1 Juan 4

I saqil laj kub'ib'al k'uxij

1Ix, wachalal chwach i Cristo chi lik kixwaj, mikoj utzij jun winaq we xa rumal kub'ij chiwe chi o Lo'laj Utewal i Dios ru'. Chixtak'al ni praqan we qatzij are Lo'laj Utewal i Dios o ru'. Man lik je k'i i ajt'oronelab' keb'in chik chwach i jyub' ta'aj; kkib'ij ike chi profeta. 2Ilb'al re uri we lik qatzij o Lo'laj Utewal i Dios ku', man we lik je re i Dios, kkib'ij na chi i Jesucristo qatzij xu'an achi che rib' xaq xk'un chwach i jyub' ta'aj. 3We xa kkuwaj ile, nti Lo'laj Utewal i Dios uri ku'; xa are utewal i jun chi ajch'oj chrij i Cristo, are ile o ku'. Yix itom utzijol chi kk'un jun ajch'oj chrij i Cristo; o chik utewal chwach i jyub' ta'aj.

4Ix wak'al, yix ix re i Dios; ix tikinaq chke i ajt'oronelab' le, man o Lo'laj Utewal i Dios iwu'; Ire, lik nim ni ucho'ab' chwach i jun chi o ku' ike, chi to' je re uwach i jyub' ta'aj. 5Ike to' je re uwach i jyub' ta'aj rumali chi to' b'iroxik re uwach i jyub' ta'aj kkilapo, i winaq chi to' je re uwach i jyub' ta'aj le, qus kkita i kitzij. 6Xwiri yoj oj re i Dios. Pachin reta'am uwach i Dios kuya uxikin chqatayik yoj. Pachin re ti i Dios kojuta ti uri. Keje ile qeta'am pachin o i Utewal i Dios ru', xaq pachin o i utewal i t'oronik ru'.

I k'axnab'al k'uxij, kuk'utu chi junam qawach ru' i Dios

7Wachalal chwach i Cristo chi lik kixwaj, o uchak k'ax chqana qib' chqawach, man i k'axnab'al k'uxij ru' i Dios kpe wi. Pachin o i k'axnab'al uk'ux reta'am uri uwach i Dios, xaq alaxnaq chik ru' i Dios. 8Pachin nti k'axnab'al uk'ux, alaj uri chi reta'am ti uwach i Dios, man i Dios are uxeb'al i k'axnab'al k'uxij. 9I Dios xuk'ut i k'axnab'al uk'ux chqe yoj man xutaq li Uk'ojol chwach i jyub' ta'aj. Xa jun i Rak'al; xwiri xutaq li chi, kuyab'ej re i qak'aslemal saqil. 10Kinb'ij chiwe wach usuk' i saqil k'axnab'al k'uxij: I Dios k'ax kojuna'o xaq xutaq li Uk'ojol chi xkam chwach i krus tojb'al re i qamak. Keje ile xu'aljinsaj i k'axnab'al uk'ux chqe. Are ti yoj k'ax xqana i Dios.#4.10 Cf. Juan 3.16-17; Romanos 8.32; Gálatas 1.4; 2.20.

11Wachalal chwach i Cristo chi lik kixwaj, we keje i k'axnab'al uk'ux i Dios ile chqe, o uchak xaq yoj k'ax chqana qib' chqawach. 12Mijun ilawnaq uwach i Dios;#4.12 Juan 1.18. xwiri, we k'ax kqana qib' chqawach, k-aljin uri chi o i Dios qu', xaq i k'axnab'al uk'ux. 13Qeta'am chi oj o che i Dios, xaq i Dios o pqak'ux yoj, man Ire uya'om Utewal pqanima.#4.13 Romanos 8.9; 1 Juan 3.24. 14I Ta chikaj utaqom li Uk'ojol elsab'al ke i winaq chupam i kimak. Ile lik qilom yoj, xaq kqapaxsaj utzijol chke i winaq wach i qilom. 15Pachin kukojo chi Jesús are Uk'ojol i Dios, xaq keje ile kub'ij chkiwach i winaq, ire le o che i Dios, xaq i Dios o che ire.

16Rumali qeta'am xaq kqakojo chi Dios k'ax kojuna'o. I Dios are uxeb'al i k'axnab'al k'uxij. Pachin k-aljin che chi o k'axnab'al uk'ux, o uri che i Dios, xaq i Dios o che ire. 17Rumali, i k'axnab'al k'uxij chi kpe ru' i Dios lik saqil pqak'ux, man are kuriq i ij re i atb'al tzij, o ni uri ukub'ib'al qak'ux man yoj waral chwach i jyub' ta'aj lik oj keje pacha i Jesucristo. 18Ipa o wi i k'axnab'al k'uxij, lik nti xib'rikil.#4.18 Romanos 8.15; 2 Timoteo 1.7. We lik saqil i k'axnab'al qak'ux che i Dios, k-e uri i qaxib'rikil. We k'a kqaxij qib', xa are kqach'ob' uri chi Dios kojuya ni pa k'ax. Rumali, jun we to' kuxij rib', saqil ti uri i k'axnab'al uk'ux che i Dios.

19Yoj lik k'ax keqana i qachalal man i Dios k'ax xojuna yoj nab'e. 20We o jun kub'ij: “Yin k'ax kinna i Dios”; xwiri we tzel kril jun rachalal, ire xa kt'oron uri. Jun, we k'ax ti keuna i rachalal chi je o chrij chwach, chi lik kril kiwach ¿Wach k'ax una'ik i Dios uri ku'ano, chi k-iltaj ti uwach?#4.20 1 Juan 2.9-11. 21I Jesucristo ub'im i tzij pixab'i chqe: Pachin k'ax kuna i Dios, o uchak uri k'ax cheuna i rachalal.#4.21 Cf. Mateo 22.37-39.

Currently Selected:

1 Juan 4: ACHICUB

Highlight

Compare

Copy