1 Tesalonicenses 5
5
1Qachalal chwach i Cristo, nti uchak ktz'ib'ax chiwe pachike ij xaq junpa kk'un i Ajwal. 2Man yix lik iweta'am chi mijun reta'am i ij re uk'unb'al i Ajwal. Xwiri are nti kqach'ob' che, are uri kuriq i ij le chi kk'unik; keje pacha jun ili'om chi kk'un cha'ab'. 3Are kkib'ij i winaq iri: “Wo'or ronojel lik utz lik chom, nti taq kojk'achir rumal,” are uri, xaqte'et kpe i tojpen pkiwi. Pacha uk'axk'ol kuna jun ixoq are kk'iji rak'al. Lik keje uri ile, chi ketotaj ti chwach i k'ax. 4Xwiri yix, qachalal chwach i Cristo, iweta'am chik ile, ix nti chik pa equmal; rumali i uk'unik i ij re i Ajwal, ku'an ti uri chiwe pacha taq uk'unik jun ili'om; man iweta'am chi lik kk'un ni ij le. 5Iwonojel yix ix re i saq; ix re i pa'ij. Oj re ti cha'ab'; xaq oj re ti equmal; 6rumali mojwarik pacha kki'an i to' winaq. Are i chqa'ana, chojk'ask'atoq, xaq chqasuk'b'a qanojb'al. 7Ni'pa i kewarik, cha'ab' kewarik; xaq i ke'ab'arik, cha'ab' ke'ab'arik; 8xwiri yoj chi oj re i pa'ij, o uchak lik utz ni qanojb'al. Mqasach ukub'ib'al qak'ux che i Ajwal, xaq i k'axnab'al qak'ux, man ile kojuto ni che i ch'oj ru' Itzel, pacha ku'an jun chi yij che i ch'oj, ktotaj ni rumal u'u' ch'ich' chi o chwach uk'ux. I ukub'ib'al qak'ux, xaq i k'axnab'al qak'ux lik kuriq ni uchak chqe pacha ku'an jun achi chi yij che i ch'oj, ktotaj rumal uxamparel ch'ich'. 9I Dios xojusik'ij ti ru' re yab'al qe pa tojpen; Ire xoju'ulu man kqariqb'ej re i qelb'al chisaq rumal i Qajwal Jesucristo. 10Ire xkam qumal yoj man kraj Ire lik kojjeqi junam ru', nti k-ono we oj k'aslik, o we oj kamnaq chik. 11Rumali, chiya ukowil ik'ux, xaq lik chito iwib' chiwach, pacha i kixtijin chik chu'ankil le.
Upixb'anik ma Pablo chke aj Tesalónica
12Qachalal chwach i Cristo, lik kqatz'onoj utzil chiwe, chiya ki'ij ni'pa i kechakun iwu', ike chi ke'ok'aw utzam chiwe, chi xaq kixkipixb'aj pub'i i Ajwal. 13Kmajaw chke kiya ki'ij, xaq k'ax cheina rumal i chak ketijin chu'ankil chixol. Chom chix-ol chiwach pik'aslemal.
14Xaq lik kqab'ij chiwe, i qachalal chwach i Cristo, cheipixb'aj ni'pa i kkaj ti chak; chiya ukowil kik'ux ni'pa i nti qas ukowil kik'ux; xaq cheito ni'pa i qas ti jikil kik'ux che i Dios; xwiri o uchak o unimal ik'ux chke konojel.
15Jun, we u'anom i utz taj chiwe, mitzalij uwach che; are chitija i ij chu'ankil i utz chiwach, xaq che ronojel uwach i jyub' ta'aj.
16Lik arewi chixkikotoq. 17Arewi lik chixlapan ru' i Dios. 18Chitioxij che i Dios ronojel ni'pa kik'ulmaj. Ile are kraj i Dios chi ki'an yix chi ix re chik i Jesucristo.
19Mi'atij i Lo'laj Utewal i Dios. 20Mixutuj i kitzij i qachalal chi kkib'ij chiwe wach utzijom i Dios chke. 21Xwiri, chikojo retalil we qatzij wach i kkib'ij; xwi i utz che ile are chikojo. 22Chijek'a iwib' che ni'pa taq i utz taj.
23I Dios chi kyaw i uxlanb'al qak'ux, kintz'onoj che chi Ire ku'an chiwe lik ix ch'am pik'ux. Kintz'onoj che chi lik kixuchajij k'a are kk'un chik i Qajwal Jesucristo man keje ile lik nti jun utz taj kuriq chiwe, mitene piwanima, mitene pik'ux, xaq mitene che ich'akul. 24Ire chi xixusik'ij ru', lik arewi kuya i utz chke i je re Ire; xaq lik utz ku'an ni ronojel ile.
Rutzil wachij xaq utzil chomal
25Qachalal chwach i Cristo, chitz'onoj che i Dios pqawi yoj.
26Chiya rutzil kiwach konojel i qachalal chwach i Cristo ru' jun utz laj tz'ub'anik chiwach.#5.26 Keje ile xki'an i je re i Dios, k'utb'al re chi o ki'ij chkiwach xaq o k'axnab'al kik'ux.
27Kinya chiqul chi kiwajlaj uwach i wuji chke konojel i qachalal chwach i Cristo; man iri lik utaqanik i Ajwal chwe.
28I Qajwal Jesucristo chuya ni utzil chomal piwi. (Keje ile kwaj). Amén.
Currently Selected:
1 Tesalonicenses 5: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
