1 Tesalonicenses 4
4
I k'aslemal chi chom kril i Dios
1Wo'or, qachalal chwach i Cristo, o jun tzij lik kqab'ij chiwe chi o uchak ki'an na, lik kqaya chiqul pub'i i Ajwal Jesús. Chk'un chik'ux, yix xixnaw chqij yoj wach u'anik ki'ano re i chom laj k'aslemal chwach i Dios; chikowirsaj mas u'ankil ile.
2Yix iweta'am wach qab'im kan chiwe chi ki'an na; lik ru' i Ajwal Jesús petnaq wi i tzij le. 3Are kraj i Dios che ik'aslemal yix are jun k'aslemal chi lik ch'am: Jun winaq mumin rib' ru' jun chik chi k'ulinaq ti ru'. 4Yix lik chijujunal chiriqa rilik ich'akul, man keje ile ke'eloq chi lik o u'ij xaq lik ch'am. 5Keje ile chi'ana; mi'an to' pacha irayijb'al yix, pacha kki'an i to' winaq chi keta'am ti i Dios. 6Mijun mut'or taq jun rachalal che taq ile, xaq mu'an i utz taj che, man i Ajwal kuya ni pa tojpen rumal ile. Ile, ax qab'im wi chik chiwe. 7Man i Dios oj usik'im ti che makunik; are oj usik'im chu'anik ch'am chwach Ire. 8Ke'el uri we o jun kuxutuj i k'utuniki, are ti ajb'il re i tzij kuxutuj, are i Dios ktijin chuxutuxik, Dios chi kuya i Lo'laj Utewal Ire pqanima.
9Kinb'ij yin chi nti qas rajwaxik kintz'ib'aj chiwe re i k'axnab'al ik'ux chiwach, man i Dios uk'utum chiwe wach i k'axnab'al iwib' ki'ano. 10Keje ile kixtijin chu'ankil chke konojel i qachalal chwach i Cristo chila che ronojel i ulew Macedonia. Xwiri, lik kqatz'onoj chiwe, chi lik chikowij mas u'ankil ile. 11Lik chom chix-ol che ik'aslemal; mimin taq iwib' che wach taq nti iwe che; xaq chixchakunoq kich'akb'ej re wach i kitijo, pacha i qab'im chiwe. 12Keje chi'ana ile, man keje ile kul ti ik'ux che jun chik, xaq ni'pa i k'amaja kkikoj i Cristo, chom kkil ni ik'aslemal yix.
Uk'unik tan chik i Ajwal
13Wachalal chwach i Cristo chi k'ax kixinna'o, kqaj yoj chi kiwetamaj wach k-ani chke i qachalal chi je kamnaq chik; kqaj taj we kixb'ison chke pacha kki'an i winaq chi ne te re i Cristo. 14Yoj qakojom chi Jesús xkamik, xaq xwalij che i kamik; xaq keje ile kul qak'ux che chi i Dios kojuwalijsaj che i kamik ni'pa i je kamnaq chi kijachom kib' pu'ab' i Jesús.
15Rumali wo'or kqab'ij ni jun tzij chiwe chi petnaq ru' i Ajwal: Yoj chi k'a oj k'aslik are kk'un i Ajwal, i qa'enam yoj ru', kojnab'ej ti chkiwach i je kamnaq chik. 16Kojnab'ej taj, man are kuriq i ij, i Ajwal ko kch'aw li chikaj, k'unsab'al saq chkiwach i kamnaq; xaq ktataj uch'awb'al jun ángel nim upatan, xaq i uch'awb'al i trompeta re i Dios. Are uri, kqaj li Ajwal chikaj; te'uri ni'pa i kamnaq chi kijachom kib' pu'ab' i Cristo, kk'un saq chkiwach nab'e. 17Te'uri yoj chi k'a oj k'aslik, kojyaktaj b'i chikaj junam ku' ike; kqak'ulaj i Ajwal pa sutz', xaq koj-ek'iji ru' k-e ij saq. 18Rumali, chiya ukowil ik'ux chiwach ru' i tzij le.
Currently Selected:
1 Tesalonicenses 4: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
