Popular Bible Verses from 1 Juan 4

Share

Ipa o wi i k'axnab'al k'uxij, lik nti xib'rikil. We lik saqil i k'axnab'al qak'ux che i Dios, k-e uri i qaxib'rikil. We k'a kqaxij qib', xa are kqach'ob' uri chi Dios kojuya ni pa k'ax. Rumali, jun we to' kuxij rib', saqil ti uri i k'axnab'al uk'ux che i Dios.

Ix wak'al, yix ix re i Dios; ix tikinaq chke i ajt'oronelab' le, man o Lo'laj Utewal i Dios iwu'; Ire, lik nim ni ucho'ab' chwach i jun chi o ku' ike, chi to' je re uwach i jyub' ta'aj.

Yoj lik k'ax keqana i qachalal man i Dios k'ax xojuna yoj nab'e.

Wachalal chwach i Cristo chi lik kixwaj, o uchak k'ax chqana qib' chqawach, man i k'axnab'al k'uxij ru' i Dios kpe wi. Pachin o i k'axnab'al uk'ux reta'am uri uwach i Dios, xaq alaxnaq chik ru' i Dios.

Pachin nti k'axnab'al uk'ux, alaj uri chi reta'am ti uwach i Dios, man i Dios are uxeb'al i k'axnab'al k'uxij.

Kinb'ij chiwe wach usuk' i saqil k'axnab'al k'uxij: I Dios k'ax kojuna'o xaq xutaq li Uk'ojol chi xkam chwach i krus tojb'al re i qamak. Keje ile xu'aljinsaj i k'axnab'al uk'ux chqe. Are ti yoj k'ax xqana i Dios.

Wachalal chwach i Cristo chi lik kixwaj, we keje i k'axnab'al uk'ux i Dios ile chqe, o uchak xaq yoj k'ax chqana qib' chqawach.

I Dios xuk'ut i k'axnab'al uk'ux chqe yoj man xutaq li Uk'ojol chwach i jyub' ta'aj. Xa jun i Rak'al; xwiri xutaq li chi, kuyab'ej re i qak'aslemal saqil.

We o jun kub'ij: “Yin k'ax kinna i Dios”; xwiri we tzel kril jun rachalal, ire xa kt'oron uri. Jun, we k'ax ti keuna i rachalal chi je o chrij chwach, chi lik kril kiwach ¿Wach k'ax una'ik i Dios uri ku'ano, chi k-iltaj ti uwach?

Pachin kukojo chi Jesús are Uk'ojol i Dios, xaq keje ile kub'ij chkiwach i winaq, ire le o che i Dios, xaq i Dios o che ire.

I Jesucristo ub'im i tzij pixab'i chqe: Pachin k'ax kuna i Dios, o uchak uri k'ax cheuna i rachalal.

Ix, wachalal chwach i Cristo chi lik kixwaj, mikoj utzij jun winaq we xa rumal kub'ij chiwe chi o Lo'laj Utewal i Dios ru'. Chixtak'al ni praqan we qatzij are Lo'laj Utewal i Dios o ru'. Man lik je k'i i ajt'oronelab' keb'in chik chwach i jyub' ta'aj; kkib'ij ike chi profeta. Ilb'al re uri we lik qatzij o Lo'laj Utewal i Dios ku', man we lik je re i Dios, kkib'ij na chi i Jesucristo qatzij xu'an achi che rib' xaq xk'un chwach i jyub' ta'aj.

We xa kkuwaj ile, nti Lo'laj Utewal i Dios uri ku'; xa are utewal i jun chi ajch'oj chrij i Cristo, are ile o ku'. Yix itom utzijol chi kk'un jun ajch'oj chrij i Cristo; o chik utewal chwach i jyub' ta'aj.