1 Juan 2
2
1Yix chi ix ral taq wak'al, kintz'ib'aj iri chiwe man keje ile kixmakun taj. Xwiri, we o jun xmakunik, o jun utz laj ajkojol qatzij chwach i Ta chikaj. Are i Jesucristo chi lik utz, xaq lik nti umak. 2Ire xu'an qak'exel, man xuya rib' xkamsaxik, tojb'al qamak yoj. Xwi ti rumal qamak yoj,#2.2 Romanos 3.25; Hebreos 9.11-14; 1 Juan 4.10. xaq rumal kimak konojel i winaq chwach i jyub' ta'aj.
Tzij pixab' re i k'axnab'al k'uxij
3We kojkojon che utzij upixab' i Dios, lik qatzij uri chi oj tikinaq chretamaxik uwach Ire. 4We o jun kub'ij: “Yin weta'am uwach i Dios”; xwiri we ku'an taj pacha kub'ij utzij upixab', xa kt'oronik, xaq nti saq laj tzij uri puk'ux. 5Xwiri, we jun ktijin chu'ankil wach kub'ij utzij i Dios, k-aljin uri chi tz'aqatnaq i k'axnab'al uk'ux i Dios che ire. We keje ile kqa'ano, qeta'am uri chi oj o ru' i Dios. 6Pachin jun kub'ij chi o ru' i Dios, rajwaxik chi uk'aslemal keje pacha xu'on uk'aslemal i Jesucristo.
7Ix, wachalal chwach i Cristo, i tzij pixab' chi xintz'ib'aj chiwe ri k'ak' taj, lik are i tzij chi ax o wi. Xaq ax itom wi, are xiya iwib' pu'ab' i Dios. 8I tzij chi xintz'ib'aj chiwe, ke'eloq pacha jun k'ak' tzij pixab' kina yix. Keje ile kina'o man ya kpaktaj i equmal chiwach; i saq chi lik saqil are i Jesucristo chi ktijin utzunik pik'ux.
9We o jun kub'ij chi o pa saq, xwiri we ktitat upam che i rachalal chwach i Cristo, k'a o uri pa equmal. 10I jun chi k'ax keuna i rachalal chwach i Cristo, o uri pa saq; i saq le, kuya ti che ktzaq chupam i mak atzalal.#2.10 I tziji xaq ke'el usuk' pacha iri: Ire nti xaq ku'ano chi ktzaq jun chik rumal. 11Xwiri we ktitat upam che i rachalal chwach i Cristo, o uri pa equmal. I reta'am taj ipa k-e wi, man i equm le u'anom mawach che.#2.11 Cf. Juan 11.9-10; 12.35-36.
Saqil laj kub'ib'al K'uxij
12Ix ral taq wak'al, kintz'ib'aj iri chiwe, man i Dios ukuyum chik imak rumal i Jesucristo. 13Ix qajawxelab', kintz'ib'aj iri chiwe, man iweta'am chik uwach i Jesucristo, chi ax o wi chuxeb'al ij saq. Ix alab'om, xaq kintz'ib'aj chiwe yix, man ix tikinaq chuqajsaxik ucho'ab' Itzel.
14Ral taq wak'al, intz'ib'am chiwe yix man xiwetamaj uwach i Ta chikaj. Yix, chi ix qajawxelab', xintz'ib'aj iri chiwe, man xiwetamaj uwach i Jun chi ax o wi chuxeb'al ij saq. Ix alab'om, xaq chiwe yix intz'ib'am wi, man o icho'ab', xaq o chik utzij i Dios pik'ux, xaq ix tikinaq chuqajsaxik ucho'ab' Itzel.
15Wachalal, miya ik'ux che uwach i jyub' ta'aj, xaq k'ax mina taq ronojel i o chwach. Jun we k'ax kuna uwach i jyub' ta'aj, nti k'axnab'al uk'ux uri che i Ta chikaj. 16Man ronojel i kusujuj uwach i jyub' ta'aj, ru' ti Ta petnaq wi. Ile lik xa re uwach i jyub' ta'aj, i utz ti laj taq rayijb'al re i qach'akul; i rayijb'al re taq i qus kqilo; xaq u'anik nim che qib' xa rumal i b'eyomal. 17Xwiri uwach i jyub' ta'aj xa kk'isik. Xaq kk'is ni'pa taq o chwach chi xa kqarayij waral. Xwiri i winaq chi kki'an pacha kraj i Dios, i kik'aslemal nti uk'isik.
18Ral taq wak'al, oj o chik pa taq k'isb'al ij. Yix itom chik chi ya kk'un jun ajt'oronel chi ajch'oj chrij i Cristo. Wo'or, je k'i chik ile chi je ajch'oj chrij i Cristo, rumali, qeta'am chi oj o chik pa taq k'isb'al ij. 19Ike je qachi'il te'eq, xwiri qatzij, lik ne te qachi'il. Wetene je qachi'il, xek'iji teneri qu' yoj. Keje ile x-anik, aljinsab'al re chi konojel taj je qachi'il yoj.
20I Cristo utaqom li Lo'laj Utewal i Dios#2.20 1 Juan 2.27. chiwe, rumali iweta'am i saq laj tzij. 21Intz'ib'am taq iri chiwe rumal taj we iweta'am ti i saq laj tzij, rumal man lik iweta'am. Yix iweta'am chi nti jun t'oronik kwinaqir che i saq laj tzij. 22¿Pachin i ajt'oronel? Are i winaq chi kub'ij chi Jesús are ti i Cristo; ire le xa ajch'oj chrij i Cristo, ile xa kuqajsaj u'ij i Cristo chi Uk'ojol i Dios, xaq kuqajsaj u'ij i Ta chikaj. 23I jun chi kruwaj uwach Uk'ojol i Dios, kukoj ti uri u'ij i Ta chikaj; xwiri, pachin i kukoj u'ij Uk'ojol le, xaq kukoj uri u'ij i Ta chikaj.
24Rumali, chik'olo pik'ux i tzij chi itom loq are xijeq li ukojik. We kk'iji pik'ux ni'pa itom loq are xjeqan li ub'ixkil chiwe, kixk'iji uri pu'ab' Uk'ojol, xaq kixk'iji pu'ab' i Ta chikaj. 25Iri are i k'aslemal chi nti uk'isik chi usujum i Jesucristo chi kuya chqe.
26Je o i winaq kkaj kixkit'oro, rumali intz'ib'am iri chiwe. 27Xwiri, yix o Lo'laj Utewal i Dios iwu', chi uya'om i Jesucristo chiwe. Rumali nti uchak jun chik koluk'utu chiwe, man are Lo'laj Utewal i Dios kk'utuw chiwe ronojel wach i rajwaxik chiwe. Ni'pa i kuk'ut ire lik saq laj tzij, t'oronik taj. Rumali, chix-ol che i Cristo pacha kuk'ut Lo'laj Utewal i Dios chiwe.
28Wo'or, ral taq wak'al, chix-ol pu'ab' i Cristo, man keje ile o ni ukowil qak'ux are kwinaqir tan chik, xaq kojk'ix ti chwach are kk'un tan chik ire.
Elik chupam i makunik
29Man yix iweta'am chi i Jesucristo, lik suk'ulik wach i ku'ano; chiwetamaj uri ni'pa i kki'an i suk'ulik, je rak'al i Dios.
Currently Selected:
1 Juan 2: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
