xaq i ku'an taj pacha i kub'ij i atb'al tzij le, lik kk'oqox na.” Are uri konojel i winaq kkib'ij na: “Lik keje ile ch-antaj na.”
Currently Selected:
Deuteronomio 27: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
