1 Juan 3

1Chiwila pe', i Qaqajaw chikaj lik k'ax kojuna'o; man kub'ij chi oj rak'al Ire,#3.1 Juan 1.12-13; cf. Gálatas 4.5-7. i qatzij lik oj re Ire. I winaq chi to' je re uwach i jyub' ta'aj, keta'am ti qawach, man keta'am ti uwach i Dios. 2Ix, wachalal chwach i Cristo chi kixwaj, wo'or oj rak'al chik i Dios; tupu k'amaja kqilo wach koj-anawik, xwiri qeta'am chi are kk'un i Jesucristo, kojel loq pacha Ire, man lik kqil na wach ktzun Ire. 3Ni'pa i kikub'am kik'ux che ile, ku'an uri ch'am che rib' pacha i Jesucristo chi lik ch'am.

4Ni'pa kki'an kimak, kki'an ti uri pacha kub'ij i atb'al tzij re i Dios; man i mak atzalal xa are uqelik u'atb'al tzij i Dios. 5Yix iweta'am chi i Jesucristo xk'un chwach i jyub' ta'aj chrelsaxik i qamak.#3.5 Juan 1.29; cf. 1 Pedro 2.24. Xaq iweta'am chi ire nti umak.#3.5 Juan 8.46; 1 Pedro 2.22; cf. 2 Co 5.21; Hebreos 4.15; 7.26. 6Rumali ni'pa i kek'iji pu'ab' i Jesucristo, kkimayij kemakunik. Jun, we k'a kmakunik, alaj uri chi reta'am ti uwach i Jesucristo, xaq kuta ti ub'e. 7Ix ral taq wak'al, mixt'ortajik, pachin ktijin chu'ankil i utz, suk'ul laj winaq uri; ke'eloq pacha i Jesucristo chi lik suk'ulik. 8Xwiri jun we to' kmakunik, xa re i Itzel uri, man i Itzel lik ajmak chuxeb'al li ij saq.#3.8 Juan 8.44. Xwiri i Uk'ojol i Dios xk'un chwach i jyub' ta'aj xolusacha uwach ni'pa u'anom Itzel.

9Jun, we rak'al chik i Dios, kmakun ti chik man o re i Dios che; utz ti chik uri kmakunik, man alaxnaq chik ru' i Dios. 10K-aljin uri, pachin je rak'al i Dios, xaq pachin je rak'al i Itzel: Ni'pa i utz ti kki'ano, ni'pa i kkaj ti i kachalal chwach i Cristo, ike ne te re i Dios.

Tzij pixab' re i k'axnab'al k'uxij

11I tzij chi xita are xiya iwib' pu'ab' i Jesucristo, are iri: O uchak k'ax kqana qib' chqawach.#3.11 Juan 13.34; 15.12; cf. 1 Juan 2.7-11. 12Mqa'an qe yoj pacha xu'an i a Caín; ire xa re Itzel man xukamsaj ucha'. ¿B'uchak xukamsaj? Man ni'pa i xu'an a Caín lik utz taj, xwiri ni'pa i xu'an ucha' lik utz.#3.12 Génesis 4.8.

13Ix, wachalal chwach i Cristo, mixok il che we tzel kixkil i winaq chi je re uwach i jyub' ta'aj. 14Qeta'am chi xojel che i b'e chi kojuk'am b'i te'eq che i kamik, i xoj-ax che i b'e re i k'aslemal. Qeta'am chi qariqom i b'e re i k'aslemal, man k'ax kqana i qachalal chwach i Cristo. Are i k'ax ti kkina i kachalal, k'a je o uri pa b'e re i kamik. 15Pachin tzel kril i rachalal chwach i Cristo, ajkamsanel uri. Yix iweta'am chi mijun ajkamsanel uriqom uk'aslemal chi nti uk'isik. 16Qeta'am wach usuk' i k'axnab'al k'uxij man i Jesucristo xu'aljinsaj chqe are xuya rib' che i kamik tob'al qe yoj. Xaq yoj, kmajawik kqaya qib' che i kamik, k'axnab'al ke i qachalal chwach i Cristo. 17We o jun b'eyom, to' kril i rachalal chwach i Cristo chi lik o rajwaxik che, xwiri we kuto taj. Lik nti uri k'axnab'al uk'ux pacha re i Dios. 18Ix, ral taq wak'al, we qatzij o k'axnab'al qak'ux, xwi ti ru' qachi' kqab'ij. O uchak k-iltajik chi o k'axnab'al qak'ux saqil rumal i utz chi kqa'ano.

19Keje ile qeta'am chi oj re i saq laj tzij, xaq kqana'o chi oj utz chwach i Dios. 20We kub'ij qak'ux chi qa'anom qamak, i Dios lik mas nim chwach i qanima man Ire ronojel lik reta'am. 21Ix, wachalal chwach i Cristo chi lik kixwaj, we kqana pqak'ux nti qamak, lik o uri ukowil qak'ux chwach i Dios. 22Keje ile wach i kqatz'onoj che, Ire kuya ni chqe, man kqakoj utzij upixab', xaq kqa'ano pacha i chom kril Ire. 23I utzij upixab' are i kojonik che i Jesucristo chi Uk'ojol, xaq k'ax chqana qib' chqawach pacha xojutaq Ire chu'ankil. 24We kqakoj retalil utzij upixab' i Dios, kojk'iji uri pu'ab' Ire, xaq Ire o pqak'ux yoj. Rumal Utewal chi uya'om chqe, qeta'am chi i Dios o pqak'ux.#3.24 Cf. Juan 17.21-23,26; Romanos 8.14-16; 1 Corintios 2.10-12.

Currently Selected:

1 Juan 3: ACHICUB

Highlight

Compare

Copy