2 Tesalonicenses 1
1
Ma Pablo kuya pan rutzil kiwach i qachalal chi je o pa Tesalónica
1Yin in ma Pablo, junam ru' i ma Silvano xaq i a Timoteo, kqaya pan rutzil iwach yix chi ix kojonnaq che i Qaqajaw Dios xaq che i Ajwal Jesucristo chila pa tinimit Tesalónica. 2I Qaqajaw Dios, xaq i Ajwal Jesucristo, chkiya utzil chomal piwi, xaq i uxlanb'al k'uxij.
I Dios ku'at ni tzij pkiwi ajmakib' are kk'un i Cristo
3Ix, qachalal chwach i Cristo, o uchak lik arewi kqatioxij che i Dios iwumal yix. Lik kqa'an ile, man i ukub'ib'al ik'ux yix che i Ajwal lik ktijin uk'iyik, xaq i k'axnab'al ik'ux chiwach ktijin unimarik. 4Ke'eloq, chi yoj lik kojkikot chub'ixkil ile, are oj o ku' i jutzob'aj re i Dios, man unimal ik'ux chupam taq uyej chi kki'an i winaq chiwe lik nim, xaq lik o ukub'ib'al ik'ux che i Ajwal chupam i k'ax le. 5Ni'pa ile, ku'aljinsaj chi Dios lik utz, lik suk'ul i atb'al tzij ku'ano, man ni'pa i uyej chi kixtijin chuch'ijik, xa are anb'al utz chiwe man o ni iwe che i ajawinik re i Dios.
6Lik suk'ul uri, chi i Dios kupetsaj ni uyej pkiwi i kipetsam uyej piwi yix. 7Wo'or ix o chupam uyej, xwiri, chixuya ni Ire pa uxlanem, xaq keje pacha ku'an chqe yoj. Keje ku'an ile are kuriq i ij chi kk'un i Ajwal Jesús chi kwinaqir li chikaj junam ku' u-ángel lik nim kicho'ab', kek'un chupam pacha urep a'. 8Te'uri kuya ni tojb'al mak chke i xkaj ti retamaxik uwach i Dios, xaq chke ile chi xkikoj ti utz laj tzij k'ak' re i Qajwal Jesús. 9I tojb'al mak chi kpe ni pkiwi are iri: Lik kkitij ni i k'ax ronojel ij saq, xaq lik keya' ni k'a naj che i Ajwal. Kkil ti chik uwach, xaq kkil ti chik ucho'ab' uchomal. 10Are kuriq i ij chi kk'un i Ajwal; che i ij le, koksax ni u'ij kumal i je re ire, lik kkikoj ni u'ij konojel i utinimit chi je kojonnaq che. Xaq yix ix o ni ku' ike chukojik u'ij, man ikojom chik i tzij chi qab'im chiwe.
11Rumali lik arewi kojlapan ru' i Dios piwi yix. Kqatz'onoj che chi lik chu'ana utz chiwe pacha i kmajawik, chi ix sik'tal rumal Ire; rumali lik kqatz'onoj che i Dios chi ru' ucho'ab', chuya ni chiwe kixtiki chu'anik pacha i kmajawik. Xaq kixuto ni chu'anik ni'pa i chak chi ki'ano, rumal ukub'ib'al ik'ux che Ire. 12Keje ile, koksax ni u'ij i Qajwal Jesucristo rumal wach i ki'an yix, Ire le lik ku'an na chi koksax i'ij. Keje ile rumal i rutzil uk'ux i qa-Dios xaq i Ajwal Jesucristo.
Currently Selected:
2 Tesalonicenses 1: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala