2 Tesalonicenses 2
2
Usaqixik uk'unik tan chik i Cristo
1Wo'or wachalal chwach i Cristo, kwaj kinlap chiwe wach uk'unik i Qajwal Jesucristo, xaq wach umolik qib' ru' ire, lik kintz'onoj utzil chiwe, puwi ile, 2chi'ana kwent iwib', moqxa to' kisach la inojb'al, xaq mixk'achir che we o i kkib'ij chi ya xuriq i ij re uk'unik i Ajwal Jesucristo. Mikoj ile, tupu o jun kb'inik chi lik are Lo'laj Utewal i Dios ub'im ile che; xaq mikojo we o jun tzij kb'ix ni chiwe, o we o jun wuj pacha taq qu' yoj elnaq wi kkib'ij. 3Lik miya taq iwib' chke chi kixkit'oro. Chik'unsaj iri chik'ux: Are k'amaja kuriq i ij re uk'unik i Ajwal, nab'e kuriq i ij chi laj konojel i winaq kkixutuj ni Dios, are kwinaqir i jun chi itzel laj achi, chi lik xa rak'al tojpen. 4Ire le are i ajch'oj chrij i Dios, xaq chkij konojel i winaq chi kkikoj u'ij i Dios, ire ku'an ni che rib' chi nim u'ij chwach ronojel ni'pa i olik, xwi ta la ile, xaq kukoj ni ukub'ib'al chi o u'ij prachoch i Dios i ku'an pacha Dios che rib'.
5¿Kk'un ti b'awa chik'ux, chi are in o iwu', lik xinb'ij iri chiwe? 6Wo'or, upetik i utz ti laj achi le; iweta'am chik yix wach i k-atiwik, rumali, kk'un ti tan, k'a kuriq ni ij chi uch'ikom i Dios. 7Ni'pa taq i utz taj, ya ujeqom chik i anik ani'al, xwi chik roy-em relsaxik i jun chi wo'or u'atim. 8Te'uri kwinaqir itzel laj achi. Xwiri i Ajwal Jesús ru' i nim laj u'ij uchomal, kuxut'ij ru' i ruxlab', lik kusach uwach. 9I uk'unik i itzel laj achi le xa rumal i Itzel, xaq i nim laj ucho'ab', ru' i Itzel kpe wi; uk'iyal nimaq taq il, xaq uk'iyal taq retalil chi lik qatzij taj ku'ano. 10Is ku'an ronojel taq i utz taj, kut'orb'ej ke i winaq. Xwiri, ni'pa i keut'oro, xa je are ike chi xkaj ti ukojik i saq laj tzij#2.10 Wetene xkikojo, ketotaj neri rumal.; re i k'aslemal chi kk'is ti chik. 11Lik kkaj ti saq laj tzij, rumali, i Dios kuya chke chi kesach chupam i utz taj xaq xa are kkikoj i t'oronik. 12Ke'el uri chke chi ke'e ni pa a' man xkaj ti ukojik i saq laj tzij, xa are qus xkil u'anik i mak atzalal.
I kik'aslemal i winaq chi kekojon che i Dios
13Wachalal chwach i Cristo, o uchak lik arewi kqatioxij che i Dios iwumal yix man lik k'ax kixuna i Ajwal. Kqatioxij che man i Dios ix u'ulum yix k'a chuxeb'al ij saq; man keje ile yix na kixtotaj nab'e. Rumal i Lo'laj Utewal chi ix ucha'om i Dios; ile rumal ukub'ib'al ik'ux che i saq laj tzij chi xikojo. 14Are rumal iri chi xixusik'ij i Dios re iwelb'al chisaq, rumal i utz laj utzij k'ak' chi xqab'ij yoj chiwe; keje ile o ni iwe che i chom laj k'ijib'al ru' Qajwal Jesucristo.
15Rumali, ix, wachalal chwach i Cristo, lik chikowij ik'ux; misach pik'ux wach i k'utunik xqaya kan chiwe, chi xaq lik xqatz'ib'aj chiwe chwach wuj. 16I Ajwal Jesucristo junam ru' i Qaqajaw Dios, chi lik k'ax oj una'om, man lik uya'om ukowil qak'ux, xaq i roy-exik i rutzil k'uxij, chi nti uk'isik. 17I Qajwal Jesucristo lik are Ire chuya ni ukowil ik'ux, xaq lik chu'ana chiwe chi kib'ij ni utz laj tzij.
Currently Selected:
2 Tesalonicenses 2: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
