1 Juan 5

I kub'ib'al k'uxij, are i uxeb'al i k'axnab'al k'uxij

1Pachin kukojo chi Jesús are i Cristo, lik rak'al i Dios uri. Pachin k'ax kuna jun qajawxel, xaq k'ax keuna uri i rak'al i qajawxel le. 2We k'ax kqana i Dios, xaq we kqa'ano pacha kojutaq chu'ankil, qeta'am uri chi k'ax keqana i rak'al i Dios. 3I k'axnab'al qak'ux che i Dios, kqa'aljinsaj we kojkojon che utzij upixab' i Dios, ile jun eqan taj chqe yoj. 4K'ax taj, man qonojel ni'pa i oj alaxnaq ru' i Dios kojtiki chuqajsaxik ucho'ab' i to' re uwach i jyub' ta'aj. Kojtiki che rumal ukub'ib'al qak'ux che i Jesucristo. 5Pachin kukojo chi i Jesús lik rak'al i Dios, ktiki chuqajsaxik ucho'ab' i to' re uwach i jyub' ta'aj.

6I Jesucristo are xk'un chi chwach i jyub' ta'aj, xqajsax ya puwi, xaq are xkamik xutix ukik'el. Lo'laj Utewal i Dios lik ajsaqinel tzij chrij ronojel ile, ronojel ni'pa i kub'ij i lo'laj utewal i Dios ile lik saq laj tzij. 7Je oxib' ajsaqinel tzij chrij ile. 8Are i Lo'laj Utewal i Dios, xaq i ya, xaq i kik'elaj.#5.8 5:6-8: I taq tziji (che versículo 6, 7, 8) qas ti ktataj ub'e; je k'i is junwi kkib'ij wach usuk'. Xwiri, chupan i wuj Levítico, capítulo 14, 15, 16, kqilo chi i ya xaq i kik'elaj lik o uchak chke i aj Israel winaq ch'ajb'al re i kimak. 9Yoj kqakojo wach taq kkib'ij i to' winaq, mas o uri uchak chqakojo utzij i Dios; rumali o uchak kqakojo wach kub'ij chrij Uk'ojol. 10Pachin kukoj Uk'ojol i Dios, reta'am uri puk'ux chi Jesucristo are Uk'ojol i Dios. Pachin kukoj ti ile chi ub'im i Dios, kel uri pacha kub'ij chi Dios xa kt'oronik. Keje ile ke'eloq, man ukojom taj wach ub'im i Dios chrij Uk'ojol. 11Are iri, are usuk' ub'im i Dios, chi Ire uya'om i qak'aslemal chi nti uk'isik, xaq kqariq i k'aslemal le we kojkojon che i Uk'ojol. 12Pachin o i Uk'ojol i Dios pranima, o uri uk'aslemal saqil; pachin nti Uk'ojol i Dios pranima, nti uri uk'aslemal saqil.

K'isb'al taq tzij

13Kintz'ib'aj iri chiwe yix, chi ikub'am ik'ux che Uk'ojol i Dios, man kwaj kiwetamaj chi o chik ik'aslemal yix chi nti uk'isik. 14Kul qak'ux che i Dios man qeta'am chi Ire kuta wach i kqatz'onoj che, xwiri we kqatz'onoj che pachike taq i utz kraj Ire chqe yoj. 15We qeta'am chi kuta wach i kqatz'onoj che, xaq qeta'am uri chi kuya ni chqe wach i kqatz'onoj che.#5.15 Cf. Mateo 7.7-11; Juan 14.13; 15.7,16; 16.23-24; 1 Juan 3.21-22.

16Jun qachalal chwach i Cristo, we kiwil yix chi ktijin chu'anik umak, chi kamik taj ru', chitz'onoj utob'al i Dios puwi, xaq i Dios kuya ni uk'aslemal, xwiri, we i umak le are ti kk'amaw b'i che i kamik. Man o i mak chi keuk'am b'i ajmakib' che i kamik; rumal i mak le utz we ktz'onox ti che i Dios puwi. 17Ni'pa i utz taj chi k-anik, is mak atzalal; xwiri o i mak chi kojuk'am tu b'i che i kamik.

18Qeta'am chi ni'pa i je alaxnaq ru' i Dios, kimayim kemakunik, man i Uk'ojol i Dios keuchajij; rumali keyin ti rumal i Itzel. 19Qeta'am chi oj re chik i Dios, tupu ronojel i jyub' ta'aj o pu'ab' i Itzel. 20Xaq qeta'am chi Uk'ojol i Dios k'unnaq, xaq uya'om qanojb'al re kqetamaj uwach i Dios saqil. Oj o che i saqil Dios, man oj o che Uk'ojol chi Jesucristo. Ire lik are i Dios, xaq are rajaw i k'aslemal chi kk'is ti chik. 21Ix ral taq wak'al, mikoj ki'ij taq i tiox chi xaril je antalik. Keje ile kwaj (Amén).

Currently Selected:

1 Juan 5: ACHICUB

Highlight

Compare

Copy